हायवेच्या पाप्पाजीच्या धाब्यावर खाल्लेली , ही एक निराळीच अंडाकरी आहे. पांथस्थासारख्या बल्लवाने माझ्या पाकॄ चे फोटो पिकासावर पाहून ह्यातील एखादी मिपावर टाक असे कॉम्प्लिमेंट्स दिल्याने धीर करत आहे. इथे एक सो एक सुगरणी आणि खवय्ये असताना आपण काही पाकॄ मिपावर टाकायची म्हणजे अंमळ धीराचं काम. तरीसुद्धा..... साहित्य २ कांदे फोडी चिरुन २ टॉमेटो फोडी चिरुन ३अंडी उकडून १ कच्चे फेटून तेल ( घ्याल तसे) ३-४लसूण पा़कळ्या बोटभर आले २ मिरच्या २ चमचे गरम मसाला / कांदा लसूण मसाला २ चमचे धने- जीरे पावडर १ चमचा लाल तिखट मीठ किंचीत साखर कोथिंबीर कॄती कढईत तेल गरम करा. त्यात कांदा गुलाबी होइपर्यन्त परतून घ्या. आता परतलेले कांदे, टोमॅटो, आले, लसूण, मिरच्या आणि कोथिंबीर मिक्सरमधून वाटून घ्या. पाणी घालू नका. ( बिनपाण्याची करा.... पेस्ट हो!) (कांदा टोमॅटो चिरुन मिक्सरमध्ये वाटायचे नसतील तर पेस्ट/ प्युरी मिळते ती वापरा. म्हणजे पाकॄ बॅचलर फ्रेंडली झाली!) अजून थोडे तेल कढईत गरम करुन घ्या. त्या तेलात ही पेस्ट परता.त्यानंतर त्यात गरम मसाला ,लाल तिखट आणि धने- जीरे पावडर घाला. तेल सुटेपर्यन्त परता. दोन कप पाणी घाला. थोडी उकळी येउ दया. मीठ आणि साखर घाला. उकळी येताना त्यात फेटलेले अंडे हळू हळू घाला. त्यावेळी डाव/ पळीने रस्सा हलवत रहा. झाकण ठेवा.अजून चांगली उकळी येउ दया. म्हणजे कच्च्या अंड्याचा उग्र वास जाइल. (कच्च्या अंड्याच्या बलकाचे हलवल्यामुळे छोटे- छोटे तुकडे होतात) त्यांना मसाल्याची चव लागेल. रस्सा छान मिळून येइल आता उकडलेली अंडी पाउण भाग कापून किंवा अर्धे -अर्धे भाग करुन अलगद घाला. थोडावेळ उकळा. आवडत असल्यास वरती कोथिंबीर घाला. मला वरुन कोथिंबीर आवडत नाही म्हणून मी ग्रेव्हीत घालतो. ह्याच पाकॄच्या ग्रेव्हीत ओला नारळ घातला तर ह्या पंजाबी पाकॄचे रुपांतर कोकणी पाकॄत होते. पण त्यात मिरची, आले, लसूण, आणी मसाल्यांचे प्रमाण अजून वाढवावे लागेल. उग्र वास आवडत असल्यास कांदा तेलात परतून न घेता कच्चाच मिक्सर मध्ये वाटून घ्यावा ही अजून एक उप-कॄती. फारच धीर करुन पाकॄ टाकली आहे. चू. भू. दे. घे. (अशीच जर भरपूर ग्रेव्ही करुन ठेवली तर, फक्त भिजवून शिजवलेली कडधान्ये + बटाटे घालून उसळ बनेल.) पाकॄ चे फोटु न दिसल्यास इथे पहा