नमस्कार, जसे आपल्याकडे गौरी गणपतीची दुकानांमध्ये आणि घरोघरी धामधुम असते तशीच ईथे (म्हणजे अमेरिकेत) क्रिसमसची धामधुम असते. थॅकंसगिव्हिग डे झाला की क्रिसमच्या विविध सजावटीच्या वस्तू मॉल व दुकानांमध्ये दिसू लागतात. यामध्ये असतात क्रिसमस ट्रीज, कँडीज, रोषणाईच्या दिव्यांच्या माळा व लहान मुलांसाठी क्रिसमस व्हिलेज इत्यादी. दुकानातील विविध वस्तूंची आकर्षक रचना करून वातावरणनिर्मिती केली जाते. सेंट पॉल येथील ३ एम कंपनीच्या मुख्यालयाच्या इमारतीमधील दिव्यांची कल्पक रचना करून क्रिसमस ट्रीची भव्य आकृती दाखवली जाते जी अनेक मैल अंतरावरूनही पाहता येते. हा फोटो जालावरून साभार. जसा जसा क्रिसमस जवळ येउ लागतो तसे तसे घरांभोवतीची झाडे, कार्यालय, रस्ते, मॉल्स हे रोषणाईने ऊजळू लागतात. अनेक ठिकाणची सजावट पाहून थक्क व्हायला होते. खरे सांगायचे तर लोकांच्या कला कौशल्याचा आविष्कार पाहायला मिळतो. सभोवताल शुभ्र बर्फ पडलेला असल्यास या रोषणाईचे सौंदर्य अधिक खुलून दिसते. आमच्या घराजवळच राहत असलेले एक कुटुंब दरवर्षी क्रिसमसच्या रोषणाईचा मोठा प्रकल्प हाती घेते. त्यांच्या अंगणातील मोकळ्या जागेचा व झाडांचा पुरेपूर वापर करून ते कल्पकतेने रोषणाई करतात. याखेरीज विशेष आकर्षणाची बाब म्हणजे संगीताच्या तालावर हे दिवे थिरकत असतात. या घराच्या जवळ गेल्यावर आपल्या गाडीचा एफएम रेडिओ एका विशिष्ट फ्रिकवेन्सीवर ट्यून करायचा आणि त्या तालावर नाचणारे हजारो दिवे पाहायचे. हा लाईट शो पहिल्यांदा २००३ साली सुरू झाला. २०१४ साली सुमारे पाच हजार पेक्षा जास्त दिवे कॉंप्युटर प्रोग्रामद्वारा नियंत्रीत करून विविध प्रकारचे ऍनिमेशन दाखवले जात होते. अधिक माहिती साठी हा दुवा पाहा - प्लिमथ लाईट्स. क्रिसमसच्या आठवड्यात विविध मॉल्समध्ये सॅन्टाबरोबर फोटो काढून घ्यायला बाळगोपाळ व त्यांच्या पालकांची झुंबड उडते. अशाच प्रसंगी रांगेतील पुढच्या कुटूंबाची वाट पाहणारा एक सॅन्टा.

~ ख्रिस्तजन्माचे विविध देखावे ~ हाडे गोठवणाऱ्या थंडीत राबून अप्रतिम रोषणाई करणाऱ्या सर्वांना मनापासून धन्यवाद.