आंतरजालावरील वाचनीय..

राम राम मंडळी, दिवाळीच्या मुहूर्तावर "आंतरजालावरचे वाचनीय" हे एक नवीन सदर सुरू करण्यास मिसळपावला आनंद होत आहे.. आज मनोगत, उपक्रम, मायबोली, अनेक मराठी ब्लॉग्स, इत्यादी मराठी संकेतस्थळांवर बरेच काही लिहिले जात आहे. मग ती एखादी उत्तम कविता असो, एखादा ललितलेख असो, किंवा एखादी वाचनीय व माहितीपूर्ण चर्चा असो.. आपल्यातले काही मिपाकर हे मिपासोबतच आंतरजालावर इतस्तत:ही फिरत असतात. त्यांच्या नजरेला जर मनोगत, उपक्रम, मायबोली इत्यादींवर प्रकशित झालेले आणि आवर्जून वाचावे असे काही साहित्य दिसले आणि ते मिपाकरांनीही वाचावे असे जर त्यांना वाटले तर त्यांनी संबंधित लेखनाचा दुवा या सदरात अवश्य द्यावा..जेणेकरून इतर इच्छुक मिपाकरांनाही ते वाचता येईल.. एखाद्या जरी मिपाकराला केवळ या धाग्यात दिलेल्या दुव्यामुळे काही चांगल्या वाचनीय साहित्याची माहिती मिळाली आणि त्याला ते वाचता आले तरी या धाग्याचा उद्देश सफल झाला असे आम्ही म्हणू.. यामुळे "मराठी आंतरजाल" म्हणजे "हे विश्वची माझे घर.." अशी भावना वाढीस लागेल, तसेच मिपाचे सभासदही यामुळे अधिकाधिक बहुशृत होतील असा आमचा विश्वास आहे! आमच्यापासूनच सुरवात करतो -- नुकताच उपक्रम या संस्थळाचा दिवाळी अंक प्रसिद्ध झाला आहे. अंक वाचनीय आहे, तो या दुव्यावर जाऊन इच्छुकांना वाचता येईल.. असाच विचार जर प्रत्येकच मराठी संस्थाळाच्या चालकांनी केला तर किती छान होईल! ;) असो, आपला, (राष्ट्रवादी, मराठीवादी) शरदतात्या अभ्यंकर. :)