मॅनेजमेंटचा गोडाचा शिरा

आपल्यापैकी काहीजण व्यवसाय करतात, काही जण नोकरी करतात, तर काही जणांनी या पैकी एक केलेलं आहे. पैसे मिळवायला तुम्हाला ते करणं भाग असतं. आणि यात विशेषत: ज्यांनी नोकरी केलेली आहे, म्हणजे जे ऐलतीरावर राहिलेले आहेत त्यांना पैलतीरावरच्या माणसांचा नेहमीच (अपवाद असतीलच) त्रास झालेला आहे. सांगायचंच झालं तर ज्या प्राण्याला बॉस म्हणतात त्या प्राण्याचे लाड करण्यात, नखरे सहन करण्यात, एम्प्लॉयी किंवा कर्मचारी नामक व्यक्तीची काय तारांबळ होते, किती त्रास होतो, किती मनस्ताप होतो, राग येतो, हे ज्याचं त्याला ठाऊक आहे. आणि तो राग, मनस्ताप अधून मधून फेसबुक किंवा व्हॉट्सअ‍ॅप्प मधील विनोदांमार्फत बाहेर पडत असतोच; शिव्या, आय मीन, शिवाय इतरही माध्यमं आहेत बाहेर पडण्याची.

ही बॉस मंडळी खरंच फार विचित्र असतात कधीकधी. बोलण्यात बोलणं नसतं, मॅनेजमेंट वाहील तसं ही वाहत असतात, अवास्तव अपेक्षा धरून असतात आणि काय नि काय. तसे अनेक अनुभव येत असतात, त्या अनुभवांच्या खिचडीतून झालेला हा गोडाचा शिरा.

बॉस कर्मचा-याला गोडाचा शिरा बनवायला सांगतो. 'एकदम मस्त गोडाचा शिरा बनव छान खमंग'
कर्मचारी कढई घेतो, तूपावर रवा भाजून बिजून मस्त गोडाचा शिरा बनवतो. आणि सर्व्ह करतो.
बॉस (घास घेऊन मख्ख चेह-याने बघत) 'म्म्म ठीक आहे, पण रिच हवा अजून. बेदाणे बिदाणे टाक जरा'

कर्मचारी बदाम, पिस्ते, बेदाणे घालून शिरा बनवतो. दाखवतो.
बॉस (कपाळावर आठ्या आणून) 'ओके... पण यात वेगळं काय आहे?... इट शुड बी डिफरंट. फ्लेवर टाक. अ‍ॅड बटर स्कॉच'
कर्मचारी (नाईलाजाने) 'ओ या! गुड आयडिया. मस्त वाटेल काँटिनेंटल टच'

मग 'तसा' बटरस्कॉच ड्रायफ्रूट शिरा घेऊन कर्मचारी येतो.
बॉस (दाढी (नसलेली) खाजवत) यात थोडा टँगीनेस आणला तर...? हं? अ‍ॅड स्पाईस टू इट. अ‍ॅड चिली.
कर्मचारी (तोंड न उघडता दात-ओठ चावत) सुपर्ब! आजकाल तसंही लोकांना स्पायसी आवडतं सगळं. धिस विल बी अ हिट !
बॉस 'मग! मला तेच.... काहीतरी कमी वाटत होतं पहिल्यापासून'

कर्मचारी शि-यात मिरची घालून आणतो.
बॉस 'हा! आता मस्त. पण जाम तिखट झालाय. तिखट ओव्हरपॉवर करतंय गोडाला. असं नको होतं. तू जास्त टाकलस. यू शुड नो हाउ मच टू अ‍ॅड. असो. आता एक काम कर, थोडा चिंचेचा कोळ घाल त्यात. त्याने न्यूट्रलाईज होईल.'
कर्मचारी गप्प.
बॉस 'काय झालं? बरोबर ना मी म्हणतोय ते?'
कर्मचारी (दचकून) 'हो येस. ऑफकोर्स! ऑफकोर्स!.... करतो'

त्या शि-यात चिंचेचा कोळ घालून कर्मचारी घेऊन येतो.
बॉस 'वेल... ठीक आहे, पण... स्टिल... वी हॅव टू डू समथिंग टू मेक इट स्टँड आउट. शिरा विथ आईस्क्रीम कसं वाटेल?
कर्मचारी (उपहासाने) यू आर अ जिनियस! जस्ट फँटॅस्टिक !लेट्स डू इट.
बॉस 'देअर यू गो...'

कर्मचारी त्या शिरानामक पदार्थावर आईस्क्रीमचा गोळा घालून आणतो.
बॉस एक घास घेतो. 'ह्म्म्म्म्म डिलिशियस'
कर्मचारी (बोडक्याचं डिलिशियस साल्या ओकारी येईल खाऊन)
बॉस दुसरा घास घेतो. 'धिस इज ..... गुड!'
बॉस आणखी एक घास घेतो. ( चेहरा जरा चिंतित)
बॉस आणखी एक घास घेतॉ (कपाळाला आठ्या)
काही सेकंद शांत. आणि म्हणतो 'पण... हा गोडाचा शिरा नाही वाटत. गोडाचा शिरा शुड बी लाईक गोडाचा शिरा.'
कर्मचारी 'फुली फुली फुली फुली फुली फुली फुली फुली फुली फुली फुली फुली फुली फुली फुली फुली'

असे असतात बॉस नामक प्राणी. या शि-याची चव ओळखीची वाटली असेल तर सांगा. :)