जिर्‍या-मिर्‍याचा खाकरा

साहित्यः १ वाटी कणीक १ टीस्पून भाजून, भरडसर वाटलेले / कूटलेले जीरे १ टीस्पून कूटलेली काळीमिरी मीठ चवीप्रमाणे १ टीस्पून तेल पाकृ: कणकेत जीरे, मिरी, मीठ व थोडे तेल घालून घट्ट कणीक भिजवून घ्यावी. झाकून १५-२० मिनिटे ठेवावी. कणकेचा छोटा गोळा घेऊन जमेल तितके पातळ लाटावे. मी मिनी खाकरे बनवलेत , एकसारखे दिसावेत म्हणून डब्याच्या झाकणाने कातून घेतले. तवा मंद आचेवर गरम करायला ठेवावा. त्यावर कातलेला खाकरा टाकून दोन्हीबाजूने जेमतेम भाजून घ्यावा व लगेज ताटात काढावा. थोडे तेल / तूप ब्रश करावे व १० -१५ मिनिटे बाजूला ठेवावे. अश्याप्रकारे सर्व पुर्‍या / पोळ्या जेमतेम भाजून घ्यावे व थोडे तेलाने ब्रश करुन बाजूला ठेवावे. तवा मंद आचेवर गरम करायला ठेवावा. आता तेल लावलेली पुरी / पोळी तव्यावर टाकावी व लाकडी साच्याने (वुडन प्रेस) दाबत सर्व बाजूने चांगली भाजून घ्यावी. उलटवून पुन्हा सर्व बाजूने भाजावी. आच मंदच हवी, खाकरा चांगला खुसखुशीत भाजला गेला पाहिजे. अशा पद्धतीने सर्व खाकरे भाजून घ्यावे. पूर्ण गार झाले की हवाबंद डब्यात भरून ठेवावे. हे खाकरे तुम्ही लोणचं, तुप, चाट मसाला भुरभुरून किंवा नुसतेच चहाबरोबर सर्व करु शकता. कणकेत थोडी कसूरीमेथी, थोडी ताजी, चिरलेली मेथी, हळद, मिरची घालून मेथी खाकरा बनवता येतो. पानीपूरी मसाला घालून ही बनवता येतो. हवे तितके व्हेरीएश्न्स करु शकता.