Skip to main content

खान्देशी पद्धतीची शेवभाजी ,अंडाकरी आणि भरली वांगी

लेखक आरोही यांनी रविवार, 02/03/2014 या दिवशी प्रकाशित केले.
मागच्या आठवड्यात भावाकडे गेले होते तेथे गावावरून आई आली होती मग काय पूर्ण ७-८ महिन्यांनतर आईचे हातचे जेवण मिळणार होते मग सोडणार कोण .मस्त पैकी तिच्या हातची शेवभाजी (खान्देशी शेवभाजी)बनवायला सांगितले .अहाहा काय चव होती ..काहीही केले तरी ती चव कुठेच पुन्हा मिळत नाही ..अगदी मी त्याच पद्धतीने करून बघते पण ती चव खरच येत नाही हे खरेच आहे.. नवऱ्याला हि माझ्या आईच्या हातची त्याच मसाल्यातील कुठलीही भाजी खूप आवडते ..या वेळेस तो सोबत आला नसल्याने त्याला ती खायला मिळाली नाही ...मग काय त्याने फोन करून आईच्या हात चा मसाला बनवून आणायला सांगितले ..मग काय जावयाची इच्छा म्हटल्यावर आईने अगदी अर्ध्या तासात आम्हा तीन माणसांसाठी ७-८ माणसांचा मसाला बनवून दिला .. अगदी ५ तासांच्या प्रवासानंतर मी घरी आल्यावर तो वाटलेला मसाला शीत कपाटात ठेवून दिला .. त्याच मसाल्यात मी तीन प्रकारांच्या भाज्या बनविल्या मी शाकाहारी असल्याने माझ्यासाठी शेवभाजी,नवऱ्यासाठी अंडाकरी आणि दुसर्या दिवशी भरली वांगी ..तसेच या मसाल्यात चिकन सुद्धा खूप चविष्ट होते ... मी विचार केला हि पाककृती मिपा वर देऊयात म्हणून मी आईला फोन करून प्रत्येक पदार्थाचे प्रमाण विचारले तर ती म्हणाली मी असे ठरवून एवढे कधीच काही टाकत नाही नेहमी आपल अंदाजाने घेते ..तरी पण मी प्रमाणाबद्दल सांग असे म्हटल्यावर तिने मला अंदाजे च काही गोष्टी सांगितल्या कि हे एवढे घे ते एवढे घे ... तेच मी खाली दिलेले आहे साहित्य: ४ कांदे,अर्धी वाटी सुके खोबरे ,१५ ते १७ लसुन पाकळ्या (हो ती तर यापेक्षा हि जास्त घेते )२ इंच आले ,जिरे २ चमचे ,लाल तिखट ३ चमचे,हळद १ चमचा ,गरम मसाला १ चमचा ,मीठ चवी प्रमाणे ,कोथिम्बिर ,तेल ४ चमचे ,पाणी कृती: सर्व प्रथम कांदे ,सुके खोबरे खरपूस भाजून घ्या ,mixar मध्ये कांदे -खोबरे ,आले लसुन जिरे ,मीठ ,कोथिम्बिर ,हळद ,लाल तिखट,गरम मसाला घालून पाणी घालून बारीक वाटून घ्या ..त्यापैकी ३/4 तयार मसाला कढाई मध्ये तेल घालून त्यात टाका .. masala आणि पाणी न टाकता तेलात शिजू द्या .. खालील फोटोत दिसत असल्याप्रमाणे तेल सुटू लागल्यावर त्यात थोडे पाणी घाला . 2 3 पाणी टाकल्यावर त्याला ७ ते १० मी.उकळू द्या .... चांगली उकळी आल्यावर आच बंद करून त्यात कोथिम्बिर कापून टाका. 4 वरील फोटो तयार भाजी चा आहे .मी माझ्यापुरता भाजी काढून घेऊन त्यात उकलेले अंडे घालून पुन्हा १-२ उकळ्या येऊ दिल्या ..अंडाकरी तय्यार ... 5 आणि माझ्यासाठी साधी पिवळी शेव ताटात घालून त्यावर तयार रस्सा टाकला ..या भाजीत शेव उकळायचे नसतात ते वरतून टाकावेत ... 6 दुसऱ्या दिवशी त्याचेच मस्त भरली वांगी करायचे ठरवले .. त्यासाठी ३ वांगी घेतली ,उरलेला अर्धी वाटी मसाला ,त्यात ३ चमचे शेंगदाण्याचे कुट घातले ,मीठ थोडेसे कारण वाटणात घातलेले होते .टोमाटो चिरून ठेवला वांग्यांना चीर देऊन त्यात मसाला भरला आणि कुकर मध्ये ३ चमचे तेल घातले ,ते गरम झाल्यावर त्यात वांगी आणि उरलेला मसाला टाकला त्यात १ टोमाटो कापून टाकला .१ कप पाणी घालून १ शिटी होऊ दिली .आणि मस्त भरली वांगी तयार ... 7
वाचने 57392
प्रतिक्रिया 110

प्रतिक्रिया

मोक्षदा रविवार, 02/03/2014
खरच भाजी बघून गावची आठवण झाली आम्हाला आमच्या गावी खानदेशात तुम्ही पोहचवले मे महिना प्रचंड उन्हाळा त्यात अशा जंग्या पार्ट्याचि मज्जा घरात शेव आणून ठेवालीच आहे मुहूर्त काही सपड त नव्हता आत्ता करतेच लवकर कृती बद्दल परत धन्यवाद , मुंबईत आमच्या गावासारखी म्हणजे एदलाबाद (सध्याचे मुक्ताईनगर) शेव मिळत नाही माहीत असल्यास कळवावे

आरोही रविवार, 02/03/2014
मोक्षदा , खरेच ग आपल्या गावासारखी (turkhati शेव) येथे मिळत नाहीत ग पण मी आपले साधे त्याच आकाराचे पिवळे शेव घेतले आहेत ..

मधुरा देशपांडे सोमवार, 03/03/2014
पाकृ आवडली. मी थोडी वेगळ्या पद्धतीने करते. आता अशी करून बघेन. कडक शेवेसाठी हल्दीरामचा एक प्रकार मिळतो. त्यातल्या त्यात शेवभाजीच्या शेवेच्या जवळपास जाणारी चव आहे. इकडे मी तीच वापरते.

किसन शिंदे रविवार, 02/03/2014
मला तर सगळे फोटो दिसतायत. तुमचे फोटो पिकासावर अपलोड करून त्याची युआरएल इथे टाका, सगळ्यांना दिसतील ते फोटो.

किसन शिंदे रविवार, 02/03/2014
भाजीचा रस्सा बनवून वर नुसती शेव टाकलेली भाजी खाण्यापेक्षा त्या भाजी उकळतानाच खाली उतरवण्याआधी रश्श्यातच शेव टाकून ती थोडीशी उकळली की मस्त लागते शेवभाजी. शेवेचा पार लगदा होऊ नये म्हणून रश्श्याचं प्रमाण शेवेच्या थोडंस कमी ठेवावं. एक नंबर शेवभाजी तय्यार होते.

आरोही रविवार, 02/03/2014
माझ्या मते शेव जर कडक असतील तर तुम्ही म्हणत आहात तसे केले तर चालते पण येथे ती शेव फारशी मिळत नाहीत म्हणून मी असे केले आहे आणि हि शेव फारच नरम असतात लगेच त्याचा लगदा होतो हा माझा अनुभव आहे ..

कच्ची कैरी रविवार, 02/03/2014
खानदेशी जेवण म्हणजे माझा जीव कि प्राण !!!!

खान्देशी रविवार, 02/03/2014
राजस्थानी मिठाई वाल्याकडे रतलामी शेव मिळते ……बेत जमतो ….

मुक्त विहारि रविवार, 02/03/2014
तुम्ही खान्देशच्या, म्हणजे भुलाबाईची गाणी येतच असतील. आमचे आणि जळगांवचे संबंध संपलेच आहेत. पण खान्देश म्हटले की हिरवी भरताची वांगी,पेरू आणि भुलाबाईची गाणी आठ्वतातच.

आरोही सोमवार, 03/03/2014
मु वि काका , भुलाबाई एक दोन ची गाणी येतात आता ..खरच भुलाबाई च्या आठवणीने मन हळवे झाले ..भुलाबाई येणे म्हणजे एक सोहळा असायचा आमच्यासाठी ,किती मजा केलीये त्या वेळी .... आणि खानदेशी वांग्याचे भरीत जो एकदा खाईल तो दुसरे कुठलेच भरीत खाणार नाही असे माझे मत आहे ...मी बघेन येथे मला कुठे खानदेशी वांगी मिळाली तर मिपाकरांना नक्की पाककृती देईन ...+)

मुक्त विहारि सोमवार, 03/03/2014
भुलाबाई येणे म्हणजे एक सोहळा असायचा आमच्यासाठी ,किती मजा केलीये त्या वेळी .... प्रचंड सहमत. जमल्यास भुलाबाईची गाणी पाठवाल का?

निनाद मुक्काम … मंगळवार, 04/03/2014
आमचे पणजोबा रेल्वेतई नोकरी निमित्त पुण्यात आले तरी खानदेशातील आपली शेती ,गाव , भावंडे ह्यामुळे तेथे जाणे चालूच ठेवले. आजोबांनी सुद्धा हाच कित्ता गिरवला. माझ्या वडिलांच्या आईचा व त्यांचा जन्म जळगावचा त्यामुळे आजही बाबांचे मामा व मावस भाऊ तेथे राहतात. व ५ वर्षातून किमान एकदा तेथे आमचे जाणे होते. घरी खाण्यात आईमुळे वैधर्भीय तर आज्जी मुळे खानदेशी आहार जेवणात लहानपणापासून खात आलो आहे. तिखट शेवेची भाजी व पांढऱ्या वांग्यांचे तिखट भरीत म्हणजे पर्वणीच

समीरसूर मंगळवार, 04/03/2014
खान्देशी भरताची सर जगात कुठल्याच दुसर्‍या भरताला नाही. आणि त्या बेचव पंजाबी बैंगन भर्त्याला तर अजिबात नाही. काय असतं ते खान्देशी भरीत...वा वा...कांद्याची पात, भाजले गेलेले खोबर्‍याचे तुकडे, मधूनच लागणारे खमंग शेंगदाणे, झणझणीत हिरवी मिरची...तोंडी लावण्यासाठी टोमॅटोची कोशिंबीर आणि गरमागरम पुर्‍या...शेतात रंगणार्‍या भरीत पार्ट्या, झाडाखाली टाकलेली सतरंजी आणि झाडाच्या सावलीत, तुडुंब भरलेल्या पोटामुळे डोळ्यात येणारी सुखद डुलकी....ये मजा और कहां???? आणि डाळगंडोरी??? अमृतही फीके वाटावे अशी ही आंबटचुका आणि हिरव्या मिरच्यांची भाजी...भाकरी कुस्करावी आणि भरपूर डाळगंडोरी घेऊन ओरपावी.. नंतर एक-दोन वाट्या घटाघटा प्यावी आणि मग खुशाल झोपावे...मुवि म्हणतात ते खरे आहे, सगळीच सुखे महाग नसतात; In fact, best and long-lasting joys of life are always waiting for us and cost just a few awake and informed moments; sad part is we keep waiting for some other ephemeral joys that often cost us a fortune. हेच खरे वाटते कधी-कधी. :-) परवा मूर्सव्हीलमध्ये एका खान्देशी (पण आता पूर्ण अमेरिकन) असलेल्या कुटुंबाकडे जेवायला बोलावले होते. त्यांच्या मोठ्या घरात शिरल्यावर एकदम शेवभाजीचा घमघमाट नाकात शिरला. गावाकडे शेतात गेल्यासारखे वाटले. अतिशय सुंदर शेवभाजी केली होती त्यांनी. हातचे न राखता भरपेट जेवलो; त्यांना पण मीच आग्रह करत होतो. "अहो घ्या हो; काही होत नाही; आपण खान्देशी आहोत; इतक्या लाल-हिरव्या मिरच्या पचवणारे आपण, आपल्याला काय होणार आहे? घ्या घ्या, थोडी भाजी घ्या..." असं म्हणून मीच होस्ट कपलला आग्रह करत होतो. मग बायकोने आपण त्यांच्या घरी जेवायला आलो आहोत याची हलकेच आठवण करून दिली. मग मी शांत झालो आणि फक्त माझ्या जेवणावर लक्ष केंद्रित केले...पंधरा मिनिटांनी त्याच्या शेवभाजीचे मोठ्ठे बैगुने (पातेलं) पूर्णपणे रिकामे झाले आहे याची खात्री करून घेतली आणि मग भात-पोळीची रसद थांबवण्याची विनंती केली. सुरेख जेवण! पोळ्या, शेवभाजी, साधा भात, कांदा, लिंबू, आणि रिकोटा (बरोबर आहे का हा शब्द?) चीझ केक...देव त्यांचं भलं करेल... आणि खान्देशी दाळ-बट्टीची महती काय वर्णावी? मोठ्ठ्या मोठ्ठ्या निखार्‍यांमध्ये भाजलेल्या फर्मास बट्ट्या, साधे वरण, आणि वांग्याची किंवा गंगाफळाची खान्देशी पद्धतीची जबराट भाजी...मोठ्या मोठ्या तपस्व्यांना किंवा ऋषी-मुनींना शेकडो वर्षे तपश्चर्या करून जो मोक्षानंद मिळत नसावा तो आनंद या जेवणानंतर मिळतो. माझा असा अनुभव आहे की असे साधे पण थोडे झणझणीत जेवण जेवल्यानंतर डोक्यातले निराशाजनक विचार किंवा अवास्तव चिंता हद्दपार होतात आणि झटकन चांगले उपाय देखील सुचतात. मनःशांती मिळते. खरे खोटे माहित नाही पण माझा असा थोडाफार अनुभव आहे. काही केमिकल लोच्या आहे की मानसिक आहे हे माहित नाही. फौजदारी डाळ हा असाच झणझणीत प्रकार. सगळ्या डाळींचे एकत्र वरण म्हणजे फौजदारी डाळ. ठेचा (हिरव्या मिरच्या, लसूण, कोथिंबीर) आणि गरमागरम कळण्याची भाकरी...पुढचे बोलवत नाही...(आवंढा गिळला गप्पकन). तर असे हे खान्देशी जेवण! एकमेवाद्वितीय! :-) एकदा ट्राय कराच. - अस्सल खान्देशी समीर

स्पंदना बुधवार, 05/03/2014
समीरसूर! पक्के खवय्ये आहात. अश्या माणसाला करुन घालायला काहीही कष्ट वाटत नाहीत. यु आर इन्व्हायटेड सर.

समीरसूर बुधवार, 05/03/2014
आमंत्रणाबद्दल धन्यवाद! :-) आपण मनापासून आमंत्रण दिलेत हीच खरी मेजवानी! :-) शेवटी चव फक्त पदार्थांनाच असते असे नाही; पदार्थांभोवती असणारे सुवास, सदिच्छा, आपलेपणा, आणि प्रांजळपणा यांच्या आणि पदार्थांच्या चवीचा मिलाफ म्हणजे खरी चव! :-) खरी भूक लागली असता जो फक्त शिळी भाकरी आणि फोडलेला कांदा देखील आनंदाने खाऊ शकतो तो खरा खवैय्या!

आरोही बुधवार, 05/03/2014
धन्यवाद समीर , मला खरेच माहित नव्हते येथे एवढे खानदेशी लोक आहेत ते ... ...आणि तुम्ही खरेच खवैइये आहात हे पटले ...खानदेशी पदार्थ एवढे लोकप्रिय असतील याची कल्पना नव्हती ...आणि खानदेशी दाल बट्टी बद्दल तर माझ्याकडे काही शब्दच वर्णन करायला नाहीयेत ती फक्त खाण्यासाठी असते ... लवकरच अजून काही अस्सल खानदेशी पदार्थ येथे देण्याचा प्रयत्न करेन ......+)

बहुगुणी बुधवार, 02/04/2014
यजमानांनाच आग्रह करत खायला घालण्याचं तुमचं वर्णनही लाजवाब! (दाल-बाटी आणि पंचमेल दाल हे राजस्थानी पदार्थ म्हणून माहीत होते, त्यांना खानदेशी झटकाही आहे हे नवीनच कळलं, माहितीबद्दल धन्यवाद!)

सचिन कुलकर्णी रविवार, 02/03/2014
वाचनखूण साठविली गेली आहे.

पैसा रविवार, 02/03/2014
पाकृ, फोटो सगळेच मस्त!

मूनशाईन सोमवार, 03/03/2014
तोंडाला पाणी सुटले. सावद्याचे धनजी शेठ यांच्याकडच्या शेवगाठी पाठवून देते.

आरोही सोमवार, 03/03/2014
मूनशाइन , लवकर पाठवा वाट बघतेय ...नाहीतर असे करा न शेव घेऊन या मी रस्सा बनवून ठेवते ...मग पुढे काय ते सांगायलाच नको ...+)

मिनेश सोमवार, 28/11/2016
सावदा नाही हो. फैजपुर ला आहे त्यान्चे दुकान.

मुक्त विहारि सोमवार, 03/03/2014
ही खानदेशी पा.क्रु. दिल्याबद्दल आमच्या सारख्या खवय्यांकडून तुमचे आभार. अशाच अनवट पाक्रु अजून पण येवू द्या.

गणपा सोमवार, 03/03/2014
भिषोण सुंदर !!! आहाहा काय तो रंग्,तवंग. बघुनच टोंडाला पुर आलाय. :)

सानिकास्वप्निल सोमवार, 03/03/2014
काय मस्तं झणझणीत पाकृ आहे सगळ्या :) शेवभाजी कधी खाल्ली नाही पण कधीतरी नक्की ट्राय करेन. सगळ्या पाकृ बघून तोंपासू

जोशी 'ले' सोमवार, 03/03/2014
मस्त...महिन्यात दोन वेळा तरि शेवभाजीचा बेत असतोच घरी :-) तुरकाठी शेव ऎवजी भावनगरी शेव चांगली लागते शेवभाजीत

शिद सोमवार, 03/03/2014
जबरा दिसताहेत सगळ्या पाकृ... एकदम टेम्टिंग... तोंपासु. बाकी शेवभाजी हा प्रकार नविन दिसतो आहे... ट्राय करायला हवा एकदा.

अत्रुप्त आत्मा सोमवार, 03/03/2014
१५ दिवसांपूर्वी सांगवीमधे एक खानदेशी हाटेल मिळाले.अगदी अस्सल आहे. शेवभाजी आणि भाकर्‍यांचे एक/दोन जबर्‍या प्रकार खाल्ले! आज या धाग्यामुळे पुन्हा जावे लागणारसे वाटते! फोटू अफाट काढले आहेत!

आरोही सोमवार, 03/03/2014
पुण्यात हॉटेल खानदेश junction म्हणून आहे कुठे ते नित सांगता येणार नाही पण तेथे अस्सल खानदेशी चवीचे जेवण मिळते ..मला हि एकदा यायचे आहे तेथे .....+)

मुक्त विहारि सोमवार, 03/03/2014
https://www.google.co.in/maps/place/Hotel+Khandesh+Junction/@18.514538,… आता बघा, पुणेकरांना पण डोंबिवलीकरांची मदत लागायला लागली. आम्ही उगाच नाही म्हणत की, डोंबिवली हेच मध्यवर्ती ठिकाण आहे.

मनुराणी बुधवार, 02/04/2014
डोंबिवली मध्ये पश्चिमेला क्रांती स्टोअर्स च्या डाव्या बाजूला एक पोळी भाजी केंद्र आहे. तिकडे खान्देशी पद्धतीच्या भाज्या भेटतात. शेव भाजी असते बऱ्याचदा. आमच्याकडे पण हे सगळे घरीच बनत असल्याने कधी आणली नाही पण चांगली असते असे ऐकून आहे.

जोशी 'ले' सोमवार, 03/03/2014
खानदेशी कळन्याची भाकरी खाल्लीत का बुवा? मस्तच लागते.. शिळी असेल तर ठेचा भाकरी अन् कांदा ...येकदम ट्टाॅक्क :-)

भ ट क्या खे ड वा ला सोमवार, 03/03/2014
ती वांगी म्हणजे जणु एक पायाची कोंबडी वाटली. जाड पांढरी वांगी म्हणजे खानदेशी वांगी का ? डोंबिवलीत बरेच वेळा मिळतात आणि भरीत (कांद्यासह अथवा दह्याचे दोन्ही उत्तम होतात)

मुक्त विहारि सोमवार, 03/03/2014
होय. हिरवट-जांभळी असतात. बादवे, आपल्या डोंबिवलीत खानदेशी हॉटेल आहे.उद्याच जावून जरा पदार्थ टेस्ट करतो. जमल्यास एखादा कट्टा इथे पण करू.

मनुराणी बुधवार, 02/04/2014
डोंबिवली मध्ये खास जळगाव, भुसावळ कडून भाज्या (भरताची वांगी, पोकळ्याची भाजी आणि बऱ्याच भाज्या) विकायला येतात. बुधवारी का शुक्रवारी पश्चिमेला मच्छी मार्केट रोडवर असतात.

गणपा मंगळवार, 04/03/2014
मिशन सस्केसफुल. किंचीत केलेला बदल म्हणजे मसाला परतुन झाल्यावर टॉमेटो अ‍ॅडवले आणि ते शिजल्यावर पाणी टाकुन उकळी आणली. सोबतीला बाजरीची धिरडी केलीत. या जेवायला.

आयुर्हित बुधवार, 05/03/2014
जबरीच फोटो आहेत हो.व्वा क्या बेत है! बाजरीची धिरडी ची कल्पना मनापासून आवडली. धन्यवाद. कृती पाठवा आता लवकर.

सखी मंगळवार, 04/03/2014
वाचुनच पाणी सुटले. मी शाळेत असताना माझी मैत्रिण असा मसाला वाटायची तेव्हा अगदी पाटा+वरवंटा होता फार मस्त लागायचे ते वाटण, गरम किंवा शिळ्या भाकरीबरोबर, सोबत कांदा, लसणीची कोरडी चटणी असेल तर अहाहा - स्वर्ग स्वर्ग म्हणतात तो हाच असावा!! अद्वेय---मला एकही फोटो नाही दिसत (बरचं आहे म्हणा...अजुन जळजळ झाली असती). गणपाभाऊंचे दिसले.

अनन्त अवधुत मंगळवार, 04/03/2014
मनासारखी शेव काही मिळत नाही त्यामुळे पर्याय म्हणून भावनगरी शेव वापरतो. आता शेवभाजीची आठवण काढलीच आहे तर मिरच्याच्या भाजीची (भजी नाही भाजी) पण पाकृ येऊ द्यात. झक्कास पाकृ दिल्याबद्दल धन्यवाद.

त्रिवेणी मंगळवार, 04/03/2014
@ अनन्त अवधुत तुम्हाला मिरचीची पातळ हिरव्या रंगाची भाजी ह्वी आहे का?

अनन्त अवधुत बुधवार, 05/03/2014
मला ती भाजी ओरपता येते पण बनवता येत नाही. ते काम आईचे.

आरोही बुधवार, 05/03/2014
माफ करा पण मला अजून तुम्ही कोणत्या भाजीबद्दल बोलत आहात ते कळले नाही ..तुम्ही जर शेंगदाण्याचे आणि हिरव्या मिरचीचे वाटण लावून केलेल्या मेथी वैगेरे अशा पातळ भाजी बद्दल बोलत असाल तर तसे सांगावे मी नक्की यथे देण्याचा प्रयत्न करेन .....+)

अनन्त अवधुत बुधवार, 02/04/2014
त्याला जळगावला बहुधा डाळगंडोरी म्हणतात. आम्ही मलकापूर - खामगाव कडे मिरच्यांची भाजी म्हणतो. खर्‍याखुर्‍या तिखट हिरव्या मिरच्यांचे आंबटचुका घालून केलेले वरण.अर्थात आंबटचुक्यासोबत त्यात बाकी मसाला (शेंगदाणे , खोबरे, ई. ) पण असतो.

मनुराणी बुधवार, 02/04/2014
आमच्याकडे म्हणजे जळगाव, भुसावळकडे या भाजीला डायगंडोरीची भाजी म्हणतात. आणि माझ्या माम्या इतकी चविष्ट बनवतात कि कितीही खाल्ली तर मन भरत नाही. बाकी तिकडचा बोंडे मसाला पण खूप प्रसिद्ध आहे. यावेळी आणला आहे पण अजून वापरला नाही.

इरसाल मंगळवार, 04/03/2014
इथे कोणी आहे का खान्देशी ? ;)

आयुर्हित बुधवार, 05/03/2014
मन वढाय वढाय, उभ्या पिकातले ढोर सारखीच आमची गत झाली बघा. जबरदस्त फोटो व पाकृ आहे. उद्याच करून पाहतो मी. आणि हो एकदा खानदेशी वन भोजनाचा कट्टा करायला हवाच!

प्रमोद देर्देकर बुधवार, 05/03/2014
अरे रे सकाळी सकाळी असा अत्याचार ना. फटू जबराट आले आहेत. आम्ही कधी खानदेशी जेवण जेवलेलो नाहिये म्हणुन ही पा.कृ. पाहुन तों.पा.सु. एकदा ही भरली वांगी खावुन बघितली पाहिजेत.

सुहास.. शनिवार, 08/03/2014
खल्लास !! आवडेश .. तेव्हढ चक्रीफुल अंमळ वाटुन घालायला विसरलास वाटत ;)

आनंदी गोपाळ शनिवार, 08/03/2014
हात तुम्हनी तं तुम्हले मरीमाय खायजो, बाट्टोडहो! आठे शेवभाजी आन अंडानं बट्टं अन भरीत - कयान्यानी भाकरन्या बाता करी र्‍हायनात आन एकले बी अहिरानीमा लिखानी याद नही उनी? असा कसा खान्देशी शेतस तुम्ही लोके?

आरोही रविवार, 09/03/2014
'व तुले मरीमाय खायजो 'हे माझीचे नेहमीचे वाक्य असायचे ,मला हि भाषा बोलत येत नाही पण समजते खरेच खूप गोड असते हि भाषा मस्त वाटते ऐकायला ...+)

प्यारे१ रविवार, 09/03/2014
धुळे, मालेगाव ना? लई गोड वाट्टे ही भाषा कानाला. समजत फार नाही काही पण दोन तीन मित्रांच्या तोंडी ऐकलीये. भारीच्च्च! तो खानदेशी मसाला बघून 'गार' झाल्या गेले आहे.

भाते रविवार, 09/03/2014
बोंबललो ना मी आता! झोपायच्या आधी शेवटची पाकृ म्हणुन वाचायला घेतली आणि पाकृ वाचुन संपेपर्यंत पुन्हा भुक लागली ना मला! काय करू मी आता? :( पुढल्या विकांताला नक्की करून बघावी लागेल हि अंडाकरी. धन्यवाद अद्वेय. अप्रतिम पाकृ.