दिवाळी म्हटली कि फराळाची तयारी अगोदर पासूनच सुरु होते. भाजाणीच्या पिठापासून ते अनारशाच्या पिठापर्यंत. माझी आई अनारशाचे पिठ घरीच तयार करत असे. तिची रेसिपे इथे देत आहे. साहित्यः १ किलो जाडा, जुना तांदुळ १ किलो पिवळा गुळ कोल्हापुरी वेलदोडा, जायफळ पावडर २ टे.स्पून साजुक तूप पाव किलो खसखस कृती: १. तांदुळ स्वच्छ धुवून पाण्यात ३ दिवस भिजवून ठेवावेत, पाणी दररोज बदलावे. २.पाणी निथळून, कॉटनच्या कापडावर सावलीत वाळत टाकावेत. दमट असतानाच मिक्सवर किंवा खलबत्त्यात कुटावेत. चाळणीने पिठ चाळावे. ३.गुळ किसणीने किसावा किंवा बारीक करावा. वरील चाळलेल्या पिठात मिसळावा. साजुक तुपाचे मोहन घालून वेलदोडे, जायफळची पावडर घालून हलकेच मळून ठेवावे. पीठ डब्यात ७ ते ८ दिवस ठेवावे. स्टीलच्या डब्यात ठेऊ नये पीठ काळे पडते. अल्युमिनिअम च्या किंवा कल्हई केलेल्या पितळेच्याभांड्यात ठेवावे. ४.जेवढे अनारसे करायचे आहेत, तेवढे पीठ घेऊन मळावे व त्याचे पेढ्याएवढे चपटे गोळे करावेत. ५.पोळपाटावर प्लॅस्टीलची पिशवी घेऊन त्यावर खसखस टाकावी. पिठाचा वरील एक गोळा घेऊन बोटाने हलकेच दाब देऊन अनारसा खसखशीवर फिरवर गोल थापावा. ६.कढईमधे तूप गरम करावे. आच मध्यम करून हलक्या हाताने थापलेला अनारसा उचलून खसखशीची बाजू वर येइल असा कढईत टाकावा. ७.झार्‍याने त्यावर तूप घालत अनारसा मंद आचेवर तळावा. अनारसा उलटवू नये. सोनेरी रंगावर तळावा. ८.अनारसा तळल्यावर ,तूप निथळण्यासाठी चाळणीमधे उभा ठेवावा. म्हणजे सर्व तूप निथळेल. अशा रीतीने उरलेले अनारसे करावेत. ९.निथळून पुर्ण गार झाल्यावर हवाबंद डब्यात भरावेत, किंवा खाऊन संपवावेत. टीपः अनारसे करताना पिठ कोरडे वाटल्यास तुपाच्या हाताने मळूनच मऊ करावे. अनारसा फार पातळ थापू नये. कडकडीत होतो. फार जाड पण थापू नये मधे कच्चा राहतो.