माझ्या बहिणीच्या आवडीची डाएट पाकृ

काल गेले होते हॉटेल पर्णकुटीला. सोबत बहिणी अन भाचरांची ग्यांग. एकजात सगळे अट्टल मटनखाऊ. पण बहिण म्हणाली 'मी डाएटवर. !' ‘मग बटाट्याची भाजी सांगू ?’ मला जोडी मिळाली म्हणून मी खुश. ‘हुं ?’ बहिणाबाईने हे कुठलं वडगाव बुद्रुक पेश्शल अशा काहीशा नजरेनं माझ्याकडे कटाक्ष टाकला. ‘मी बाई फीssश खाणार ! त्यात कोलेस्टेरोल नसते ना ?’ बहिण. मी गार. ‘अगं कोलेस्टेरॉल मासा किंवा बकऱ्यात थोडीच असते ? ते आपल्या रक्तात असते.’ ‘होय, होय माहितेय बरं, विदुषीबै ! तुमी खा बटाट्याची भाजी !’ यावर मी उठून तरातरा पर्णकुटीच्या शेफकडे गेले, जो माझा मावसभाऊ आहे. अन तिथली तयारी बघून जे डायरेक्ट फोटू घ्यायला लागले, ते फीssश फ्राय प्लेटीत विराजमान झाल्यावरच थांबले. म्हणजे आधी शेफसाहेबांनी आलेलसूण पेस्ट, दोन चमचे तिखट, दोन चिमटी मीठ अन धणेजिरे पूड हे सगळं कोकमच्या आगळमध्ये कालवून त्या फीशच्या पाकळ्या मस्त मॅरीनेट करून ठेवलेल्या. मग रवा अन ज्वारीचे पीठ एका ताटात घेऊन त्यात खालवर घोळून घेतले. इकडे तेल पॅनमध्ये तापत ठेवले होते, त्यात फीश पाकळ्या सुमारे दहा मिनिटे दोन्ही बाजूंनी सोनेरी रंगावर तळून काढल्या. झाले फीश फ्राय तयार ! आहे ना झटपट डायेट पाकृ ? चला , मटणखाऊ लोक्सहो, डायेट कार्याला सुरुवात करा पाहू ?