लेख, प्रतिसाद नि अवांतर.

बर्‍याच दिवसापासून पडलेला प्रश्न. हल्लीच नाही तर खूप आधीपासूनच मिसळपाववर अवांतर खूप खूप सुरु अस्तं. कधी विषयाला अनुसरुन, कधी अगदीच्च अवांतर. अनेकदा चर्चा देखील झाल्या असाव्यात. मला नक्की आठवत नाही. लेखन सकस असेल तर त्याला किती प्रतिसाद आले वगैरे गौण ठरतं. एकही प्रतिसाद न मिळता अथवा फार कमी प्रतिसाद मिळणारा एखादा लेख भिडणारा असू शकतो. कारण ते इतकं आतवर भिडलं जातं की त्यावर काय बोलायचं ते समजत नाही. तेव्हा खरंच मौन हाच खरा प्रतिसाद असतो. तर शेकड्यानं प्रतिसाद मिळून देखील एखादा लेख आपल्याला काय 'देतो' हे ठरवणं कठिण! आता कुठल्या लेखनाला सकस म्हणायचं ह्या बाबतच शंका असेल तर त्याला मात्र सलाम आहे आपला. प्रतिसादांचं शतक व्हावं म्हणून स्वतःच स्वत:च्या दर्जेदार धाग्यावर उगाच्च राळ उडवून का घ्यावी / का घ्यावी हा देखील मला पडलेला प्रश्न आहे. ह्यातून आज मजा वाटत असली तरी त्यातून मिळणारं आऊटपुट काय दर्जाचं असेल ह्याबाबत शंकाच वाटते आहे. माझ्या मते लेखन हे मला गणपतीच्या मूर्तीसारखं वाटतं. नि प्रतिसाद म्हणजे आरास. कुठलंही लेखन हे लेखन म्हणून केंद्रस्थानी असावं. त्या अनुषंगानं येणारे प्रतिसाद, प्रतिक्रिया, सुधारणा, सुचवण्या हे आराशीसारखे असावेत. कधी सुसंगत रंगसंगती देखील खुलते, कधी विसंगती देखील भावते. पण म्हणून उगाचच मोजक्या फुलां-दुर्वां ऐवजी फुलांचे नि गवताचे भारेच्या भारे गणपतीला झाकत असतील तर काय उपयोग? बर्‍याचदा लेख बाजूला पडून प्रतिसादच एवढे मोठे (म्हणजे निव्वळ आकारानं नाही) त्याउप्पर विसंगत असतात की लेख झाकोळला जातो. अशा वेळी थोडी समंजस बाजू घेऊन नवा लेख लिहीला जाणं जास्त श्रेयस्कर ठरेल का? नव्या लेखाची सुरुवात कशी झाली ह्याबद्दल थोडी पार्श्वभूमी देता येऊ शकेल. ह्यामध्ये प्रतिसादा द्वारे अधिक नेटकी, व्यवस्थित माहीती मिळू शकेल. (उदाहरणादाखल कोकण ट्रीपचा गविंचा प्रतिसाद) आपल्याला काय वाटतं? चर्चा झालेली असेल तर का कू उडवला तरी चालेल. (सदरहू काथ्याकूट हा लेखकाला स्वतःला देखील तंतोतंत लागू पडतो.)