केशर -पिस्ता साँदेश / संदेश मोदक खास बाप्पासाठी

गणेशोत्सवाच्या हार्दिक शुभेच्छा सर्व मिपाकरांना :) साहित्यः एक लिटर फुल फॅट दुध ३-४ टेस्पून पिठीसाखर (आवडीप्रमाणे कमी - जास्तं) २ टेस्पून लिंबाचा रस १/४ टीस्पून केशर १/४ टीस्पून वेलचीपूड १/२ टीस्पून पिस्त्याचे काप बर्फाचे तुकडे पाकृ: मध्यम आचेवर कढईत दूध तापवायला ठेवावे. दूधाला उकळी आली की त्यात लिंबाचा रस थोडा-थोडा करून घालावा व सतत ढवळावे. दूध फाटायला / नासायला लागून त्याचे पाणी (व्हे) वेगळे होऊ लागेल. त्यात बर्फाचे तुकडे घालून गॅस बंद करावा व बर्फ पूर्ण वितळेपर्यंत ढवळत रहावे. चाळणीत स्वच्छ कापड ठेवून त्यात तयार केले पनीर गाळून घ्यावे. कापडाची पोटली तयार करून शक्य तेवढे पाणी पिळून काढून टाकावे. थंड पाण्याच्या नळाखाली पोटली धुवावी म्हणजे लिंबाचा वास जाईल. १ तास पोटली टांगून ठेवावी. एका तासानंतर पनीरला एका ताटात काढून, केशर घालून चांगले ४-५ मिनिटे मळावे. पनीर अगदी मऊसूत झाले पाहीजे. त्यात पिठीसाखर घालून एकत्र करावे. मंद आचेवर नॉन-स्टीक पॅनमध्ये पनीरचे मिश्रण ४-५ मिनिटे परतून घ्यावे. (ह्याला नोरोम पाक म्हणतात) मिश्रण पॅन सोडू लागले कि ताटात काढून , गरम असतानाच मळावे. (हाताची काळजी घेणे) मिश्रणात वेलचीपूड घालावी, थोडे पिस्ते ही घालावे व पुन्हा थोडे मळावे. मी मोदक बनवण्यासाठी पेढे मोदकांचा साचा वापरलाय तसेच बंगाली लोकं साँदेश मिठीई बनवण्यासाठी टेराकोटा किंवा दगडी साचा वापरतात, तो ही वापरलाय. साच्याला तुपाचा हात फिरवून, मिश्रण कोमट असताना साच्यात घालून मोदक तयार करुन घेणे. पिस्त्याचे काप लावून सजवावे व बाप्पाला नैवेद्य दाखवून खावे :) टीपः पनीर + साखरेचे मिश्रण फार वेळ परतायचे नाही , परतले गेले तर तर साँदेश चिवट व कडक होतात. अशा प्रकाराला कोरा पाक साँदेश असे म्हणतात. पनीर + साखरेचे मिश्रण न परतता सर्व्ह केले तर कांचागोला साँदेश असे म्हणतात. साखरेऐवजी खेजुर गुर (खजुराचा गुळ / साधा गुळ) वापरुन साँदेश बनवता येतं. साचा नसेल तर गोळे बनवून ही साँदेश सर्व्ह करता येतील.