नमस्कार मंडळी, कामानिमित्ताने कुठे कुठे फिरणं होत असतं हे तुम्हाला माहिती आहेच, असाच उडतउडत इकडे मस्कतमधे आठवडाभर येउन पडलो, एक दिवस इकडे जरा स्थिरस्थावर होण्यात गेला, मग नेहेमीप्रमाणे इथे पहायला काय आहे, फिरायला काही आहे का वगैरे शोध चालू झाला, फेसबूकावर ज्योतीतैशी गप्पा मारता मारता, तिने सांगीतले आपले मिपाकर प्रभाकर पेठकरकाका तिकडेच असतात, जमलं तर भेट. बघुया जमलं तर असा विचार करून त्यांना खरड केली नंबर कळवा म्हणून, आणि विसरून गेलो, एक दोन दिवस काही उत्तर नाही, आज सकाळी सकाळी ज्योतै म्हणाली पेठकर काकांचा आज वाढदिवस आहे, नक्की भेटच, तिनेच त्यांचा मस्कतचा नंबर पण दिला, आज सकाळी त्यांना फोन केला त्यांनी पत्ता समजावून सांगीतला.. आज नक्की जायचंच, कितीही अंतर असेल तरी, असं ठरवून, संध्याकाळी प्रवचन लवकर संपवलं, हॉटेलवर येउन आवरून पत्ता शोधत निघालो, आधी वाटलं टॅक्सी करूया, पण गूगल मॅपवर पत्ता अगदी जवळ दिसत होता, शेजारच्याच एका बेकरीतून छानसा केक घेतला, आणि शोधमोहिमेवर निघालो, मोजून तिसरी बिल्डींग सोडून चौथ्या बिल्डींगवर, मुंबई कॉर्नर अशी पाटी दिसली, 'अवचित उदंड सापडते' म्हणतात ते असे.. पेठकर काका बाहेर गेले होते पण, तिथला मेनू बघुनच "आनंद पोटात माझ्या माईना ग माईना"... हा बघा मेनू.. पहिली ऑर्डर अर्थातच 'मिसळपाव'.. काहीही वर्णन करणार नाही, परत भूक लागेल.. सध्या हा फक्त फोटो बघा.. आणी हा माझा तृप्तात्मा.. मिसळपाव बरोबर कांदा लिंबू शेप्रेट मिळाल्याबरोबर मात्र अक्षरशः डोळे भरून आले... ते फक्त मिसळीच्या तिखटपणामुळेच होते असं नाही.. मिसळ संपतासंपतानाच, पेठकरकाका बाहेरून आले, आणि हॉटेलच्या बाहेर काही प्लॅस्टीकच्या पिशव्या पडलेल्या होत्या त्या उचलून कचरापेटीत टाकायला सुरूवात केली, मी मनोमन ह्या माणसाला नमस्कार केला, हा खरा हॉटेलचा मालक, दार उघडून आत यायच्या आधी, खाली वाकून कचरा काढत होता.. आम्ही श्रमप्रतिष्ठा नुसती बोलायची, काकांनी करून दाखवायची... आत येउन एक नजर फिरवून काका बाहेर जाउन बसले, आम्ही एकमेकांना पाहिलेलं नव्हतंच, मग मी बाहेर गेलो, ओळख करून घेतली.. माणूस काय मोकळेपणाने हसतो हो.. वाहवा.. मग हॉटेलबाहेर खुर्च्या मांडून मस्त अघळपघळ गप्पा झाल्या, वडीलधारं माणूस इतक्या मोकळेपणानं भेटल्यावर अगदी मनापासून आनंद होतो. कुठले बंध असतात कोण जाणे, गाठी पडतात एवढं खरं.. गप्पा अनंत विषयांवर झाल्या, काकांच्या हॉटेलचा व काकांचा मस्कत मधला प्रवास, पुण्यातलं घर, तत्वज्ञान, अध्यात्म - मिपावरचं आणी बाहेरचं. ;) मिसळीचा रस्सा, संस्कार, निसर्ग आणि बरंच काय काय... नंतर काकांच्याच हाटेलात त्यांचीच थाळी चमचा घेऊन केक कापण्याचा कार्यक्रम झाला, हा बघा.. नंतर मस्त मसाला चहा घेतला, आणि काकांचा निरोप घेउन निघालो... बाकी काहीही लिहीवत नाहिये परक्या देशात प्रेमानं चहा पाजणार्‍या प्रेमळ पेठकर काकांना वाढदिवसाच्या मनःपूर्वक शुभेच्छा... आणि ज्योतैचे विषेश आभार..