चक्काजाम

काल एका दूर चित्र वाहीनीवर एक गृहिणी कालाजाम नावाचा एक पदार्थ करून दाखवीत होत्या. त्यासाठी त्यांनी समप्रमाणात पनीर व खवा घेऊन त्यात पुरेसे कॉर्नचे पीठ मिसळून गोळे करून ते तुपात तळून घेतले होते व त्यानंतर त्यांना पाकात सोडले होते. गोळ्यांचा आकार गुलाबजाम पेक्षा मोठा व रंग अधिक तांबूस होता. आदले दिवशी म्हणजे तारीख २० रोजी बंध, हरताळ व चक्काजाम ची मोहीम सरकारविरोधी पक्षांनी राबविली होती. म्हणून एक विचार मनात आला की वर दिलेल्या पाक क्रियेत पनीरच्या जागी चक्का वापरला तर चक्काजाम नावाचा एक नवीन पदार्थ करता येईल. मी नेहमीच असे पदार्थ करावयास सांगतो (करतो असे नाही). तरी मिसळपाववर वेळोवेळी पाकक्रिया सादर करणार्या सदस्यांनी हा पदार्थ करून पाहण्यासारखा आहे कि नाही हे ठरवावे. लहानपणी राम गणेश गडकरी यांनी लिहिलेल्या रिकामपणाची कामगिरी या लेखात पाठीचे धिरडे , बर्फीची चटणी, अब्रूचे खोबरे या व तत्सम पदार्थांच्या पाककृती विषयी वाचल्याचे स्मरते. चक्काजाम तीतकाच काल्पनिक ठरणार नाही असे वाटते. रमेश आठवले