Skip to main content

भेंडी मसाला - Spicy Okra

लेखक मोहनराव यांनी रविवार, 01/07/2012 23:28 या दिवशी प्रकाशित केले.
नमस्कार मिपाकरहो, पाककृती दालनामध्ये आतापर्यंत पाककुशल मंडळींचे पदार्थ पाहुन वाहवा करण्यात धन्यता मानत होतो. कधीकधी पदार्थ पाहुन जळजळ व अत्याचारही सहन केला जायचा. आपणही काहितरी करावे व येथे सादर करावे असे वाटायचे पण योग जुळुन आला नव्हता, असो. तर हा आमचा पहिलावहिला प्रयत्न, गोड मानुन घ्यावा हि विनंती.
भेंडी मसाला - Spicy Okra
साहित्यः पाव किलो भेंडी १/२ टीस्पून जीरे अर्धा चमचा लसूण पेस्ट १/२ टीस्पून लाल मसाला (घरी बनवलेला) चिमुटभर हळद २ टीस्पून बेसन पीठ १/४ टीस्पून गरम मसाला १ टीस्पून लिंबाचा रस १ १/२ टीस्पून तळण्यासाठी तेल सजावटीसाठी लाल व पिवळी सिमला मिर्च मीठ चवीनुसार पाकृ: सगळ्यात आधी भेंडी स्वच्छ धुवून व पुसून घ्या. जर भेंडी नीट पुसुन घेतली नाही तर भाजी चिकट होईल. भेंडी मधुन कापुन घ्यावी. लाल व पिवळी सिमला मिर्च बारीक चिरुन घ्यावे. तेल तापवुन घ्यावे. तेल गरम झाल्यानंतर जिरे तळावे. नंतर भेंडी ५ ते ७ मिनीटे चांगली परतुन घ्यावी. त्यानंतर हळद, गरम मसाला व लाल मसाला, लसुन पेस्ट, चवीनुसार मीठ हे मिश्रण २ मिनीटे तळुन घ्यावे. नंतर यामधे बेसन पीठ मिक्स करुन परतुन घ्या. कापलेली सिमला मिर्च यामधे मिक्स करुन ही भाजी चांगली मंद आचेवर ५ मिनीटे शिजवुन घ्यावी. लिंबाचा रस यावरुन पिळावा व सादर करावे.
वाचने 10449
प्रतिक्रिया 19

प्रतिक्रिया

सूड रविवार, 01/07/2012 23:36
जिरं तळायचं ?? असो. भेंडीत डाळीचं पीठ पेरुन केलेली भाजी पहिल्यांदा बघतोय, एकदा करुन बघणेत येईल. अवांतरः शेवटल्या फोटोत ठेवलेली लिंबाची फोड आधी पिळून मग सजावटीसाठी ठेवलीये का ?

मोहनराव रविवार, 01/07/2012 23:44
भेंडीत डाळीचं पीठ पेरुन केलेली भाजी पहिल्यांदा बघतोय
हो करुन पहाच छान लागतं.
जिरं तळायचं ? लिंबाची फोड आधी पिळून मग सजावटीसाठी ठेवलीये का ?
पहिलावहिला प्रयत्न...यामधे खपवुन घ्या. ;)

प्रा.डॉ.दिलीप बिरुटे रविवार, 01/07/2012 23:51
मोहनराव, भेंडी मसाला छान दिसते आहे. करुन पाहीन. च्यायला, नुसत्या चकत्या-चकत्याची लिबलिबित भेंडी खाऊन भेंडी जवळ जवळ माझ्या चवदार आयुष्यातुन उतरली आहे. -दिलीप बिरुटे

कुंदन रविवार, 01/07/2012 23:56
गुरुजी , मि पा वर पा कृ वाचुन अधुन मधुन करुन बघत जा की. आमच्या तुलनेत तुम्हाला उन्हाळ्याची व दिवाळीची सुटी पण जास्त मिळते , ती जरा सत्कारणी लावल्यासारखे होईल. ;-)

प्रा.डॉ.दिलीप बिरुटे सोमवार, 02/07/2012 00:01
आमच्या तुलनेत तुम्हाला उन्हाळ्याची व दिवाळीची सुटी पण जास्त मिळते , ती जरा सत्कारणी लावल्यासारखे होईल. हम्म, आले का आमच्या सुट्ट्यावर. (आम्ही बोललो का कधी डॉलरचा भाव वाढतोय म्हणुन) -दिलीप बिरुटे

मोहनराव सोमवार, 02/07/2012 13:32
सूड, प्रा.डॉ.दिलीप बिरुटे, मुक्त विहारि , मराठमोळा, वल्ली, पियुशा, गणपा, सुहास झेले व निवेदिता-ताई सर्वांना धन्यवाद. :)

कपिलमुनी सोमवार, 02/07/2012 15:52
घरी आलास कि जेवायला येतो ;) ( बाकी वहिनींनी शिस्त चांगली लावली आहे )

चिंतामणी सोमवार, 02/07/2012 17:18
तु साहीत्य देताना म्हणलास की "सजावटीसाठी लाल व पिवळी सिमला मिर्च" आणि पाकृमधे म्हणतोस की "कापलेली सिमला मिर्च यामधे मिक्स करुन ही भाजी चांगली मंद आचेवर ५ मिनीटे शिजवुन घ्यावी. " म्हणजे नक्की काय करायचे? सजावट नाही होणार ही. शिजल्यावर ही सिमला मिर्च भेंडीपेक्षा जास्त लागेल. आणि तिचाच फ्लेवर येइल. मला वाटते की सिमला मिर्ची शिवायसुद्धा ही भेंडी चांगली लागेल.

मोहनराव सोमवार, 02/07/2012 17:47
हो पण फक्त सजावट म्हणुन मिक्स करता येत नाही ना त्यामुळे जराशी शिजवुन घ्यावी. सिमला मिर्चचा कुरकुरितपणा चांगला वाटतो फक्त मिळमिळीत भेंडीपेक्षा.

पैसा सोमवार, 02/07/2012 23:28
भाजीचा पहिला प्रयत्न चांगलाच जमला आहे. चिंतूकाका म्हणतायत तशी सिमला मिरची न घालता पण ही भाजी मस्त लागते. चांगली परतून घेऊन आणि डाळीच्या पिठामुळे भेंडी सुकी होतेच.