कात्रज ते सिंहगड - (K2S) - नाईट ट्रेक - कोणी इच्छूक आहे का..?

ट्रेकिंग ग्रूप मधल्या एका मित्राची NIM (Nehru Institute of Mountaineering) च्या बेसिक कोर्स साठी निवड झाल्याने त्याचा स्टॅमीना वाढवण्यासाठी आणि आम्ही सोबत म्हणून येते काही महिने दर शनिवारी (किंवा जसे जमेल तसे पण शनिवार नक्की) कात्रज ते सिंहगड ट्रेक करायचे ठरवत आहे. हा एक थकवणारा पण विलक्षण आनंद देणारा ट्रेक आहे. कात्रज जुन्या बोगद्यापासून निघाल्यानंतर एका दृष्टीक्षेपात दिसणारे झगझगीत पुणे... संपूर्ण वाटेदरम्यान खुणावणारा आणि हुलकावणी देणारा सिंहगडावरील टॉवरचा लाल दिवा... वाट दाखवणारा शीतल चंद्रप्रकाश... पौर्णीमेच्या रात्री मध्यानवेळेसारखी पडणारी आपली सावली... काळेभोर, निरभ्र आणि लुकलुकणार्‍या तार्‍यांनी भरलेले आकाश.. क्षणात चमकून लुप्त होणार्‍या उल्का.. दम लागल्यावर एखाद्या थंडगार कातळावर आडवे होवून फुललेला श्वास आणि शांत वारा यांची घातलेली सांगड... अशा अनेक आठवणी आहेत K2S च्या.. :-) अधिक माहिती. १) ट्रेक रात्रीचाच असेल. २) रात्रीतून चालायचे अंतर - १८ ते २० किमी. (अंदाजे ५ ते ६ तास) ३) वाटेत साधारणपणे १८ डोंगर / टेकड्या आहेत. (हो. अ ठ रा) ४) प्रॅक्टीस म्हणून आम्ही भरपूर वजन पाठीवर बाळगणार आहोत. त्यामुळे सोबतच्या ट्रेकर्स च्या पाठीवरचे ओझे सांभाळायची तयारी आम्ही ठेवली आहे. ५) फर्स्टएड बॉक्स जवळ असणार आहे. ६) कमीतकमी ३ जण नक्की असतील. ७) ट्रेक रात्रीचा असल्याने टॉर्च अत्यावश्यक. ८) वरील कोणत्याही माहितीने "मला जमेल का..?" असा प्रश्न उद्भवू देवू नये - आम्ही आहोतच बरोबर. :-) ९) ही कोणतीही झैरात नाही - ट्रेकसाठी पैशाचा कोणताही व्यवहार होणार नाही. कोणी मिपाकर इच्छूक असल्यास जरूर संपर्क साधावा.