Skip to main content

गोडाचा सांजा

लेखक सानिकास्वप्निल यांनी बुधवार, 09/05/2012 17:41 या दिवशी प्रकाशित केले.
. साहित्यः १ वाटी लापशी रवा (दलिया ) १ वाटी चिरलेला गुळ (साधारण एवढा लागतो, तरी आवडीप्रमाणे कमी-जास्त करणे) १ वाटी दूध १ वाटी पाणी १/२ वाटी खवलेला ओला नारळ ( आवडीप्रमाणे कमी-जास्त करणे) २-३ टेस्पून साजूक तूप १/२ टीस्पून वेलचीपूड काजु, बदामाचे काप, बेदाणे . पाकृ: प्रथम एका कढईमध्ये तूप गरम करून लापशी रवा मंद आचेवर सोनेरी रंगावर परतून घ्या. . दुसर्‍या भांड्यात दूध व पाणी एकत्र करुन त्यात परतलेला रवा घालून प्रेशर कुकर ला ३-४ शिट्ट्या काढून शिजवून घ्या. . कढईत शिजवलेला लापशी रवा व गुळ एकत्र करा व मंद आचेवर गुळ विरघळेपर्यंत परतून घ्या. . आता त्यात सुका-मेवा व ओला नारळ घालून सगळे एकत्र करा. सतत परता कारण गुळामुळे सांजा लागू शकतो. . वेलचीपूड घाला आणी एकत्र करा. आवडत असल्यास वरुन साजूक तूप सोडा. . गरमा-गरम गोडाचा सांजा खायला सुरु करा :) . गुळामुळे सांजा खमंग लागतो .
वाचने 15002
प्रतिक्रिया 35

प्रतिक्रिया

धनुअमिता बुधवार, 09/05/2012 17:47
मस्तच वाचनखुण साठवलेली आहे

गवि बुधवार, 09/05/2012 18:00
पदार्थ एकदम अनोखा नसला तरी प्रेझेंटेशन खास आहे. पाहूनच तो मटकवण्याची जबर इच्छा होते आहे. साधारण नारळीभाताची आठवण होते आहे. गोडात शिरा / सांजा ... तिखटात उपमा / तिखटसांजा या प्रकारांत काही फरक आहे की समानार्थीच आहेत?

प्यारे१ बुधवार, 09/05/2012 18:11
परत परत काय प्रतिक्रिया टंकाव्यात माणसानं???? दिसायला छान आहेच्च. प्रश्नच नाही. प्रेझेन्टेशनला फुल्ल मार्क्स.

पैसा बुधवार, 09/05/2012 18:20
मस्त खमंग पदार्थ. पण रवा कुकरात का घालावा लागतो? कढईला तळाला जरासा लागलेला आणखीच खमंग लागतो.

सानिकास्वप्निल बुधवार, 09/05/2012 21:15
रवा कुकरला लावण्याचा एकच हेतु की तो पटकन शिजतो :) तसे काहीजणं परतलेल्या रव्यात उकळते दूध+पाणी घालून , वाफेवर ही शिजवतात. मला कुकरला लावणे जास्त सोयीचे वाटते इतकच :) कढईला तळाला जरासा लागलेला आणखीच खमंग लागतो. बरोबर आहे पण कधी-कधी तो लागल्यामुळे खमंगपणापे़क्षा कडवट चव येते ती नाही आवडत :(

कवितानागेश गुरुवार, 10/05/2012 11:40
कुकरमध्येच शिजवलेला बरा. बाहेर परतुन शिजवताना एखाद्यावेळेस चिकट पण होउ शकतो. :( हा जितके पाणी घालू तितका फुलतो.

स्मिता. बुधवार, 09/05/2012 18:23
गोड सांजा आणि शिरा यात फरक असतो का? मला नेहमीच्या रव्याचा शिरा आवडतो, जाड रव्याचा सांजा आवडेल की नाही माहिती नाही, एकदा करून बघेन. प्रेझेंटेशन अ‍ॅज युज्वल मस्त!

इरसाल बुधवार, 09/05/2012 18:28
काही काळ तरी काळ्या पाण्याच्या कोठडीत धाडावे अशी इच्छा होत आहे. काय छळ लावलाय ?

परिकथेतील राजकुमार बुधवार, 09/05/2012 18:46
RIP

रेवती बुधवार, 09/05/2012 19:25
सानिके, असा सांजा मी प्रथमच पाहतिये. अर्थात आवडला. गव्हाच्या खिरीची आठवण झाली. मी रव्याचा सांजा (साखरेऐवजी गूळ घालून) अधून मधून करत असते. तुझी पाकृ पाहिल्याबरोबर लगेच तो केला आणि मुलाच्या डब्यात दिला. :)

सानिकास्वप्निल बुधवार, 09/05/2012 21:18
धन्यवाद गं मला लापशी रव्याचे तिखट -गोड असे सगळेच पदार्थ आवडतात. गोडाचा सांजा जरा जास्तचं :) आता तू बनवलास तर तुला आवडला का?? खीर तर छानचं होते बरी आठवण करून दिलीस लवकरच बनवेन :)

शिल्पा ब गुरुवार, 10/05/2012 10:33
छान आहे. दलिया आणुन ठेवलाय पण त्याचं काय करायचं असतं हेच माहीती नव्हतं. आता हा शिरा करुन बघते. जरा तिखट मिठाचं काही होतं का या दलियाचं? असेल तर पाकृ टाकाच.

गवि गुरुवार, 10/05/2012 10:37
जरा तिखट मिठाचं काही होतं का या दलियाचं?
हो.. अगदी टेसदार दलिया बनतो तिखटमिठाचा. साधारण खिचडीसारखा. प्रेशर पॅनमधे. एक्झॅक्ट कृती माहीत नाही पण साधारण मुगाच्या / तुरीच्या खिचडीसारखीच असावी. फक्त डाळ-तांदळा ऐवजी दलिया. मटार-टॉमॅटो आणि अन्य आवडत्या भाज्या घालून बनवला तर एकदम होलसम आणि वन डिश मील..

पैसा गुरुवार, 10/05/2012 12:09
तिखट मिठाचा सांजा पण होतो ना! साधी हिंग मोहरी हळद घालून फोडणी करायची, कांदा आणि मिरच्या चिरून फोडणीत टाकायच्या. रवा घालून भाजायचा. मग पाणी घालून शिजवायचं आणि लिंबू, मीठ, कोथिंबीर, खोबरं घालायचं. की झाला तिखटमिठाचा सांजा.

गवि गुरुवार, 10/05/2012 12:19
हा तुम्ही म्हणताय तो रव्याचा हळदयुक्त उपम्यासारखा खरपूस प्रकार वेगळा आणि मी वर म्हटलेला वेगळा. रव्याहून बराच जाड दलिया (गव्हाच्या लापशीसारखा आणि गव्हाच्याच रंगाचा.. जो सानिकास्वप्नील यांच्या पाकृमधे दिलेल्या फोटोत आहे तोच.) आणि त्याचा कुकरमधे शिजवून खिचडीसारखा करतात. नाश्त्याला डब्यात आठवड्यात एकदा तरी असतोच. घरला विचारुन सांगतो. पण मला खात्रीच आहे.. खिचडी / मसालेभाताप्रमाणेच फक्त भाताऐवजी लापशीचा जाडा ब्राऊन रवा वापरुन. यात मटार , टॉमॅटो वगैरेही असतात.

पैसा गुरुवार, 10/05/2012 12:26
फक्त तुम्ही लिहिलय त्याला दलिया खिचडी म्हणतात. आंणि मी लिहिलंय तो जाड्या लापशी रव्याचा मराठी पारंपरिक प्रकार आहे. लापशी रवा मिळाला नाही तर बारीक रव्याचा सांजा करतात, पण प्रेफरेबल जाडा रवाच.

रेवती गुरुवार, 10/05/2012 20:11
शिल्पातै, या दलियाला कोरडे भाजून ठेवा. जरा जास्त तेलाच्या फोडणीत मिरच्या, आलं, कढीपत्ता, उडदाची आणि हरभर्‍याची चमचाभर डाळ घालून आवडतील त्या सगळ्या भाज्या घालाव्यात. कांदा, ग्रीन बिन्स, मटार, मका, गाजर, फ्लॉवर इ. परतून आधणाचं पाणी घालून त्यात ओला नारळ, कोथिंबीर, लिंबू, मीठ, साखर,साजुक तूप चमचाभर आणि भाजलेला रवा वैरावा. नेहमीच्या रव्याला दुप्पट पाणी लागते तर याला तिप्पट. मंद आचेवर शिजवावा. बरोबर टोम्याटोचं सार केलं तर पोटभरीचं पौष्टीक जेवण होतं. सार नाही केलं तर न्याहरी म्हणून बेष्ट.

गवि मंगळवार, 15/05/2012 10:39
हा पहा, मी म्हणत असलेला गरमागरम दलिया (पैसाताईंनी म्हटल्याप्रमाणे दलिया खिचडी). आज ब्रेकफास्टला डब्यात दिसला म्हणून फटू काढत आहे.

पियुशा गुरुवार, 10/05/2012 14:57
ह्याला लापशी म्हणतात आमच्याइकडे . भंडारा /जागरण गोंधळ असेल किंवा मंदिरात प्रसाद म्हणुण हमखास हा प्रकार असतो सोबत भात अन कढी मस्त लागते :) ह्यात नारळाच्या किसाऐवजी खोब्र्याचे काप घालुन करतात ते शिजलेले गोड काप .मनुके,काजु ,मस्त लागतात अगदी .

निवेदिता-ताई शुक्रवार, 11/05/2012 09:44
मस्तच -- लहानपणची आठवण झाली, माझी आई असाच खपली गव्हाचा रवा काढून मग बनवायची, खमंग लागायचा....