जगात नक्की कोणत्या देशाचे चांगले चालले आहे?

मिपाकरांकडून मला सतावत असलेल्या एका प्रश्नाचे उत्तर मिळेल ही अपेक्षा आहे. जगात नक्की कोणत्या देशाचे चांगले चालू आहे आणि तो देश येत्या काही वर्षात वर्चस्व गाजवेल? अमेरिका गेली अनेक वर्षे वर्चस्व गाजवत होती पण २००७-०८ पासून तिथे आर्थिक संकट आले आणि त्यातून ते पुरते सावरलेले दिसत नाहीत. इराक आणि अफगाणिस्तानातील युध्दांमध्ये त्यांचा वारेमाप खर्च झाला आहे.मध्यंतरी त्यांचे क्रेडिट रेटिंगही कमी झाले असे वाचल्याचे आठवते. युरोपात तर प्रश्न मोठाच आहे.अनेक देशांच्या अर्थव्यवस्था मोडकळीस आल्या आहेत. बडा घर आणि पोकळ वासा अशी त्यांची अवस्था. त्यांचेही क्रेडिट रेटिंग कमी होतच आहे. चीनने मोठी प्रगती केली आहे हे मान्य पण ती प्रगती आपल्याच लोकांच्या शोषणावर केलेली आहे. अशी कोणतीच व्यवस्था चिरस्थायी असू शकत नाही. तसेच चीनमध्ये मधल्या काळात लोकसंख्या नियंत्रणासाठी केलेल्या प्रयत्नांचे वाईट परिणाम पुढील काही वर्षात पुढे येतील अशी चिन्हे आहेत कारण देशात तरूणांची संख्या कमी होईल आणि म्हातारे लोक वाढतील. आफ्रिका खंडात तर आनंदी आनंदच आहे. जपानमध्ये, युरोपातही लोकसंख्येचा हा प्रश्न आहेच. गल्फमधील तेल संपल्यानंतर त्यांना कोण विचारणार? आपल्या भारताचे म्हणाल तर वेगळे काही बोलायलाच नको. मग नक्की कोणाचे चांगले चालू आहे आणि कोणता देश येत्या काही वर्षांत वर्चस्व गाजवेल? (रात्रीच्या वेळी झाडावर उलटे लटकणारे) पुण्याचे वटवाघूळ मी ऐसी अक्षरे या संकेतस्थळावर "पिसाळलेला हत्ती" या नावाने वावरतो.