काकडीची खमंग धिरडी ....

नमस्कार मिपाकरानो , नवीन वर्षातली ही माझी पहिली जिलेबी ......;) ओह ! आय मीन रेसेपी ;) एकदम झटपट बनवता येणारा अन चवीला लाजवाब असा प्रकार आहे .

काकडीची धिरडी

साहित्य : एक काकडी. (किसलेली ). एक मध्यम कांदा (किसलेला ). एक वाटी बाजरीचे पीठ. अर्धी वाटी बेसन पीठ . आलं अर्धा इंच . लसूण पाकळ्या ६-७ , हिरव्या मिरच्या ६-७ . तीळ एक चमचा . जीर एक छोटा चमचा. लाल-तिखट अर्धा चमचा . हळद अर्धा चमचा . मीठ चवीनुसार . कोथिंबीर चिरलेली. तूप / लोणी /तेल /बटर ( मी धिरड भाजण्यासाठी तूप अन लोणी वापरलं आहे ) कृती : आलं ,लसुण ,मिरची ,कोथिंबीर याची एकत्र पेस्ट बनवून घ्यावी , एका बावूलमध्ये वरील सर्व साहित्य व्यवस्थित मिक्स करून घ्यावे , त्यात थोड पाणी घालावं ,मिश्रण जास्ती पातळ नको अन घट्टही नको,मध्यम ठेवावं.( जास्त पातळ झाले तर धिरड खरपूस भाजल जात नाही ,अन जाड असेल तर कच्च लागत ) एका पॅनमध्ये थोड तूप / तेल घालून त्यावर मिश्रण घालावं ,चमच्याने पसरून घ्यावं ,जितक पातळ पसरवता येईल तितक ! आता दोन्ही साईडने धिरड खरपूस अन खमंग होईपर्यंत व्यवस्थित भाजून घ्या ,वरतून भरपूर तूप /लोणी घाला अन गरम गरम धिरड सॉस / शेंगदाण्याची चटणी / दही / लोणच याबरोबर सर्व करा . :) ( गरम गरम धिरड खाण्याच्या नादात फोटोकडे अंमळ दुर्लक्ष झाले त्याबद्दल क्षमा असावी ) :)