साहित्यः ८-१० बेताचे उकडलेले छोटे बटाटे (सालं काढून घेणे) २-३ मध्यम कांदे बारीक चिरून किंवा किसून २ मोठे टोमॅटो बारीक चिरून पाऊण वाटी दही ३ टीस्पून आले-लसूण वाटून २ तमालपत्र १-२ दालचिनीच्या काड्या पाव चमचा जिरे १ चमचा लाल तिखट ( आवडीनूसार कमी-जास्त करणे) १ चमचा कश्मिरी मिरची पावडर १ चमचा गरम मसाला १ टेस्पून खसखस भिजवून वाटलेली १ टीस्पून कसूरीमेथी मीठ चवीनूसार तेल चिरलेली कोथिंबीर पाकृ: उकडलेल्या बटाट्यांना काट्याने टोचे मारुन घेणे. सर्व बटाटे तेलात खमंग तळावेत व बाजूला टीश्यूवर ठेवावेत. दुसर्या भांड्यात तेल तापवून तमालपत्र, दालचिनीच्या काड्या आणी जिरे घालावे. त्यावर चिरलेले किंवा किसलेले कांदे घालून गुलाबी रंग येईपर्यंत परतावे. वाटलेले आले-लसूण, लाल तिखट, कश्मिरी मिरची पावडर आणी गरम मसाला घालून तेल सुटेपर्यंत परतावे. तेल सुटायला लागले की त्यात दही घालून चांगले घोटावे,वाटलेली खसखस घालून चांगले परतावे. चिरलेले टोमॅटो आणी बटाटे घालावे. चवीनूसार मीठ घालून सर्व एकत्र करावे. सगळा मसाला बटाट्यांना नीट लागला पाहिजे. रस्सा किती दाट हवे असेल त्याप्रमाणे पाणी घालून दोन वाफा आण्याव्यात. वरून चुरडलेली कसूरीमेथी घालणे. कोथिंबीर घालून गरम-गरम नान, पराठ्यासोबत खायला देणे.