गुलखंड

मिपाच्या पाककृती विभागाचा शुभारंभ गोडाने करते. दसर्‍याच्या मुहूर्तावर आम्ही नवीन घरात रहायला गेलो‌. चोहीकडे सामान!त्यातून हवे ते वेळेवर मिळाले तर मग आणि काय हवे? जायफळ/वेलदोडे कोणत्या बरणीत/डब्यात आहेत हे १०,१२ डबे उचकून पण सापडेनात म्हणून मी वैतागले तर इकडे दिनेशने गुलकंदाच्या बरणीतून(ती कुठून मिळाली त्याला,कुणास ठाऊक?) गुलकंद काढून त्यात घातला! आणि गुलखंड असे बारसे करुन आम्ही खाल्ले. साहित्य- ५०० ग्राम स्पाइझं क्वार्क ४०%फॅटवाला / केफिर चीज्(लेबनी)/ क्राफ्टचे फिलाडेल्फिया क्रीम चीज किवा अर्थातच चक्का २५०/३०० ग्राम साखर, २ टेबल स्पून गुलकंद,बदाम/काजूतुकडे १टेबल स्पून इथे speisequark नावाचे जे दही मिळते त्याला आम्ही "जर्मन चक्का" असे नांव दिले आहे! स्पाईझं क्वार्क मध्ये साखर मिसळा,बदाम/काजू तुकडे घाला.गुलकंद घाला‌‌. गुलखंड तयार! हा क्वार्क पुरणयंत्रातून काढावा लागत नाही. पण चक्का असेल तर नेहमी श्रीखंड करतो तसेच करा परंतु स्वादाला गुलकंद घाला.

पोळी/पुरी बरोबर खा.वेगळी चव छान लागते.सध्याच्या उन्हाळ्यात गुलकंदाने गारवा येईल,:)

वाचने 7898

प्रतिक्रिया 18

प्रतिक्रिया

छान...

प्रभाकर पेठकर शनिवार, 10/05/2008 18:31

मिपच्या पाककृती विभागाच्या पहिल्या पाककृतीला प्रतिसाद देताना आनंद होतो आहे. अभिनंदन.

स्पाइझं

विजुभाऊ शनिवार, 10/05/2008 18:32

स्पाइझं क्वार्क हे काय असते. भारतात याला काय नावाने ओळखातात एक अज्ञानी विजुभाऊ

स्पाइझं क्वार्क..

स्वाती दिनेश शनिवार, 10/05/2008 18:36

विजुभाऊ,भारतात चक्का मिळतो हो.. आम्हाला इथे तो मिळत नाही म्हणून असे काही शोधावे लागते त्यासाठीच तर वर बरेच पर्याय दिलेत ना. उदा- अमेरिकावासी क्राफ्ट चीज किवा केफिर चीज वापरु शकतात. याप्रमाणे भूतलावर कोठेही असाल तर श्रीखंड खाऊ शकता,:)

वा वा...

मन शनिवार, 10/05/2008 18:42

तोंडाला पाणी सुटलय नुसतं..... अरे कुणी तरी त्या गुल खंडाला इथे आणा रे.... (नाय तर मला तरी गुल खंडाकडे घेउन चला रे...) मस्त मस्त.... आपलाच, मनोबा (उपाख्य साठ्यांचे (नाठाळ) कार्टे)

करून पहातेच.

शितल शनिवार, 10/05/2008 18:47

>>>अरे कुणी तरी त्या गुल खंडाला इथे आणा रे.... >>>>(नाय तर मला तरी गुल खंडाकडे घेउन चला रे...) अरे मन ना तु मग काय तुला कोठे ही जाता येते, विनातिकिट. बाकी, स्वाती ताई तुमचा गुलख॑ड करून पहाते, इथे अमेरिकेत एकदा श्रीख॑ड विकत आणले आणि भारतात परत जाइ पर्य॑त परत श्रीख॑ड घरात आणायचे नाही असे ठरवले.

अरे वा..

विद्याधर३१ शनिवार, 10/05/2008 19:08

नवीन विभागाची सुरुवात तर छान गोडाने झाली. पन फोटु नाही का टाकता येणार... :P विद्याधर

मस्तच

यशोधरा शनिवार, 10/05/2008 20:03

मस्तच पाककृती :)

व्वा

वरदा शनिवार, 10/05/2008 20:15

आयडीया सॉलीड आवडली आधीच मला गुलकंद आवडतो आणि त्यात माझ्या न्यूजर्सीत अगदी मस्त चक्का मिळतो... स्वाती पाकक्रीया विभागात पहीलीच गोडधोड आणि मस्त पाकक्रुती लिहिल्याबद्दल तुझं अभिनंदन!!! इथे अमेरिकेत एकदा श्रीख॑ड विकत आणले आणि भारतात परत जाइ पर्य॑त परत श्रीख॑ड घरात आणायचे नाही असे ठरवले. शितल अगं इथे तर चक्का घरी सुद्धा करता येतो..."देसी दही" कुठेही मिळतं ते आण आणि बांधून ठेव एका पंचात ५-६ तासात सुंदर घट्टं चक्का होतो तयार्...मला तर उद्या इथे "हापूस" मिळणारे...मी आम्रखंड करुन खाणार कोण कोण येतय माझ्याकडे?

हो,

भाग्यश्री शनिवार, 10/05/2008 23:55

सावर क्रीम आणि यॉगर्ट एकत्र करून एका कापडात बांधून ठेवायचे.(रात्रभर). सगळं पाणी निघून गेलं की चक्का तयार होतो.. मग दुसर्‍या दिवशी सकाळी साखर,वेलदोडा,केशर, जाय्फ्ळ घातलं की सुंदर आणि झटपट श्रीखंड तयार! काहीच फारसं करावं लागत नाही.. भारीय ही पद्धत...खूप टिकतं, त्यामुळे भरपुर करून ठेवलं तरी चालून जातं! नक्की करून बघ शितल! बाकी, गुलखंड पण सहीय! नक्की करून बघणार... !

छान टिप्स.

शितल रविवार, 11/05/2008 19:06

सावर क्रीम आणि यॉगर्ट एकत्र करून एका कापडात बांधून ठेवायचे.(रात्रभर). सगळं पाणी निघून गेलं की चक्का तयार होतो.. मग दुसर्‍या दिवशी सकाळी साखर,वेलदोडा,केशर, जाय्फ्ळ घातलं की सुंदर आणि झटपट श्रीखंड तयार! काहीच फारसं करावं लागत नाही.. भारीय ही पद्धत...खूप टिकतं, त्यामुळे भरपुर करून ठेवलं तरी चालून जातं! नक्की करून बघ शितल! भाग्यश्री, छान टिप्स दिली आहेस. धन्य. :D हो मी श्रीख॑ड आणि गुलख॑ड ही नक्की करून पहाणार आहेच.