आलु पराठा

काय बॅचलर मंडळी शिकलात की नाही सैपाक बिंपाक? अहो नसाल तर लागा तयारीला. चुकुन माकुन एखाद्या IT वालीने गळ्यात माळ घातली तर मग कस व्हायच तुमचं? ;) आज एका सोप्या डिश पासुन सुरवात करा. गृहिणींचा आणि बॅचलर मंडळींचा अगदी अडी-नडीला धावुन येणारा किचन मधला दोस्त म्हणजे बटाटा. घरात दुसरी कसलीच भाजी नसली तरी कांदे /बटाटे असतातच. अश्या वेळी नुसत्या बटाट्याच्या काचर्‍या करुन वेळ मारुन नेता येते. थोडी फुरसत असेल आणि कणिक तिंबता येत असेल तर हा पदार्थ करुन पहायला हरकत नाही. साहित्यः २-३ मध्यम आकाराचे उकडलेले बटाटे. १/२ चमचा हळद. १ चमचा जीरे पुड. १ चमचा लाल तिखट. २" आलं बारील तुकडे करुन वा किसुन. ७-८ पाकळ्या लसुण बारील तुकडे करुन वा किसुन. ३-४ मिरच्या ठेचुन. मीठ चवी नुसार. कणकेचा गोळा चांगला तिंबुन. कृती: सर्वप्रथम बटाटे मॅश करुन घावे. त्यात सगळे मसाल्याचे पदार्थ टाकुन चांगल एक जीव करुन घ्यावं. चवीचा अंदाज घेउन मीठ टाकावं. कणकेचा गोळा परत एकदा मळुन, लहान सफरचंदाच्या आकाराचा गोळा वेगळा करुन त्याची छोटी पुरी लाटावी. हातानेच केली तरी चालेल पण कडा शक्यतो पातळ ठेवाव्या. लिंबाच्या आकाराचा सारणाचा गोळा या तयार पुरी मध्ये ठेवुन तिच्या कडा मोदका प्रमाणे वाळुन घ्याव्या. शक्यतो मध्ये हवा रहाणार नाही याची दक्षता घ्या. हलक्या हातानेच हा सारण भरलेला दाबुन त्याला पेढ्याचा आकार द्या. हलक्या हाताने, हळु हळु फिरवत चपाती प्रमाणे लाटुन घ्या. हे खर कौशल्याच काम. पुरण पोळीतल पुरण असो आलु पराठल्यातला बटाटा, ज्याला ते सारण आतच कोंडुन पोळी लाटता येत तोच खरा बल्लव् (काकु असेल तर सुगरण). आमचे हात हलके नसल्याचे पुरावे वरील कलाकृती दाखवतेच आहे. ;) असो मीच करणार, नी मीच गिळणार असल्याने जीथे जमेल तिथे थोडी ठिगळं लावली. पराठ्याचा आकार एखाद्या देशाच्या भौगोलीक नकाश्या सारखा आला नाही या वरच समाधान मानुन आम्ही स्वत:चीच पाठ थोपटुन घेतली. पराठा अलगद उचलुन तव्यावर टाकुन, मध्यम आचेवर थोड लोणी सोडुन पराठा खमंग भाजुनघ्यावा. ताज्या ताज्या दह्या /लोणच्या बरोबर , आवडी नुसार तळलेल्या / कच्या मिरच्यांसोबत लुफ्त घ्या गरमा गरम आलु के पराठे का ;)