पं. प्रभाकर कारेकर यांच्या गाण्याचे शौकिन

मराठी नाट्यसंगीताचे चाहते त्यांचे चाहते आहेतच.त्यांच्या मैफीलीत ज्यांनी हजेरी लावली असेल त्यांना नक्की माहीती आहे की कारेकर म्हणजे फक्त नाटयसंगीत असे नाही. फार फार वर्षांपूर्वी कर्जतला प्रकाश ट्रेडींग कंपनीच्या वाढदिवशी बेडेकरांनी (कंपनीचे मालक) त्यांचे गाणे ठेवले होते. सोबत इतर्ही काही गायक होते. कारेकर गायला बसले तेव्हा पहाट झाली होती. त्यावेळचे प्रिये पहा ...जे ऐकले ते आजही कानात आहे. त्यानंतर डोंबीवलीच्या सिकेपी हॉलमध्ये सकाळच्या रागात त्यांनी गायलेला भैरव (बहुतेक नटभैरव) अजूनही आठवतो. सूरज चंदा जबतक गगनमे ही चिज ते गायले होते. सोबत नाना मुळे आणि पुरुशोत्तम वालावलकर होते. येस्स ,कारेकरांचे फॅन आहेत. थोडीशी अवांतर माहीती : प्रकाशचे माक्याचे तेल बनवणारे बेडेकर दर पाडव्याला गाण्याचा भरगच्च कार्यक्रम आयोजीत करायचे.रसिकांना मुक्त निमंत्रण असायचे. आम्ही त्या कार्यक्रमाला मिनी सवाई म्हणायचो.

अमूक एकाच्या/एकीच्या गाण्याचा चाहता आहे असे म्हणणे जीवावर येते इतके कलाकार सुदैवाने मराठीत आणि हिंदीत आहेत. पं. कारेकर हे त्यातील एक. १९९९ साली मी बॉस्टनच्या न्यू इंग्लंड मंडळाचा अध्यक्ष होतो, तेंव्हा त्यांचा कार्यक्रम ठरवला होता. अमेरिकेत कलाकारांचे कार्यक्रम हे सर्वत्र होत असतात, पण शनीवार-रविवारी. मधल्या काळात त्यांना तरंगावे लागते आणि प्रवास करावा लागतो. असाच काहीसा प्रकार तेंव्हा झाला आणि कारेकर ४-५ दिवस आधी आले. तेंव्हा ते आमच्याकडे राहीले होते. त्यांचे रहाणे आणि वागणे एकदम साधे तसेच मैत्रिपूर्ण होते. खायच्या, प्यायचा काही त्रास नाही. आमचे घर, दोनच घरे आजूबाजूला असलेले, भाड्याचे होते त्यामुळे ते जाणून कुणाला त्रास होऊ नये म्हणून त्यांचा सतत चालू असलेला सराव देखील सहजतेने आणि हळू आवाजात चालत असे. त्यावेळेस ते सर्व दिवस त्यांचे अगदी सहजतेने गाणे ऐकण्याचा लाभ आम्हाला झाला. तसाच अनुभव तेंव्हा त्यांना साथ देण्यास आलेल्या डॉ. अरविंद थत्ते (हर्मोनियम वादक) यांचा आला होता. बर्‍याचदा ते पेटीवर नुसतेच बोटे फिरवत सराव करत... नंतर गेल्या वर्षी त्यांना येथील एका संगीत संस्थेने बोलावले म्हणून ते आले होते. त्यात सक्रीय असलेल्या माझ्या एका मित्राने त्यांचा नंतर घरी कार्यक्रम ठेवला होता, त्याला गेलो असता, दहावर्षांनी देखील आम्हाला दोघांना व्यवस्थित ओळखले, आस्थेने विचारपूस केली. दोन्ही वेळेस झालेला गाण्याचा कार्यक्रम लक्षात रहाण्यासारखा झाला, खूप आवडला वगैरे वेगळे सांगायची गरज वाटत नाही पण त्यांचे असे जमिनीवर राहून वागणे मात्र नक्कीच आदरणीय वाटले.

राग नसावा, पण पं. प्रभाकर कारेकर नाकातून गातात असे मला वाटते.

पं. कारेकराचं गाणं मलाही आवडतं! कुणाकडे त्यांच्या गाण्यांच्या लिंक्स असतील तर द्या की.... मागे कुमारजींच्या गाण्याचा विषय निघाला होता तेव्हा एका मित्राने त्यांच्या निर्गुणी भजनांच्या लिंक्स दिल्या होत्या.

मिपाकर, पं. कारेकराचं गाणं "दीनाची माऊली, अजी म्या देखीयली" कोणी द्याल काय? आंतरजालावर शोधुनही मिळाले नाही. धन्यवाद....

आम्ही अलिबाग येथे त्यांची नाट्यसंगीत विरहीत मैफल ऐकली आहे. फर्माईश खातर २ नाट्यगितें गाईली. पण राग दारी वरील त्यांची हुकुमत , वा रे वा !!!