माझा लेक लहान होता तेव्हा आमच्याकडे हॉलिडेला हा फज सांता साठी ठेवायचो. सांता येणं बंद झालं, त्या बरोबर फज करणंही. या आठवड्यात लेकाला शाळेच्या टीम बरोबर गावाला जावे लागले. एक दिवस शाळा बुडली. बुडलेला अभ्यास भरुन काढायला मैत्रीणीने मदत केली. तेव्हा काल तिच्यासाठी लेकाने फज केला. झटपट आणि चॉकोलिशस. साहित्य १ कॅन(१४ औस) स्विटन्ड कंडेन्स्ड मिल्क २ कप सेमि स्वीट चॉकलेट चिप्स १ कप आक्रोडाचे तुकडे (नसले तरी चालतील) १ टी स्पून वॅनिला कृती ८ इंच चौकोनी पॅनला फॉईल लाऊन घ्या. फॉईल जरा पॅन च्या बाहेर येइल इतपत मोठी ठेवली तर फज काढायला सोपे जाईल. मायक्रोवेव मधे चालेल अशा काचेच्या भांड्यात दूध आणि चॉकलेट एकत्र करुन मायक्रोवेव मधे १५-२० सेकंदांच्या अवधीने १-२ मिनिटांसाठी गरम करा. हे करताना अधुन मधून ढवळा. ढवळून एकजीव मिश्रण तयार झाले की वॅनिला आणि वापरणार असाल तर आक्रोडाचे तुकडे घालून ढवळा. पॅन मधे पसरवून पॅन २ तासासाठी फ्रीज मधे ठेवा. घट्ट झाला की बाहेर काढा. फॉइल पकडून पॅन मधून बाहेर काढा. फॉईल काढुन तुकडे कापा. एंजॉय!