स्वातीताईचे कायस्थी चिंबोरी कालवण पाहून मासे करण्याचा भलताच मूड आलेला. पण शोधूनहि चिंबोरी मिळेनात.. मग इथे मिळणारे मासे ( सामन आणी कोलंब्या ) वापरून काल फिश बिर्याणी बनवली. पहा बर मंडळी.. साहित्यः माश्याचे ५-६मोठे जाड तुकडे ( शक्यतो सुरमई, सामन असा घट्ट मासा घ्यावा ) .. पातळ तुकडे असतील तर खिमा होईल. १०-१२ मोठ्या ताज्या कोलंब्या ( सालं आणी काळा धागा काढून टाकावा ) मासे मुरवण्यासाठी - १ छोटा चमचा हळद १ छोटा चमचा लाल मिरचीपूड १ छोटा चमचा बिर्याणी मसाला १/२ लिंबू १ छोटा चमचा तेल चविनुसार मीठ मसाल्या साठी - ५-६ कढिपत्ता पाने १ कप दही १/२ कप बारीक चिरलेली कोथींबीर १/४ कप बारीक चिरलेला पुदिना ३-४ हिरव्या मिरच्या १ छोटा चमचा बिर्याणी मसाला १ मोठा चमचा आल-लसूण पेस्ट १ चमचा तेल बिर्याणी भातासाठी - २ कप बासमती तांदूळ ( ३० मिनीटे भिजववून निथळत ठेवावा) ७-८ काळीमिर्‍या ३-४ लवंगा १ तमालपत्र १" दालचिनी काडी १ चमचा शहाजीरे १ छोटा चमचा बिर्याणी मसाला चविपुरता मीठ कॄती - माश्याचे तुकडे-कोलंबी स्वच्छ धुवून घ्यावेत. त्याला १ छोटा चमचा हळद, १ छोटा चमचा लाल मिरचीपूड, १ छोटा चमचा बिर्याणी मसाला, १/२ लिंबू, १ छोटा चमचा तेल, चविनुसार मीठ लावून ३० मिनीटे लावून ठेवावे. मासे मुरत असताना एकिकडे भाताची तयारी चालू करावी. भाताच्या दुप्पट पाणी उकळत ठेवावे. एका जाड बुडाच्या भांड्यात थोड्या तेलात सगळा खडा गरम मसाला ( ७-८ काळीमिर्‍या, ३-४ लवंगा, १ तमालपत्र, १" दालचिनी काडी, १ चमचा शहाजीरे ) भाजून घ्यावा. त्यात भिजवून निथळत ठेवलेले तांदूळ १-२ मिनीटे हलक्या आचेवर परतून घ्यावे. नंतर त्यात उकळवलेले पाणी, चविपुरता मीठ आणी १ छोटा चमचा बिर्याणी मसाला टाकून भात शिजवावा. पूर्ण शुजवू नये. १ कणी असताना काढून ताटात मोकळा पसरून घ्यावा. ( जर मायक्रोवेव्ह असेल तर त्यातसुद्धा भात छान मोकळा होतो ) भात शिजत असताना जाड बुडाच्या भांड्यात थोड्या तेलात कोलंबी आणी मासे तळून घ्यावेत.. पूर्ण शिजवू नयेत. दोन्ही बाजूनी परतून घ्यावेत व प्लेट वर हलक्या हाताने काढून ठेवावेत. आता या उरलेल्या तेलात मसाल्याचे साहित्य ( ५-६ कढिपत्ता पाने, १ कप दही, १/२ कप बारीक चिरलेली कोथींबीर, १/४ कप बारीक चिरलेला पुदिना, ३-४ हिरव्या मिरच्या मधे उभ्या चीरून, १ छोटा चमचा बिर्याणी मसाला, १ मोठा चमचा आल-लसूण पेस्ट ) घालावे आणी २-३ मिनीटे शिजवावे. आता हे शिजवलेले अर्धे मिश्रण माश्यांच्या तळलेल्या तुकड्यांवर घालावे. उरलेल्या मसाल्यात थोडे पाणी घालून मोकळा केलेला भात पसरून घालावा. वरून माश्याचे तुकडे पसरून टाकावे. वरून झाकण ठेवावे व मंद आचेवर ५-१० मिनीटे भात होईपर्यंत शिजवावे.. रायत्याबरोबर गरमा गरम वाढावे. पेश आहे फिश बिर्याणी..