Skip to main content

अजूनही

लेखक क्रान्ति यांनी रविवार, 28/06/2009 15:15 या दिवशी प्रकाशित केले.

ठाव ना तुझा तुला अजूनही
काय शोधसी मला अजूनही?

जागल्या कळ्या; सुकून चालल्या,
गंध मात्र राहिला अजूनही

ओळखू कसा तुझा स्वभाव रे?
जाणले न मी मला अजूनही

लांब जात सावल्याहि पांगल्या
तू दिवा न लावला अजूनही

सावळा न राधिका, न गोपिका
एकटा रिता झुला अजूनही

मीच जिंकले तरी हरायचा
डाव का न संपला अजूनही?

तोच नांदतो म्हणे चराचरी
का मला न भेटला अजूनही?

लेखनविषय:
लेखनप्रकार

वाचने 1330
प्रतिक्रिया 3

प्रतिक्रिया

१,२,३ आवडले
इतरांमधे कल्पना छान मात्र एकदोन मात्रा कमीजास्त (खरंतर एखादी जास्तच) झाल्याने तालात चुकतंय असं वाटल्याने मजा आली नाहि

ऋषिकेश
------------------
बुद्धीसाठी लोह वाढवणारी औषध घ्यायला लागल्यापासून "डोकं गंजलं तर!" ही भिती वाढली आहे