मिपा वर्धापनदिनाच्या शुभेच्छा.

राम राम मंडळी ! 

बघता बघता मिसळपाव डॉट कॉमला १९ वर्षं पूर्ण झाली!
२००७ साली गणेशचतुर्थीच्या मुहूर्तावर सुरू झालेला हा आपला मिपा आज १९ वर्षांचा झाला, यावर खरं तर विश्वासच बसत नाही. 

या १९ वर्षांच्या प्रवासात मिपाने कितीतरी लेख पाहिले, कितीतरी कविता ऐकल्या, कितीतरी चर्चा रंगवल्या आणि असंख्य काथ्याकूट झेलले.

कधी गंभीर चर्चा झाल्या, कधी मतमतांतरे झाली, कधी तिखट वाद झाले…पण या सगळ्या मिसळीतून एक गोष्ट मात्र कायम राहिली माणसांमाणसातला आपलेपणा

कितीतरी मिपाकर या व्यासपीठावर भेटले. काही लेखनातून जवळ आले, काही प्रतिसादातून, काही खरडफळ्यावरच्या गप्पांमधून… आणि काही तर मिपाच्या आभासी जगातून प्रत्यक्ष आयुष्यातले मित्र झाले. 

आज मागे वळून पाहताना वाटतं, मिसळपाव हे फक्त संकेतस्थळ राहिलं नाही; तो एक अनुभव झाला, एक आठवण झाली आणि अनेकांसाठी आपला एक कट्टा झाला. 

आता १९ वर्षं झाली म्हटल्यावर थोडा काथ्याकूट तर झालाच पाहिजे! 

* मिपावरची तुमची पहिली आठवण कोणती?

* पहिला लेख किंवा पहिला प्रतिसाद आठवतोय का?
* मिपावर भेटलेला एखादा खास मित्र ?
*  कोणता जुना धागा अजूनही लक्षात आहे?
* कोणता मिपाकर / कोणती लेखनशैली आजही आवडते?
* आणि हो… मिपाच्या १९ वर्षांच्या इतिहासातला सर्वात भारी काथ्याकूट कोणता ? लेख ? कविता ? प्रतिसाद ?

जुने मिपाकर असोत, नवे मिपाकर असोत किंवा आजवर फक्त वाचत राहिलेले मूक वाचक असोत, सगळ्यांनी हजेरी लावायची !

 १९ वर्षांचा हा प्रवास असाच पुढे चालत राहो, नवनवीन लेखक जोडले जावोत, चर्चा रंगत राहोत, काथ्याकूट होत राहो आणि या मिसळीतला आपलेपणा कधीच कमी होऊ नये! 
 

मिसळपाव डॉट कॉमला १९व्या वर्धापनदिनाच्या मालक नीलकांत, सहकारी तंत्रज्ञ प्रशांतशेठ,  छुपे संपादक, वाचक, लेखक, सर्वांना  हार्दिक शुभेच्छा ...!