झुळझुळत्या निळसर वळणावर
झुकून, जळाशी झुळुक झोंबते
ऐल पैल तीरांवर अवचित
स्तब्ध लव्हाळी लहरून उठते
त्या वळणाच्या पुढे जरासा
कभिन्न काळा कातळ निश्चळ
रुणझुणत्या पाण्याचे पैंजण
ऐकत फुलते वेडी बाभूळ
निळ्या सावळ्या डोहतळाशी
अचपळ मासोळी सळसळते
पुन्हा पुन्हा त्या ध्वनिचित्राच्या
आठवणीने मन मोहरते
प्रतिक्रिया
4 May 2023 - 8:55 am | श्रीगणेशा
खूप छान!
4 May 2023 - 10:33 am | कर्नलतपस्वी
एखादी ओलेती पण गुंफली असती तर किनारा बाग बाग झाला असता.
बाकी शब्द चित्र मस्त.
4 May 2023 - 10:46 am | Bhakti
सुंदर!
पण बाभळी ऐवजी दुसरं झाड पाहिजे होतं.
4 May 2023 - 12:40 pm | चांदणे संदीप
कुणी बाभूळ घ्या, कुणी बकुळ घ्या! हाकानाका! :)
संं - दी - प
4 May 2023 - 1:18 pm | Bhakti
वाह कविराज मीटरमध्ये पण चपखल शोभत आहे.
रचक्याने दारात दहा वर्षांनी बकुळ फुलला आहे सध्या.