टेस्ट

अनेक दिवस काकांची भुणभुण चालू होती - आपण टेस्ट करून घ्यायला हवी. काकूनां वाटत होतं - काय जरूर आहे, सगळं व्यवस्थित तर आहे. 

सकाळी उठल्यावर काकूंच्या लक्षांत आले - काका कधीच जामानिमा करून बाहेर पडले आहेत.  काकूंनी फक्त खात्री करून घेतली, बाहेर पडण्याचे कारण म्हणून वापरायची ढाल - वाणसामानाची पिशवी - काकांनी न विसरता बरोबर घेतली आहे. 

कांही वेळाने लॅच उघडतानांचे काकांचे जोरजोरातले गुणगुणणे ऐकू आले, तेव्हा काकू स्वतःशीच पुटपुटल्या - खुषीत दिसताहेत म्हणजे टेस्ट निगेटिव्ह आली असावी, आता भुणभुण तरी कमी होईल.   
लॅच उघडून आंत आल्यावर काकांचे लक्ष काकूंकडे जाता क्षणी काका ओरडले - बघ, लौकर जाऊन लाईनीत उभा राहिलो म्हणून दोन तरी बाटल्या मिळाल्या, नाहीतर हात हलवत परत यावे लागले असते!!   

काकूंच्याही चेहेऱ्यावर खुषी उमटली.