Skip to main content

श्रीगणेश लेखमाला २०१९ - प्रस्तावना

लेखक साहित्य संपादक यांनी सोमवार, 02/09/2019 06:01 या दिवशी प्रकाशित केले.


श्रीगणेश लेखमाला २०१९ - प्रस्तावना

गणाधिप नमस्तुभ्यं सर्वविघ्नप्रशान्तिद | उमानंदप्रद प्राज्ञ त्राहि मां भवसागरात् ||


महाराष्ट्रातला माणूस मुळात सण-उत्सव, कला-साहित्य, नाटक, काव्य, मुलाखती यांचा अभिलाषी आहे. आपल्या गणगोतासह कुटुंब-मित्रमंडळींसह उत्तम कलांचा, साहित्याचा, काव्याचा आस्वाद घ्यावा, उत्तम नाटकांना, मैफलींना, मुलाखतींना हजेरी लावावी हे त्याला मनापासून आवडतं; कारण हे सगळे त्याचे मानबिंदू असतात. त्याच्या जगण्याचा अविभाज्य भागच म्हणा ना!

आजच्या वेगवान आयुष्याशी जुळवून घेतानाही आपल्या ह्या हौशी जपायला हाडाचा मऱ्हाठी माणूस विसरत नाही. ह्या हौशींची पूर्तता करायची त्याची परिमाणं मात्र थोडीफार बदलत गेलेली असू शकतात. उदाहरण द्यायचंच झालं, तर वेळेअभावी किंवा भारताबाहेर असल्याने त्याला हवं तेव्हा नाटक पाहायला जाता येत नसेल किंवा एखाद्या मैफलीला हजेरी लावता येत नसेल किंवा पुस्तक प्रदर्शनात हवा तेवढा वेळ रेंगाळता येत नसेल. पण म्हणून त्याच्या आयुष्यातून या गोष्टी हद्दपार होत नाहीत. तंत्रज्ञानाचा वापर करत, त्या 'ऑनलाइन' साजऱ्या होतात. बुद्धीची कास धरत मऱ्हाठी माणूस भावभक्तीत रंगून जातो. महाराष्ट्राच्या मातीतल्या माणसाची उत्सवप्रियता आणि हौस अनमोल आहे, हेच खरं.

अशा ह्या उत्सवसोहळ्याचे तुम्ही-आम्हीदेखील हौशी पाईक‌ आहोतच की! मिपावरसुद्धा आपण गणेशोत्सव दर वर्षी मोठ्या उत्साहात साजरा करत असतो. गणपतीचं आगमन आणि मिपास्थापनेचा दिवस असा आनंदोत्सवाचा दुहेरी योग असतो आणि ह्या उत्सवानिमित्त सादर होणाऱ्या लेखमालेची मिपाकर उत्सुकतेने वाट बघत असतात.

तर, आज श्रीगणेश चतुर्थीच्या दिवशी तुम्ही-आम्ही-सर्व मिपाकरांनी हातभार लावून साकारलेली श्रीगणेश लेखमाला २०१९ आपणां सगळ्यांपुढे सादर करताना आम्हाला मनापासून आनंद होत आहे! विविध विषयांवरचे लेख, कथा, कविता, मुक्तक, चित्रकला, दृक्-श्राव्य माध्यम वापरून सादर केलेली मुलाखत असं ह्या मालिकेचं स्वरूप आहे. गणपती म्हटला की त्याचा नैवेद्य आलाच! मिपाच्या बल्लव मंडळाने आपली जबाबदारी उत्तमरीत्या पार पाडत, आपल्या वैयक्तिक व्यग्र दिनक्रमांतूनही मिपा गणपती हा स्वतःच्या घरचाच गणपती आहे, ह्या भावनेने पाककृती सादर केल्या आहेत. त्यांचाही लेखमालेमध्ये समावेश आहे. आता या लेखमालेवर तुम्हा वाचक मंडळींच्या पसंतीची मोहोर उमटू देत, ही त्या गजाननाच्या चरणी प्रार्थना करतो आणि ही लेखमाला तुम्हांपुढे सादर करतो.

मिपा कुटुंबातील सर्व लेखक-वाचक-सदस्यांना आणि त्यांच्या कुटुंबीयांना श्रीगणेश चतुर्थीच्या आणि गणेशोत्सवाच्या हार्दिक शुभेच्छा!

श्रीगणेश तुमच्या सर्व मनोकामना पूर्ण करो, ह्या सदिच्छा!

विशेष
श्रीगणेश लेखमाला २०१९
वाचने 38148
प्रतिक्रिया 29

प्रतिक्रिया

तुषार काळभोर सोमवार, 02/09/2019 07:17

बॅनर, चित्र, पेज डिझाईन, लेख, सर्व काही अतिशय सुंदर!!

यंदाची श्रीगणेश लेखमाला मिपाच्या इतिहासात नोंदवून ठेवण्यासारखी होणार हे नक्की!!

मिपा वर्धापनदिनाच्या हार्दिक शुभेच्छा!!

डॉ सुहास म्हात्रे सोमवार, 02/09/2019 12:38

+१

श्री गणेश लेखमालेचे नवीन रुपडे अत्यंत आकर्षक आहे. खूप आवडले !

नंदन सोमवार, 02/09/2019 09:45

उत्तम लुक अँड फील. खूप श्रम घेऊन ही लेखमाला मिपाकरांसाठी आणल्याबद्दल धन्यवाद..

असेच म्हणतो. लेखमालेतील लेख वाचायला उत्सुक आहे.

प्रा.डॉ.दिलीप बिरुटे सोमवार, 02/09/2019 09:25

गणेशोत्सवाच्या हार्दिक शुभेच्छा!

-दिलीप बिरुटे

अनिंद्य सोमवार, 02/09/2019 09:35

प्रास्ताविक फस्क्लास !
लेखांची वाट पाहतो आहे.
मिपा वर्धापनदिनाच्या आणि गणेशोत्सवाच्या सर्वांना शुभेच्छा.

प्रा.डॉ.दिलीप बिरुटे सोमवार, 02/09/2019 10:40

ट्वीट्वीटिवाटची जवाबदारी पेलणार्‍यांचंही कौतुक आणि अभिनंदन.
आपापल्या परीने मिपा वाचकांपर्यंत पोहचवण्याचं मोठं काम.

ग्रेट.

-दिलीप बिरुटे

जेम्स वांड सोमवार, 02/09/2019 10:45

काय सुंदर अन फ्रेश डिझाईन आहे, सिम्पल प्रकारात चित्रलेला गणपती तर फारच भारी वाटला, पूर्ण टीमला भरपूर शुभेच्छा. लेख वाचण्यास अतिशय उत्सुक

किसन शिंदे सोमवार, 02/09/2019 13:22

मिपा वर्धापन दिनाच्या सर्व मिपाकरांना शुभेच्छा !! गलेमाची प्रस्तावना आणि एकुण सजावट उत्कृष्ट झालीये.

नाखु सोमवार, 02/09/2019 21:30

आणि विषय मुक्त दोन्हींचा समतोल राखण्यासाठी केलेली मेहनत,परीश्रम आणि चोखंदळ पणा दिसत आहे.

उत्तम लेखमाला,सगळे लेख वाचून त्यात्या मंडळाच्या अभिप्राय पुस्तिकेत नोंद करणार आहेच पण संपादक चमूचे अभिनंदन.

वाचकांचीच पत्रेवाला नाखु

सुधीर कांदळकर मंगळवार, 03/09/2019 06:47

सरस्वतीच्या प्रतीकाचा वापर पदकात खुबीने केलेला आहे. आणि १३ च्या आकड्यात पदक बसवण्याची कल्पना अभिनव. या विविध घटकांचे आकारमान जुळवणे अफलातूनच. ज्याच्या/जिच्या मनात हे साकार झाले त्याला तिला सलाम.


एखाद्या मैफलीला हजेरी लावता येत नसेल किंवा पुस्तक प्रदर्शनात हवा तेवढा वेळ रेंगाळता येत नसेल. पण म्हणून त्याच्या आयुष्यातून या गोष्टी हद्दपार होत नाहीत. तंत्रज्ञानाचा वापर करत, त्या 'ऑनलाइन' साजऱ्या होतात. बुद्धीची कास धरत मऱ्हाठी माणूस भावभक्तीत रंगून जातो. महाराष्ट्राच्या मातीतल्या माणसाची उत्सवप्रियता आणि हौस अनमोल आहे, हेच खरं.


हे एकदम पटले.

अशाच दर्जेदार कन्टेन्टच्या प्रतीक्षेत.

स्वाती दिनेश मंगळवार, 03/09/2019 19:18

प्रस्तावना छानच! लेख वाचेन आता एक एक..
सध्या व्यग्र असल्याने जेमतेम पाकृ देऊ शकले.. लेख द्यायचा होता परंतु वेळेअभावी आणि व्यग्रतेमुळे देऊ शकले नाही..
स्वाती

अलकनंदा बुधवार, 04/09/2019 15:52

महाराष्ट्रातला माणूस मुळात सण-उत्सव, कला-साहित्य, नाटक, काव्य, मुलाखती यांचा अभिलाषी आहे.

महाराष्ट्राच्या मातीतल्या माणसाची उत्सवप्रियता आणि हौस अनमोल आहे, हेच खरं.

अगदी, अगदी. गणराय देखणे आहेत.

जुइ शनिवार, 07/09/2019 19:31

श्रीगणेश लेखमालेसाठी काम करणार्‍या सार्‍यांचे मनापासून आभार आणि अभिनंदन!