[शशक' १९] - कल्याण

मुलासाठी माध्यम मराठी की इंग्रजी निवडावं? हा प्रश्न पडला होता. मायमराठीत प्राथमिक शिक्षण उत्तम हे तज्ञांचं मत योग्य वाटत होतं. इंग्रजी माध्यमातली मुलं स्पर्धेत पुढे जातात. तिथेच मुलाचं कल्याण होईल असं जनमत होतं. मराठी माध्यमात प्रवेश घेऊन आपण मुलाच्या कल्याणात बाधा आणली असं नको व्हायला म्हणून निमूटपणे इंग्रजी नर्सरीसाठी प्रवेश घेतला. शाळा जूनमधे चालू होण्यापूर्वीचा एक रविवार मुलाला चित्रातून ओळख करून देण्यासाठी निवडला. पुस्तकातल्या "अॅपलच्या" चित्रावर बोट ठेवून "अॅपल" म्हणायला सांगितलं. पण मुलगा म्हणाला "सफरचंद". मी पुन्हापुन्हा सांगूनही तो मलाच त्या चित्रासाठी त्याने अलिकडेच शिकलेला शब्दोच्चार शिकवत राहिला. "स-फ-र-चं-द". त्याचं कल्याण कशात ते त्याच्याकडूनच कळालं. मराठी माध्यम निवडलं. कल्याण झालं.