गुलाब पाक

दिवाळी पहाट असावी, वातावरणात गुलाबी थंडी असावी. अभ्यंगस्नानाची लगबग चालू आहे. सुगंधी तेल, उटणे आणि साबण यांचा वास घरात दरवळत आहे. जोडीला खास असे अत्तरही आहे. या सर्व सुगंधांबरोबरच काही गोड खायला मिळाले तर काय बहार येईल नाही? तर मग जाऊ या थोडे लांब... तिकडे कच्छ गुजरातमध्ये. अं... गोंधळलात? कच्छमध्ये काय आहे? प्रसिद्ध असे विशाल कच्छचे रण आहे, मिठागरे आहेत, सुबक सुंदर अशी जैन मंदिरे आहेत आणि हो, विसरून कसे चालेल? चटकदार अशी कच्छी दाबेली आहे.

आपण मात्र कच्छ येथील एक वेगळा प्रकार या दिवाळीत खाऊन बघू. नाव आहे 'गुलाब पाक'. मग लागा तर तयारीला. काय काय घ्याल?

• दीड लीटर म्हशीचे दूध (होल मिल्क)
• पाऊण वाटी साखर
• १ वाटी गुलाबाच्या पाकळ्या
• खायचा पिवळा रंग चिमूटभर
• ३-४ थेंब गुलाब इसेन्स
• सजावटीसाठी बदाम-पिस्त्यांचे बारीक काप.

चित्र उपलब्ध नाही

तयारी तर झाली, तर मग आता लागा कामाला. प्रथम एका मोठी कढईत दूध घालून ते आटवायला गॅसवर ठेवा. दूध आटवायला ठेवून मग अधूनमधून ते हलवत राहा, नाहीतर इतर कामांच्या धांदलीत ते खाली कढईला लागायचे ;-) .

चित्र उपलब्ध नाही

दूध आटून अर्धे झाले की मग त्यात साखर, रंग, गुलाबाच्या पाकळ्या आणि इसेन्स घाला. सर्व नीट हलवून दूध आणखी आटू द्या.

चित्र उपलब्ध नाही

चित्र उपलब्ध नाही

आता दूध जसे जसे आटू लागेल, तसे घरभर गुलाबाचा सुगंध दरवळू लागेल. ओह, फक्त सुगंधानेच भूक चाळवली वाटते!! पण म्हणतात ना - 'सब्र का फल मीठा होता है.' त्यामुळे धीर धरा आणि दूध अगदी घट्ट होऊ द्या. दूध आटून गोळा (खवा) होऊ लागेल.

चित्र उपलब्ध नाही

आता गॅस बंद करून एका ताटलीला तुपाचा हात लावून घ्या. त्यावर खव्याचा गोळा हाताला तूप लावून लगेच थापून घ्या. वर सजावटीचे पिस्ते-बदाम पेरून घ्या. हे काम करताना उगीच हातचे राखू नये ;-). अहो, मग खाताना आतून बर्फी मुलायम तर लागावीच, शिवाय थोडा क्रंचही हवाच, नाही का:-) .

चित्र उपलब्ध नाही

आता साधारण २५-३० मिनिटे बर्फी सेट होऊ द्या. फ्रीजमध्येही ठेवायला हरकत नाही. सेट झाल्यावर आपल्याला हव्या तशा कापून घ्या.

आता वाट कसली बघताय? या दिवाळीत आपल्या कुटुंबीयांसह आणि मित्रपरिवारासह सुवासिक आणि मुलायम गुलाब पाकाचा आस्वाद घ्या.

चित्र उपलब्ध नाही

चित्र उपलब्ध नाही

चित्र उपलब्ध नाही

ता. क. वेळ अन श्रम वाचवायला दुधाऐवजी थेट खवा वापरावा :-).

चित्र उपलब्ध नाही


सर्व मिपाकरांना आणि वाचकांना दिवाळीच्या सुगंधित शुभेच्छा!!!!!!!!!!