रेशमाच्या बाबांनी

प्रथम आमच्या परमस्नेही विसोबा खेचरांचे आणि समस्त मिसळपाव पंचायतिचे हे संकेत स्थळ चालू केल्याबद्दल मनापासुन आभिनंदन आणि हार्दिक शुभेच्छा.. आम्ही सभासद व्हायच्या आधीच आमच्या नावांने इथे शिमगा चालू असलेला बघून आम्ही धन्य झालो..असो.. सध्या जालावर आम्हाला फारसा चांगला कच्चा माल मिळत नसल्यामुळे आमची गोची झाली आहे..म्हणून वेळ काढायला .. जालावर मराठी गाणी ऐकत होतो . तेव्हा शांताबाई शेळक्यांचे रेशमाच्या रेघांनी लालकाळ्या धाग्यांनी हे सुरेख गाणे ऐकायला मिळाले आणि आम्हाला ते 'प्रसव' का काय म्हणतात त्या वेदना सुरू झाल्या जित्याची खोड मेल्याशिवाय कशी जाणार रेशमाच्या बाबांनी, काल लाथा बुक्क्यांनी बाकपुरा आहे माझा काढीला हात नगा लावू माझ्या बॉडीला ! चूक झाली माझी लाखमोलाची विचारल मी ही पोर कोणाची विसरलो आहेकोण आहेकोण जोडीला हात नगा लावू माझ्या बॉडीला ! जात होती वाटेनं ती तोऱ्यात अवचित आला बाबा म्होऱ्यात आणि माझ्या नरडीला धरूनीया ओढीला हात नगा लावू माझ्या बॉडीला ! भीड नाही केली आल्यागेल्याची मागितली माफी मी त्या मेल्याची म्हणेन मी आता ताई, तुमच्या या घोडीला हात नगा लावू माझ्या बॉडीला ! केशवसुमार

लेखनविषय:	विडंबन

वाचने 38327

प्रतिक्रिया 43

प्रतिक्रिया

अवचित आला बाबा म्होऱ्यात :)

विसोबा खेचर गुरुवार, 20/09/2007 00:31

आणि आम्हाला ते 'प्रसव' का काय म्हणतात त्या वेदना सुरू झाल्या अच्छा! म्हणजे आपलं मराठी आंतरजालीय वाचन साईनऑफ स्थितीत राहूनसुद्धा बर्‍यापैकी सुरूच असतं वाटतं! की अलिकडेच कधी विल्मिंगटनच्या काकांकडे च्चक्कर टाकली होतीत? :) असो! 'रेघांनी' च्या जागी 'बाबांनी' हा शब्द फार आवडला. तसेच 'हात नगा लावू माझ्या बॉडिला' ही ओळ इतकी चित्रदर्शी वाटली की ती वाचताना, संजोपरावांच्या बंगल्यावर भेटलो असताना टीशर्ट आणि लुंगी या पेहेरावात पाहिलेली तुमची बेताची (!) बॉडीही डोळ्यासमोर आली! :) जात होती वाटेनं ती तोऱ्यात अवचित आला बाबा म्होऱ्यात ह्यातला 'बाबा' हा शब्द फार आवडला. जवानीत आम्ही ज्या पोरीवर जिवापाड लाईन मारत होतो तिचा खत्रूड चेहेर्‍याचा जन्मदाता डोळ्यासमोर आला! व्वा, फारच चित्रदर्शी विडंबन..:) म्हणेन मी आता ताई, तुमच्या या घोडीला हात नगा लावू माझ्या बॉडीला ! सुंदर..:) केशवराव, मिसळपाववर आपलं सहर्ष स्वागत आहे. आपली उत्तमोत्तम विडंबने आणि कविता आम्हाला येथे वाचावयास मिळोत हीच सदिच्छा! 'कच्चा माल' हवा असेल तर तूर्तास आम्ही अशोक गोडबोले या आमच्या कवीमित्रास येथे आणलेले आहे. त्यांना जमल्यास एखाददा ट्राय करा! :) आपाला, (परमस्नेही व आडनांवबंधू!) तात्या.

सहमत / सावधगिरी

बेसनलाडू गुरुवार, 20/09/2007 06:49

'रेघांनी' च्या जागी 'बाबांनी' हा शब्द फार आवडला. तसेच 'हात नगा लावू माझ्या बॉडिला' ही ओळ इतकी चित्रदर्शी वाटली सहमत आहे. त्याचबरोबर तुमच्या घोडीला ताई म्हणेन, हे तर खल्लास!!! विषयात तोचतोचपणा असला, तरी फिट्ट बसणारी शब्दयोजना लेखनाला वेगळाच स्वाद प्राप्त करून देते, याचे हे विडंबन उत्तम उदाहरण म्हणता येईल. की ती वाचताना, संजोपरावांच्या बंगल्यावर भेटलो असताना टीशर्ट आणि लुंगी या पेहेरावात पाहिलेली तुमची बेताची (!) बॉडीही डोळ्यासमोर आली! :) याबाबत काही मत मांडणे तूर्तास शक्य नाही. जवानीत आम्ही ज्या पोरीवर जिवापाड लाईन मारत होतो तिचा खत्रूड चेहेर्‍याचा जन्मदाता डोळ्यासमोर आला! व्वा, फारच चित्रदर्शी विडंबन..:) पुन्हा सहमत!!! केशवराव, मिसळपाववर आपलं सहर्ष स्वागत आहे. आपली उत्तमोत्तम विडंबने आणि कविता आम्हाला येथे वाचावयास मिळोत हीच सदिच्छा! 'कच्चा माल' हवा असेल तर तूर्तास आम्ही अशोक गोडबोले या आमच्या कवीमित्रास येथे आणलेले आहे. त्यांना जमल्यास एखाददा ट्राय करा! :) बापरे!! अनेक होतकरू विडंबनकारांसाठी 'मिसळपावचे सदस्यत्त्व घेतल्यास कच्चा माल आणि तो पुरवणारे दोन्ही फ्री' छापाची जाहिरात तर नाही ना वाटत ही? सावधगिरी बाळगा हो तात्या; उद्या कविता/गीते/गझलाबिझला लिहिणारे कच्चा माल म्हणून विडंबने आणि केशवसुमार वा तत्सम कुणीतरी ट्राय करायला मागायचे ;) :) (सावध) बेसनलाडू

केशवसुमारांची बॉडी बेताची?

सन्जोप राव गुरुवार, 20/09/2007 07:04

संजोपरावांच्या बंगल्यावर भेटलो असताना टीशर्ट आणि लुंगी या पेहेरावात पाहिलेली तुमची बेताची (!) बॉडीही डोळ्यासमोर आली! दोन चुका तात्या. बंगला सन्जोप रावांचा नाही (जशी सर्किटला तुम्ही जीतून फिरवले ती गाडी तुमची नाही!) आणि केशवाची बॉडी बेताची? हां अर्थात तुमच्या आमच्या तुलनेत बेताचीच, पण तरीही आज उद्या नंबर तपासून घ्या. (चाळीशी आली आता!) सन्जोप राव

नजर नगा लावू माझ्या बॉडीला

केशवसुमार शुक्रवार, 21/09/2007 18:42

देवगडच्या तात्यांनू अन कोल्हापूरच्या रावांनू विषय माझ्या बॉडीचा का काढीला नजर नगा लावू माझ्या बॉडीला.. चूक झाली माझी लाखमोलाची दाखिवीली बॉडी तुम्हा बेताची विसरलो आहेकोण आहेकोण जोडीला नजर नगा लावू माझ्या बॉडीला ! भीड काही ठेवा आल्यागेल्याची वाकडी ही नजर तुम्हा मेल्यांची घाबरून असतो "केश्या" , तात्या तुमच्या जाडीला नजर नगा लावू माझ्या बॉडीला !

:))

विसोबा खेचर शुक्रवार, 21/09/2007 18:48

ख ल्ला स !!! अरे केशवा, लेका किती कविता आणि विडंबनं प्रसवशील?! :)

तात्काल प्रसव

सर्किट (verified= न पडताळणी केलेला) शुक्रवार, 21/09/2007 21:42

घाबरून असतो "केश्या" , तात्या तुमच्या जाडीला हा हा हा !!! केशवसुमारजी, साष्टांग दंडवत ! दुसरे शब्दच नाहीत ! आपल्याला एक आयडीया देतो. एकाच कवितेची शंभर विडंबने करून त्याचा संग्रह प्रकाशित करावा. मराठीत तार काय, कुठल्याही भाषेत आजवर असा प्प्रयोग झाला नाही. - सर्किट

शंभर !!!

केशवसुमार शनिवार, 22/09/2007 12:15

काय राव गमज्या करताय का गरीबाची.. बाकी सर्किटशेठ आयडीयेची युक्ती बेस्टच आहे.. केशवसुमार

धमाकेदार सुरुवात !

सर्किट (verified= न पडताळणी केलेला) गुरुवार, 20/09/2007 00:51

मागील पानावरून पुढे चालू ! मस्तच ! - सर्किट

वा

गुंडोपंत गुरुवार, 20/09/2007 02:20

सहर्ष स्वागत आहे! आपला गुंडोपंत

मस्त

सहज गुरुवार, 20/09/2007 06:34

दिवसाची सूरवात तर छान झाली!!

स्वागत

आजानुकर्ण गुरुवार, 20/09/2007 08:20

धमाकेदार सुरुवात.

स्वासुगम्मत!

विसुनाना गुरुवार, 20/09/2007 11:20

वा! वा! सुस्वागतम्म! तुमच्या विडंबनामुळेच लोकांना (केवळ कुतुहलापोटी) मूळ कविताही वाचणे भाग पडते. तुम्ही आलात.. आता लिहायला हरकत नाही. ;)

हेच

स्वाती दिनेश गुरुवार, 20/09/2007 11:50

तुमच्या विडंबनामुळेच लोकांना (केवळ कुतुहलापोटी) मूळ कविताही वाचणे भाग पडते. असेच... स्वाती

फरमास

सुरेखा पुणेकर गुरुवार, 20/09/2007 11:32

हात नगा लावू माझ्या बॉडीला ! यिडांबान फरमास हाये. आनकी यखाद्या लावनीचं यिडांबान द्या की आमास्नी करून. नका जाऊ पावनं जरा थांबा ....

मी म्हणतो

झकासराव गुरुवार, 20/09/2007 11:45

जवानीत आम्ही ज्या पोरीवर जिवापाड लाईन मारत होतो>>>>>>>>.. तात्या मग आता खरच म्हातार झालात की काय? आता लायनी मारण बंद केल की काय? तात्या तुमच्या एका वाक्यातुन दोन प्रश्न तयार झाले आहेत. :) केसु तुझ विडंबन आवडल रे.

फर्मास!

प्रमोद देव गुरुवार, 20/09/2007 12:25

केशवसुमारांचे इथले आगमन अगदी झोकात झालेले आहे. पहिल्याच चेंडूवर सणसणीत षटकार ठोकलाय त्यांनी. ह्यापुढेही त्यांची झंझावाती टोलंदाजी आम्हा सगळ्यांना पाहायला मिळेल अशी आशा करतो.

रेशमाच्या

बाबुराव गुरुवार, 20/09/2007 14:19

रेशमाच्या भावांनी,रेशमाच्या काकांनी तब्येतीने ठोकीले हो बॉडीला हात नग लावू या येड्याला. अश्या वळी घूसाडायला होत्या, बाकी जोरदार लिव्हले बरं का.

हहलोपो!

जगन्नाथ गुरुवार, 20/09/2007 22:32

हहलोपो!

फर्मास

धनंजय शुक्रवार, 21/09/2007 02:06

हा माणूस बिन-विडंबनाच्या कविता कुठल्या आयडीखाली लिहितो ते कोणी सांगा मला. कारण लिहीत असलाच पाहिजे!

माझ्या माहितीप्रमाणे नाही

सर्किट (verified= न पडताळणी केलेला) शुक्रवार, 21/09/2007 23:58

माझ्या माहितीप्रमाणे केशवसुमारांच्या मेंदूत बिन-विडंबनाच्या कविता करण्याच्या राखाडी पेशीच नाहीत. आणि तेच बरे आहे :-) - सर्किट

आडनावबंधू

बेसनलाडू शनिवार, 22/09/2007 00:01

तात्यांचे हे आडनावबंधू त्यांच्या मूळ नावानेही छान कविता लिहितात आणि यापूर्वीही लिहिल्या आहेत, ही खरी गोष्ट आहे. पण सध्या त्यांना स्वतःला त्यांच्या या प्रतिभेचे मोल कवडीमोल वाटते, असे खात्रीलायकरित्या समजते ;)

च्यामारी..

केशवसुमार शनिवार, 22/09/2007 12:01

बेशनशेठ, हा अंतरजालाच्या आचारसंहितेचा भंग आहे.. लोकांची गुपिते अशी चावडीवर बोलू नये.. पण छान का काय ते म्हणालात ना म्हणून निषेध नाही करत..;) पण तुमचे बातमीदार तुम्हाला खरच खात्रीलायक बातम्या देतात का ते बघा बुवा.. (लाडूप्रेमी) केशवसुमार

संशोधन

बेसनलाडू रविवार, 23/09/2007 01:06

छे हो, कसले बातमीदार बितमीदार!!! हा आमच्या 'संशोधनाचा' निष्कर्ष आहे. नाहीतरी इकडे बरेच 'संशोधन' चालू असतेच; म्हटले आपणही करावे थोडे ;) काय? (संशोधक!)बेसनलाडू

पांढरा शर्ट

आजानुकर्ण शनिवार, 22/09/2007 08:32

केशवसुमार जेव्हा पांढरा शर्ट घालतात तेव्हा बिनविडंबनाच्या कविता लिहितात. आणि काळा शर्ट घालतात तेव्हा विडंबनाच्या. (शिष्योत्तम) आजानुकर्ण ;)

आधुनिक एकनाथ?

प्रमोद देव शनिवार, 22/09/2007 09:30

आजानुकर्ण हा आधुनिक एकनाथ दिसतोय. संजोप राव,केशवसुमार वगैरे ह्याचे बरेच (२१)गुरु दिसताहेत.

एकनाथ की एकलव्य?

विसोबा खेचर शनिवार, 22/09/2007 09:38

आजानुकर्ण हा आधुनिक एकनाथ दिसतोय. संजोप राव,केशवसुमार वगैरे ह्याचे बरेच (२१)गुरु दिसताहेत. तुम्हाला एकनाथ ऐवजी एकलव्य असं म्हणायचंय का प्रमोदकाका? अहो बिचार्‍या आमच्या नाथांना कशाला उगाच मध्ये आणताय? :)) आपला, (भागवतधर्मी) तात्या.

एकनाथच!

प्रमोद देव शनिवार, 22/09/2007 11:28

कारण एकनाथांनी २१ गुरु केले होते असे नुकतेच कुठे तरी वाचल्याचे स्मरते. आजपर्यंत तू रावसाहेबांना आपला गुरु मानत होतास(भले ते तुला त्यांचा शिष्य मानोत अथवा न मानोत.... अस्सल पुणेकर...इति.पुलं).पण आज केशवसुमारांचेही पट्टशिष्यत्व पत्करलेस तेव्हा शंका आली. म्हटले हा देखिल नाथांचा आधुनिक अवतार दिसतोय (गुरु बनवण्याच्या बाबतीत).

एकनाथच बरा, एकलव्य नको

धनंजय शनिवार, 22/09/2007 23:27

पावसाळ्यात सुळकेबिळके चढून "आम्ही मराठी माणसं मनात आणलं तर असं वाटेल ते करू शकतो" म्हणायला आम्हाला जागा ठेवतात. उद्या बिन-अंगठ्यांनी एकलव्यांनी हेच पराक्रम केलेत आमच्या आळशी स्वाभिमानाचा पुरताच चंदामेंदा होईल.

गौप्यस्फोट

सहज शनिवार, 22/09/2007 09:38

बघा देव साहेब केलात घाया. घ्या आता राहिलेल्या १९ सीट भरायला गुरूंची ही तारांबळ उडणार आहे की एखादा शिष्यच जाणे.. शिवाय ही बातमी सुटीच्या दिवशी जाहीर केलीत, लांब गावच्या भावी गुरूंना नाराज केलत.

बोर्डातील विद्यार्थी

प्रकाश घाटपांडे शनिवार, 22/09/2007 10:33

बोर्डात आलेल्या विद्यार्थ्याच्या नावावर इतके क्लास वाले आपला विद्यार्थी, असा शिक्का मोर्तब करतात कि हा आपले शाळा कॉलेज संभाळून किती क्लासला एकाच वेळी जात होता असा प्रश्न पडतो. प्रकाश घाटपांडे प्रकाश घाटपांडे

घोळ..

केशवसुमार शनिवार, 22/09/2007 11:53

प्रमोदशेठ, काय हे तुम्ही तुमच्या आवडत्या लेखकाचे आमच्याबद्दलचे हे वाक्य कस काय विसरलात? बर जाऊदे ते वाक्य इथे वाचा . बाकी अजानूकर्णशेठ तुम्ही खरोखरच शिष्योत्तम आहात.. गुरुची सगळी वाक्ये तुम्हाला तोडंपाठ दिसतात.. केशवसुमार

वरील कविता

अनिला शनिवार, 29/09/2007 19:50

आहो, एवधे सुन्दर विड्म्बन अवघ्या त्रिख्डात वाचले नव्ह्ते.

या वरून आठवले...

विकास रविवार, 30/09/2007 08:33

फारच मस्त विडंबन आणि पुढे अजून उस्फुर्त काव्य! अशा लोकांबद्दल आदर आणि अचंबा वाटतो! "रेशमाच्या बाबांनी" या ओळी वाचल्यावर एकदम "गंगा-यमुना डोळ्यात उभ्या का? " या गाण्याच्या या पहील्याच ओळींवरून मला वाटते वि.आ. बुवांनी विनोद केल्याचे आठवते की, "कवीला खरे तर आपल्या शेजारातील दोन मुलींच्या वागण्यावरून प्रश्न पडला आहे - गंगा यमुना बोळात उभ्या का?" याची आठवण झाली!