पार्थ म्हणे 'गा हृषीकेशी | या युद्धाची ऐशीतैशी बेहत्तर आहे मेलो उपाशी | पण लढणार नाही ! - चालचलाऊ गीता, जयकृष्ण केशव उपाध्ये

विडंबन.. मराठी वाङमयामधील एक विशेष प्रकार. एखाद्या लोकप्रिय रचनेचे (बहुतेकदा विनोदी अथवा उपहासात्मक) अनुकरण, अशी विडंबनाची साधारण व्याख्या करता येईल. मराठी लेखनात दर्जेदार विडंबनाची दीर्घ परंपरा आहे. इतकी, की अगदी श्रीमद्भगवद्गीतेवर मराठीत ज्ञानेश्वरांनी टीका केली आणि उपाध्यांनी त्याचेही विडंबन केले. मिपावर तर अनेक कवितांचे लेखन हे अट्टल विडंबनकरांना फुलटॉस चेंडूसारखे वाटते. विशेष म्हणजे मूळ 'प्रेरर्णा' असलेली कविता लिहिणारा सदस्यही ते विडंबन खिलाडू वृत्तीने घेतो. खरे तर, आपल्या लेखनावर, कवितेवर विडंबन करण्याची प्रेरणा मिळणे, ही बहुतेक लेखकांना कौतुकाची पावती वाटते. म्हणूनच यंदाचा मराठी भाषा गौरव दिन मिपावर 'विडंबन' विशेष म्हणून साजरा करणार आहोत. कसा? मिपावर अनेक उत्तमोत्तम लेख, कविता आहेत. मराठीत अनेक थोर लेखकांचे लोकप्रिय लेखन आहे, उत्कृष्ट कवींच्या प्रसिद्ध कविता आहेत. 'लिजंड' म्हणून गाजलेले काही आंतरजालीय लेखन आहे (ब्रह्मे!). त्यावरून प्रेरणा घेऊन त्याला विनोदाची फोडणी द्या आणि येऊ द्या विडंबन. तुमचे लेखन दिनांक

२२ फेब्रुवारी २०२३

पर्यंत साहित्य संपादकांना व्यनिने पाठवा. नियम : १. इतर मराठी संकेतस्थळांवरील (जर ते लेखन मिपावर नसेल तर) लेखनाची प्रेरणा नको. २. आपल्या लेखनाचे विडंबन आल्यास, ते आपले कौतुक आहे, असे समजा. तर, सरसावा बाह्या, उधळू द्या तुमच्या कल्पनांचे वारू, येऊ द्या वाचकांच्या चेहऱ्यावर हसू... लक्षात ठेवा, तुमचे लेखन दिनांक

२२ फेब्रुवारी २०२३

पर्यंत साहित्य संपादकांना व्यनिने पाठवा.