-----

मितान's picture
मितान in जे न देखे रवी...
21 Mar 2017 - 4:56 pm

परकी दुःखं दाराशी येतात तेव्हा
हळूच कुरवाळावी
पाहुण्या आलेल्या मांजराला कुरवाळतो तशी.
त्याची पावलं उमटणार नाहीत,नख्या लागणार नाहीत इतपत सलगी करावी...
जिव्हाळ्याच्या आवाजात गुजगोष्टी कराव्या
त्याच्याच आवाजात बोलण्याचे सुख भोगून घ्यावे..
झेपले तर थोडा दूधभात घालावा
म्हणजे ते अजून लाडीगोडी लावेल...
कोण कुठले गरीब बिचारे
देवा ! आई गं ! अरेरे ! वगैरे..
मनी साठलेले सुस्काऱ्यांचे घट रिकामे करत
जड वाटल्याचे भासवत हलके हलके व्हावे !
परोपकाराची साय दाट झाली की मग मात्र त्या मांजराला विसरून जावे!
जणू ते अस्तित्वातच नव्हते..नाही...नसणार !
एवढे करून चिरेबंदी वाड्यात परतताना
पाहुण्या मांजराकडून कृतज्ञतेची अपेक्षा मात्र नक्कीच करू नये
नाहीतर आपलेही तसे एक मांजर होते म्हणे !

मुक्त कविताकविता

प्रतिक्रिया

पैसा's picture

21 Mar 2017 - 5:27 pm | पैसा

हम्म....

पद्मावति's picture

21 Mar 2017 - 5:35 pm | पद्मावति

कच्च्कन काटा रुतावा तशी टोचणारी कविता. प्रचंड प्रभावी.

प्रीत-मोहर's picture

21 Mar 2017 - 7:03 pm | प्रीत-मोहर

कविता दिनाला लिहिलेली सुंदर कविता. एक छोटीशी कळ आली काळजात कविता वाचून.

प्राची अश्विनी's picture

21 Mar 2017 - 7:52 pm | प्राची अश्विनी

हो ना, पुन्हा पुन्हा वाचतेय, प्रत्येक वेळी नवीन काही कळत जाते. खूप सुंदर!!

Pradip kale's picture

21 Mar 2017 - 7:52 pm | Pradip kale

छान कविता.
संदीप खरेंची "दु:ख येतेच" ही कवीताही वाचण्या सारखी आहे. बहुतेकांनी वाचलीही असेल.

आनंदयात्री's picture

21 Mar 2017 - 8:01 pm | आनंदयात्री

जनमानसात त्या मानाने रुळलेल्या, सोसेल तेवढेच बेगडी परोपकार करण्याच्या टोचणीचे चित्रण छान केलेय. "मांजर होते म्हणे" या ओळीतून "म्हणतात म्हणे" या चालीवर रेटली जाणारी अनेक उदाहरणे आठवली. शेवट या ओळींनी झाल्याने कविता विशेष आवडली.

सत्यजित...'s picture

21 Mar 2017 - 10:44 pm | सत्यजित...

सहज-सोपं करुन लिहिणं म्हणजे अवघड काम!
अतिशय मार्मिक !अभिनंदन!

अत्रुप्त आत्मा's picture

23 Mar 2017 - 12:07 pm | अत्रुप्त आत्मा

सहज-सोपं करुन लिहिणं म्हणजे अवघड काम!
अतिशय मार्मिक !अभिनंदन!

››› प्लस वन.

चांदणे संदीप's picture

21 Mar 2017 - 11:33 pm | चांदणे संदीप

.

Sandy

मारवा's picture

22 Mar 2017 - 7:49 am | मारवा

व संवेदनशीलता दोन्ही ची मागणी एकाच वेळी करतात. त्यातुन होणारी जीवाची घालमेल किंवा मनाच्या समरस होउ पाहण्याची आस या कवितेची प्रेरणा असावी का ?

कविता दिनाला लिहिलेली सुंदर कविता. एक छोटीशी कळ आली काळजात कविता वाचून. +१

अनन्त्_यात्री's picture

22 Mar 2017 - 10:36 am | अनन्त्_यात्री

सुन्दर !! आत्तापर्यन्त श्रॉडि॑जरच॑ (क्यू.एम. मधल॑) एकच मा॑जर मनात घर करून होत॓. आता हे दुसर॓ बरेच दिवस पाठलाग करणार !

बर्‍याच गोष्टी डोळ्यासमोरुन गेल्या. सुंदर आहेच हेवेसांनल!

सानझरी's picture

22 Mar 2017 - 1:13 pm | सानझरी

__/\__ सुन्दर..

परोपकाराची साय दाट झाली की मग मात्र त्या मांजराला विसरून जावे!
जणू ते अस्तित्वातच नव्हते..नाही...नसणार !

जब्बरदस्तच की.
.
इंटरन्याशनल कवितेचे सबस्टन्स आहेत राव.

विभावरी's picture

22 Mar 2017 - 2:22 pm | विभावरी

छानच !

बबन ताम्बे's picture

22 Mar 2017 - 2:26 pm | बबन ताम्बे

खूप भावली.

पलाश's picture

22 Mar 2017 - 2:33 pm | पलाश

कविता फार आवडली.
...
पाहुण्या मांजराकडून कृतज्ञतेची अपेक्षा मात्र नक्कीच करू नये
नाहीतर आपलेही तसे एक मांजर होते म्हणे !

हे तर अगदीच खास!!!!

सर्व वाचक प्रतिसादकांचे आभार !
शीर्षक काही सुचले नाही या कवितेला :(

शार्दुल_हातोळकर's picture

22 Mar 2017 - 4:39 pm | शार्दुल_हातोळकर

मस्त !!

नूतन सावंत's picture

22 Mar 2017 - 8:14 pm | नूतन सावंत

निशब्द!!!!!

इडली डोसा's picture

23 Mar 2017 - 11:49 am | इडली डोसा

आवडली

रेवती's picture

23 Mar 2017 - 9:41 pm | रेवती

कविता आवडली.

सत्यजित...'s picture

14 Apr 2017 - 2:22 am | सत्यजित...

काय गजब लिहिल्या गेलं आहे हे!
वाचून-वाचून पाठ झालंय तरी वाचल्यावाचून राहत नाही!

शीर्षकाची तशी उणीव अशी भासत नाही काहीच,पण तरी 'दुःख आणि मांजर' असं साधं किंवा 'नाहीतर आपलेही...'असं,सुचवतोय सहज!

'दुःखानुभूतीचे मर्म' उलगडणारा 'सफल राजमार्ग' वाटते ही रचना! पुनःश्च अभिनंदन! लिहीत रहा!