IT मधल्या लोकांना (म्हणजे मी.. ) नीट काही जमत नाही असा माझ्या मातोश्रींना जाम विश्वास आहे . निदान यावेळेस तरी बाप्पाला काहीतरी स्वतः बनवून खाऊ घाल असा विनंतीवजा हुकूम आल्यावर मी आणि बाप्पाने एकाचवेळेस आवंढा गिळला .. नेमकं काय बनवायचं याच्यावर विचार करताना - ते सोपं पाहिजे, चवीला चांगलं पाहिजे , दिसायलाही छान दिसलं पाहिजे , मेहनत कमी हवी आणि अतिमहत्वाचं म्हणजे बाप्पा आणि मातोश्रींना ते आवडलं पाहिजे . ..खूप विचार करून (कोण गुगल म्हणालं?) हि सोपी रेसिपी - साधे सोपे मलई पेढे साहित्य: १ कप घरी बनवलेले मऊ पनीर २ चमचे मिल्क पावडर १ चमचा क्रीम ४ चमचे साखर वेलची पावडर केशर काड्या सजावटीसाठी कृती ; १. पनीर, साखर, मिल्क पावडर, क्रीम हे सगळं हाताने नीट एकत्र करून घ्या. २. मिश्रण नॉनस्टिक कढईमधे मध्यम आचेवर परता. सारखं परतत राहायला लागेल..हात दुखतोय वगैरे म्हणालं तर तिकडून लगेच फुकटचा आहेर .. मग आम्ही कसे करत होतो.. आणि मग पुढचे डायलॉग माहित असतीलच. (तुझ्या वयात मला २ पोरं होती... ) ३. मिश्रण कोरडं होऊन कढईला चिकटेनास झालं कि ते ताटामध्ये काढून घ्या. वेलची पावडर घालून मिश्रण मळून घ्या. जर मिश्रण मऊ वाटत नसेल किंवा मिळून येत नसेल तर मिक्सरमधून अगदी थोड्या वेळासाठी फिरवून घ्या आणि पेढे बनवा. ४.सजावटीसाठी केशराची काडी लावा फोटोत जरी फिल्टर वापरला असला तरी दिसायला खरंच छान झाले होते आणि चवीलासुद्धा .. . . .