साक्षीदार ....... मी निर्दोष आहे हे कसे सिद्ध करणार..... तो किनारा सगळं पुसून मूक बनून हसतोय, समुद्राच्या लाटा उलटच उत्तरे देतायत, डोळेही हे नजरेला नजर देत नाहीयेत , पारिजातकाची फुलेही गंधांसकट कोमेजून गेलीत ? सगळे साक्षीदार विरोधात जातील कुणास ठाऊक होते , पण मी अजूनही हार मानली नाहीये ...... मला बंदिवासात अडकायचं नाहीये .... प्रेम मी केलंच नाहीये हेच सिद्ध करतीये ... ...... "खरंच " ? ....... . पुरावे शोधत आहे मी अजूनही भावनांचे गाठोडे उघडून पाहते , माळ्यावरच्या आठवणी झटकून पाहते, अंगणातल्या मातीमध्ये उकरून पाहते , झाडावरच्या पक्षांना परत एकदा विचारून पाहते , मनातल्या पेटीमध्ये डोकावून पाहते , कुठेतरी सापडतीलच ........ ........ काहीच न बांधू शकलेले ते तुटक धागे, स्वतःच भिजलेल्या त्या पावसाच्या सरी, तुझ्या वाटेकडे न पाहणारे पाणावलेले डोळे, तुझ्या तळहातावर न ठेवता उमललेल्या कळ्या , तुला न दिलेली अबाधित वचने, आणि याच्याशी काहीच देणं घेणं नसलेला 'तू' ..... 'तू' भेटलास कि तूच देशील साक्ष "अनोळखी " असल्याची ........ बस्स , आता उरले काय ! ........ माफीचा साक्षीदार म्हणून 'माझे मन' घोषित केले जाईल ...... पण पर्वा नाही .... आजकाल तसंही ते माझं काही ऐकत नाही ...... !!! ......... फिझा