मराठी साहित्य, संस्कृती आणि लेखनाचे व्यासपीठ
प्रवेश करा | सदस्य व्हा
मिसळपाव मराठी माणसांचे ऑनलाईन व्यासपीठ

गर्भपातल्या रानी .....!

गंगाधर मुटे · · जे न देखे रवी...
लेखनविषय:
वाङ्मय
कविता
काव्यरस
अभय-काव्य
वाङ्मयशेती
गर्भपातल्या रानी .....!

गारपीटीच्या अंगसंगाने
गर्भपातल्या रानी
अश्रू होऊन हवेत विरले
पाटामधले पाणी

एका एका झाडावरती
पक्षी हजारो होते
क्षणात पडले सड्याप्रमाणे
सरली सारी कहाणी

हातामधला हात सुटूनी
घरटे विच्छिन्न झाले
बुंध्याभवती जमीन नहाली
रक्ताळल्या पिलांनी

ऊस झोपला, कापूस निजला
खुरटून गेल्या बागा
जगण्या-मरण्यामधले अंतर
उरले नसल्यावाणी

शाबूत उरल्या धान्यवखारी
बंगले, महालमाडया
अन्नदात्याचे ‘अभय’ गेले
गेले दाणापाणी

         -  गंगाधर मुटे ‘अभय’
==0=^=0=^=0=^=0=^=0==

वाचने 5001 वाचनखूण प्रतिक्रिया 16

एक एकटा एकटाच 16/03/2015 - 10:42
खरच ज्याच्यावर विसंबून सगळा जगण्याचा प्रपंच मांडायचा तोच जर का जीवावर उठला तर दाद तरी कुणाकडे मागायची?

ऊध्दव गावंडे 16/03/2015 - 13:50
वर्ष भर पाऊस असा आला जेणेकरुन नुकसान कसं होईल .त्यामुळे पीक नाही . जे थोडं बहुत पीकलं त्याला भाव नाही . माय बाप सरकार असं आलं ज्याला शेती मातीशी काही घेणं देणं नाही . शेतकऱ्याने कोणा कडे पाहावे ?

एस 16/03/2015 - 14:58
कविता पोहोचली.

नगरीनिरंजन 18/03/2015 - 18:58
कविता आवडली! पण ज्या ठिकाणी आज शेतं आहेत तिथेच कधीकाळी एका जंगलाचा गर्भ पाडला गेला असेल; त्याचाच शाप आहे हा आपल्या सगळ्यांना असं वाटल्याशिवाय राहात नाही.

विवेकपटाईत 18/03/2015 - 19:53
गारपिटीचे फोटो मेलेल्या पक्ष्यांचे फोटो झोपलेल्या शेतांचे फोटो सर्वच काही फेसबुक वर मित्रांसोबत शेयर केले सांयकाळी टीवी वर घूँट घूँट पीत चहा शेकऱ्यांच्या व्यथा गटकण्या शिवाय मी काहीही केले नाही.

खटपट्या 18/03/2015 - 22:38
हातामधला हात सुटूनी घरटे विच्छिन्न झाले बुंध्याभवती जमीन नहाली रक्ताळल्या पिलांनी
सून्न