चिकन चिली

साहित्य- ५०० ग्राम बोनलेस चिकन, २ ते ३ हिरव्या मिरच्या मध्ये फोडून लांब चिरुन (पोपटी मिरच्या कमी तिखट असतात, गडद हिरव्या मिरच्या घ्या. तरीही जास्त तिखट हवे असल्यास एखादी मिरची वाढवा..) १ मोठी किवा दोन लहान भोपळी मिरच्या लांब तुकडे करुन त्यातील बिया राहू द्यात. १ मध्यम कांदा- खेकडा भज्यांना चिरतो तसा. २ ते ३ टेबलस्पून कॉर्न फ्लोअर, २ ते ३ टेबलस्पून सोया सॉस, १ चमचा चिली सॉस, १ चमचा मिरपूड, १ चमचा विनेगर किवा लिंबाचा रस १ अंडे ७-८ लसूण पाकळ्या बारीक चिरुन (मोठ्या पाकळ्या असतील तर ३ ते ४) २ चिमटी अजिनोमोटो (ऑप्शनल) तेल, मीठ, पाणी कृती- चिकनचे बोटाच्या आकारचे लांब तुकडे करा. त्यात २ चमचे कॉर्न फ्लोअर,चमचाभर मिरपूड,१/२ चमचा मीठ घाला.१ अंडे फोडून घाला,१ टेबलस्पून सोया सॉस घाला व कालवा. मॅरिनेशनसाठी फ्रिजमध्ये साधारण अर्धा तास ठेवा. चिकन मॅरिनेट होईपर्यंत बाकीचे इतर लागणारे जिन्नस समोर काढून ठेवा व भाज्या चिरुन ठेवा. चिनी जेवण मोठ्या आचेवर आणि पटापट करावे लागते म्हणून सग़ळे जिन्नस हाताशी ठेवा. एका पसरट पॅन मध्ये/ चिनीवोक मध्ये साधारण ३ टेबलस्पून तेल गरम करुन घ्या व त्यात हे मॅरिनेटेड चिकनचे तुकडे लालसर रंगावर शॅलो फ्राय करा व बाजूला काढून ठेवा. जास्त शिजवू नका कारण नंतर परत शिजवायचे आहे. खरं म्हणजे चिकनचे तुकडे तेलात तळतात पण मी थोड्या कॅलरी वाचवायला शॅलो फ्राय करते. आता आच मोठी ठेवा व त्याच पॅनमध्ये उरलेल्या तेलात लसणीचे तुकडे घाला व परता. हिरव्या मिरच्या मध्ये फोडून लांब कापून त्यात घाला व परता. कांदा घाला व परता. नंतर भोपळी मिरच्यांचे तुकडे घालून परता. त्यात १ ते १.५ टेबल स्पून सोया सॉस व १ टेबलस्पून चिली सॉस घाला व परता. १/२ ते पाऊण कप चिकन स्टॉक किवा पाण्यामध्ये १ टेबलस्पून कॉर्न फ्लोअर घालून ढवळा व हे मिश्रण पॅन मध्ये घाला, एक उकळी येऊ द्या. (चिकन स्टॉक नसेल तर पाणी वापरा.) एक उकळी आली की चिकनचे तुकडे त्यात घाला व टॉस करा. मीठ घाला, मीठ घालताना लक्षात असू द्या की चिकन मॅरिनेट करताना मीठ घातलेले आहे शिवाय सोयासॉस व चिली सॉसमध्येही मीठ असते. २ चिमटी अजिनोमोटो हवे असल्यास घाला. १ टी स्पून व्हिनेगर घाला.व्हिनेगर नसेल तर लिंबाचा रस चमचाभर घाला व ढवळा. स्टार्टर चिकन चिली तयार आहे. ग्रेव्ही हवी असेल तर अजून अर्धा कप पाण्यात चमचाभर कॉर्न फ्लोअर व किंचित मीठ घालून ते मिश्रण ह्यात घाला व उकळी येऊ द्या.चिकन चिली तयार आहे.फ्राईड राइस बरोबर सर्व्ह करा.