केशर-पिस्ता अंगुर रबडी / रसमलाई

साहित्य अंगुर रसगुल्ला बनवण्यासाठी: १/२ लिटर दूध दीड टेस्पून लिंबाचा रस ३/४ वाटी साखर दीड वाट्या पाणी १/२ टीस्पून वेलचीचे दाणे बर्फ पत्री खडीसाखर पाकृ: जाड बुडाच्या पातेल्या दूध उकळायला ठेवावे. दूधाला उकळी आली की त्यात हळू-हळू लिंबाचा रस घालणे व सतत ढवळणे. दूध फाटायला / फुटायला / नासायला लगेल व त्याचे पाणी (व्हे)वेगळे होऊ लागेल. त्यात बर्फाचे खडे टाकून गॅस बंद करावा . बर्फ पूर्ण वितळला की दूध मलमल किंवा सुती कापडावर ओतून , गाळून घेणे. कापडाला घट्ट पिळून पनीरचे पाणी काढून टाकावे. थंड पाण्याच्या नळाखाली पुरचुंडी / पोटली धुवावी म्हणजे लिंबाचा वास जाईल. १/२ तास पुरचुंडी / पोटली टांगून ठेवावी. १/२ तासानंतर पनीरला एका ताटात काढून चांगले ७-८ मिनिटे मळावे. पनीर अगदी मऊसूत झाले पाहीजे. थोडे पनीर तळहातावर घेऊन चपटे करा व त्यात पत्री खडीसाखर ठेवा व त्याचा छोटा गोळा बनवा. हलक्या हाताने वळा एक ही चिर नको. (खडीसाखर चा वापर ऐच्छिक आहे, ती घातल्यामूळे रसगुल्ले आतून पोकळ व हलके होतात, तसेच पनीर चांगले मळले तरी ते हलके होतात) प्रेशर कुकरमध्ये दीड वाट्या पाणी व वेलची दाणे घालून उकळी काढा. उकळी आली की त्यात साखर घाला व ढवळा. साखर विरघळली की त्यात तयार केलेले छोटे छोटे पनीर चे गोळे हलकेच सोडा व कुकरचे झाकण बंद करा. २-३ शिट्ट्या झाल्यावर गॅस बंद करा व कुकर लगेच थंड पाण्याच्या नळाखाली धरा म्हणजे वाफ निघून जाईल. रसगुल्ले तयार होऊन आकाराने दुप्पट झालेले असतील. वेगळ्या बाऊलमध्ये काढून पूर्ण गार होऊ द्या. साहित्य रबडी /रससाठी: ३ वाट्या दूध ४-५ टेस्पून कंडेन्सड मिल्क १ टीस्पून वेलचीपूड १ टीस्पून केशर पिस्त्याचे काप सजावटीसाठी उरलेला रसगुल्ल्याचा पाक (गरज पडल्यास) पाकृ: दूधातले १/४ वाटी दूध बाजूला काढून ठेवावे . ते दूध मायक्रोव्हेवमध्ये गरम करुन घ्यावे व त्यात अर्धे केशर घालून मिक्स करावे. त्यात कंडेन्सड मिल्क घालून एकजीव करावे. उरलेले दूध उकळवायला ठेवावे. उकळी आली की गॅस बारीक करुन ते घट्ट होईपर्यंत आटवावे. आता त्यात कंडेन्सड मिल्क व केशर मिश्रीत दूध घालावे व सतत ढवळावे. गोडपणा कमी वाटत असल्यास रसगुल्ल्याचा पाक आवडीप्रमाणे घालणे. (आमच्यासाठी कंडेन्सड मिल्कचा गोडवा पुरेसा होता.) हलक्याच हाताने अंगुर रसगुल्ले दाबावे व तयार रबडीत अलगद सोडावे. उरलेले केशर व पिस्ता पण घालावे. ५-७ मिनिटे शिजु द्यावे म्हणजे रस नीट मुरेल . शेवटी वेलचीपूड घालून मिक्स करणे. अंगुर रबडी / रसमलाई जरा गार झाली की फ्रिजमध्ये १-२ तास थंड होण्यासाठी ठेवावी. मग वाट कसली बघताय , मारा ताव ह्या केशर-पिस्ता अंगुर रबडी / रसमलाईवर :) नोटः करायला जरी कठीण व वेळखाऊ वाटली तरी तितकी कठीण नाही :) पनीर थोडे ओलसर हवे व खूप मळावे लागते. पनीर चांगले मळले तर रवा, मैदा घालायची गरज पडत नाही बाईंडींगसाठी. (घालू पण नका चवीत फरक पडतो) रसगुल्ले पूर्ण गार झाले की अलगद दाबून आटीव दूधात सोडावे.