तवसाळं

धनंजयाचे केळ्याचे सांदण वाचून आणि (कट्ट्यातला फोटो)पाहून मला सांदणाच्या बहिणीची आठवण झाली.मी आमच्या त्सेंटा आजीला गुर्कन कुकन अर्थात काकडीचा केक ह्या नावाने तवसाळं खिलवले आहे.(तवस- काकडी) साहित्य- जाड रवा १/४ किलो, एका नारळाच्या वाटीतले खोबरे, १/४ किलो गूळ, १ वाटी भाजलेल्या दाण्यांचे तुकडे, १/२ वाटी काजू/ बदाम तुकडे,वेलदोडा पूड, १/४ चमचा सोडा किवा १/२ चमचा बेकिंग पावडर,१ चिमूट मीठ. १ मोठी काकडी. खिरे नव्हेत. मोठी जाड सालीची गडद हिरव्या रंगाची काकडी घेणे. कृती- रवा कोरडा भाजून घेणे.काकडी किसून पाणी बाजूला काढणे.किसामध्ये रवा,गूळ,खोबरे, दाणे, काजू, बदाम, वेलची पूड आणि सोडा घालणे.चिमूटभर मीठ घालणे. थलथलीत भिजवणे. मिश्रण घट्ट वाटल्यास बाजूला काढलेले काकडीचे पाणी जरुर तेवढे घालणे. अवन मध्ये १८० अंश से. वर २० ते २५ मिनिटे किवा गॅसवर केकपात्रात २० ते २५ मिनिटे बेक करणे.