मासे २२) काटी/कर्ली

जागु पाककृती
काटी/करली नावावरुनच ह्याचा बोध होतो की ही काटेरी मच्छी आहे. छोटी करली दिसायला सुंदर असते. शेपुट व पर सोनेरी असतात. भरपुर काटे असतात ह्यात. त्यामुळे लहान मुलांच्या हातात देउच नका. त्यांना मांस काढून द्या. काटे भरपुर असल्याने अगदी हळू चविचविने खाण्याचा आनंद मिळतो. ही करली खुपच चविष्ट असते म्हणूनतर काटे काढण्याचा त्रास सहन करुनही आवडीने लोक खातात. करलीचे कालवणही छान लागते. इतर कालवणांप्रमाणेच हिचे कालवण करतात. करली/काटी जर छोटी असतील तर त्यांची डोके, शेपुट काढुन, पोटातील घाण काढून तिन पाण्यांतुन धुवुन घ्यावीत. जर काटी मोठी असेल तर एक पुष्कळ होते. हया लांब काटीचे तुकडे तिरके करायचे म्हणजे काटे व्यवस्थित काढता येतात. कारण ह्याचे काटे तिरके पसरलेले असतात. ही आहे मोठी कर्ली लागणारे साहित्य : करली/काटी ७-८लसुण पाकळ्या हिंग, हळद मसाला १ ते २ चमचे. मिठ तेल. पाककृती: तुकड्यांना पहिला हिंग, हळद, मिठ, मसाला लावुन घ्या. मग गरम गरम तव्यावर तेल सोडून तुकड्या तव्यात टाका. गॅस मिडीयम ठेवा. ५ मिनीटांची पलटा ५ मिनीटांत गॅस बंद करा आणि तयार व्हा काटे काढून चविष्ट मांस खायला. हाय काय नी नाय काय ? १० मिनीटांचा खेळ.
24 टिप्पण्या 14,905 दृश्ये

Comments

विश्वनाथ मेहेंदळे नवीन

वा वा, जागुताई आल्या, जागुताई आल्या.... बरेच दिवस नवीन काही छान छान माशांच्या पाककृती पाहायला मिळाल्या नव्हत्या. कर्ली खाण्याची मज्जा औरच. काटे असले तरीही. यावरून आठवले, माझ्या एका मित्राला मी विचारले होते की जास्त काटे असलेले मासे खाल्ले आहेस का? त्यावर त्याने हो असे म्हणून पापलेट, सुरमई, बांगडा अशी नावे सांगितली होती. मी कपाळावर हात मारला होता आणि घरी येण्याचे आमंत्रण दिले होते. त्याला ह्या धाग्याचा दुवा देतो आता. सदर मित्र अनेक वर्षे मासे खात असला तरी "जाति"वंत मासेखाऊ नाही. कोण किती मुरलेला मासेखाऊ आहे हे बघण्यासाठी पापलेट, सुरमई, बांगडा या व्यतिरिक्त नावे घ्यावीत, लगेच कळते :-)
गणपा नवीन

लहान असताना अनंत वेळा घशात काटे अडकवुन घेतलेत. दोन्ही अतिशय काटेरी असतात. पण चविलाही तितक्याच उच्च. काटेरी शक्यतो तळलेलीच खल्ली आहे.(खावी.) कर्ली कापण्याची एक विशिष्ठ पद्धत असते. ज्यामुळे खाताना काट्यांच्या जास्त त्रास होत नाही. सहज वेगळे करता येतात. कर्लीच्या पाठी कडच्या भाग तळायला वापरतात आणि पोटाकडचे कालवणासाठी. आता मे पर्यंत वाट पहावी लागणार :(
लवंगी नवीन

तोंडाला खूप-खूप पाणी सुटले आहे. लहानपणी आईने हे मासे केलेले असले कि माझ्या कपाळाला मोठी आठी पडायची.. कारण काटे.. शाळेतून आल्यावर खूप भूक लागलेली असायची.. मस्त वास सुटलेला असायचा, पण खाताना हे काटे काढत बसाव लागायच.. हळूहळू मोठं झाल्यावर या माश्याची गोडी कागली.. गोळीचा काटा, काटी, कर्ली, मांदेळी, कालवं, खेकडे, शिंपल्या, रावस, खाडीची सफेद करंदी, मोदकं, बांगडे, ओले बोंबील, बोयमासा ( पुढे-पुढे बोय मासा खाडीच्या वासामुळे कटाप झाला ) या सार्‍या माश्यांपुढे पापलेट, सुरमय झक मारतात.... जागू किती छळशील ग... आता यापुढे तुझे धागे उघडणारच नाही जा.. :(
जागु नवीन

वेताळ, विश्वनाथ धन्स. विश्वनाथ अगदी बरोबर. बर्‍याच जणांना कोलंबी, पापलेट, बांगडा ह्या व्यतिरिक्त माहीतीच नसते.
स्पंदना नवीन

हो आम्ही त्यातलेच आहोत. सुरमाई राहिली तुमच्या कडुन. ती ही अशीच फार जाणकार नसलेली माणस खातात, आम्च्या सारखी.
विशाखा राऊत नवीन

कर्ली खायची एक वेगळिच मज्जा असते.. केसायेवधे बारीक काटे तरीही याची चव दुसर्या कुठल्या माशाला नाहि
इरसाल नवीन

धन्यवाद जागु. बरोबर मीही लहानपणी असेच गळ्यात काटे अडकायचे पराक्रम केलेत.मग कोरडा भात ढकलून गळा मोकळा करावा लागायचा किंवा मग केळे. बहिण किंवा वडील दोघांपैकी कोणीतरी निवडून देत असे पण आता तीही सोय राहिली नाही.
जागु नवीन

अपर्णा अजुन बरेच मासे आहेत टाकायचे. सुरमई मी अजुन आख्खी नाही आणली त्यामुळे फोटो राहीला आहे. आख्खी आणेत तेंव्हा फोटो काढुन रेसिपी टाकेन.
कच्ची कैरी नवीन

मस्त आहेत मासे आत्ता गावी गेले होते तेव्हा भरपूर काटे असलेले मासे खाल्ले पण त्यामाशांच नाव मला माहित नाही :(
दीविरा नवीन

मासे आवडतात पण काट्यांचे फारसे खाल्ले नाहीत. आता आणुन पाहीन :) बाकी तुम्ही फारच नवनवीन प्रकार दाखवता त्याबद्दल आभार
प्रियाली नवीन

करलीसारखा चविष्ट मासा नाही दुसरा. करलीचे कटलेट्स मस्त लागतात फक्त वाफवल्यावर त्यातले काटे काढणे म्हणजे महत्प्रयास.
सानिकास्वप्निल नवीन

वाह! खुपच चविष्ट पा़कृ आहे मी ही मासे खाते पण फार काटे असलेले मासे खाल्ले नाहीत ह्या भितीने की काटे अडकतील :( एकदा खाऊन बघीतले पाहिजे ....
अन्या दातार नवीन

इथे जो मासा मिळतो त्यात पन फार बारीक बारीक काटे असतात, पण कर्ली नसावा (कारण टेस्ट नसते! :( )
श्रीराम गावडे नवीन

जागुताई आता एकदा पिवळी वाम होउन जाउ दे.