मराठी साहित्य, संस्कृती आणि लेखनाचे व्यासपीठ
प्रवेश करा | सदस्य व्हा
मिसळपाव

ढबू मिरचीची पीठ पेरून भाजी

प्रभो · · पाककृती
काल घरी बसूनच काम केलं... संध्याकाळी बराच कंटाळा आला होता.... त्यात बेसन पेरून सिमला मिरची खायची इच्छा झाली. फ्रीज उघडून बघितला तर मिरच्या होत्या.. मस्तपैकी पीठ पेरून भाजी केली. ही घ्या कृती. साहित्यः १. ३-४ मोठे चमचे तेल २. १-२ हिरव्या मिरच्या तुकडे करून ३. २-३ सिमला मिरच्या चिरून ४. ३-४ मोठे चमचे चण्याचे पीठ ५. बरेच जण ह्यात कांदा घालत नाहीत. पण मला आवडतो म्हणून मी वापरला..त्यामुळे हवा असल्यास १ मोठा कांदा चिरून ६. फोडणीसाठी हिंग, मोहरी. जिरे, कडिपत्ता ७. अर्धा चमचा हळद ८. मीठ (चविनुसार) ९. लाल तिखट (चविनुसार) कृती: १. कढईमधे मध्यम आचेवर तेल गरम करा. २. तेल गरम झालं की त्यात हिंग, जिरे, मोहरी,हिरव्या मिरच्या व कडिपत्त्याची फोडणी करा. ३. त्यात कांदा टाकून सोनेरी होईपर्यंत परता.. (साधारण ३-४ मिनिटे) ४. त्यात चिरलेली सिमला मिरची टाकून एक मिनिट परता. ५. आता त्यात मीठ टाकून हलवा व झाकण ठेवून मंद आचेवर ५-७ मिनिटे शिजवा. ६. सिमला मिरची शिजली की त्यात हळद,तिखट टाकून एकजीव करा. ७. त्यावर बेसन भुरभुरवा. ८. सर्व मिश्रण एकत्र करून त्यावर झाकण ठेवा. मंद आचेवर एक दणदणीत वाफ काढा. (५-७ मिनिटे) म्हणजे बेसन शिजेल. मस्त गरमा गरम पोळीसोबत खा. तोंडी लावायला मेतकुट घ्यायला विसरू नका.. ;) @रेवतीताई : मेतकुट संपलं आहे... पुढचा लॉट लवकर पाठव.. ;)
वाचने 12743 वाचनखूण प्रतिक्रिया 35

निवेदिता-ताई 30/09/2010 - 19:45
मस्त भाजी........... अशी भाजी मला फार आवडते, आणी ते मेतकूट तर लै लै भारी...आहाहा...... रेवतीताई : मेतकुट संपलं आहे... पुढचा लॉट लवकर पाठव.......... मलाही पाठव ग.

बेसनलाडू 30/09/2010 - 23:03
हहपुवा!! भाजी छान झालेली दिसतेय बाकी!! कोबीचीही अशीच पीठ पेरून भाजी करतात आमच्याकडे (काही जण त्याला कोबीचा झुणका म्हणतात); आणि कांद्याच्या पातीची, पडवळाचीही. या सगळ्या भाज्या पीठ पेरून करून फार चवदार लागतात. (खवय्या)बेसनलाडू

रेवती 30/09/2010 - 23:30
प्रभो, अरे किती जाहिरात करशील लग्नाळू असल्याची? पूर्वी वधूवर स्वत:चे फोटो देत असत. आजकाल दिवस इतके बदललेत कि आपण केलेल्या पदार्थांचे फोटो द्यावे लागतात. स्थळं चालून यावीत अशीच अपेक्षा दिसते आहे.;) जुन्याकाळी नवर्‍यामुलीने तयार केलेले विणकाम, भरतकामाचे नमुने, वाळवणाचे पदार्थ, मुरांबे, टिकावू वड्या असे रुखवतात ठेवत असत. यापुढे नवर्‍यामुलाने 'मला कायकाय स्वयंपाक येतो' असे पाककलेचे नमुने ठेवायचे दिवस आलेत जणू!;) या पाकृच्या शिर्षकात IT's ढब्बू मिरचीची पीठ पेरून भाजी असे असायला हवे होते. भाजी चांगली दिसते आहे. पोळ्या तू केल्यास कि फ्रोझन आणल्यास तेही कळवणे. बाकी ते मेतकूट वगैरे पाठवते रे! निवेदीता ताईलाही पाठवायचे आहे ना!:)

चिंतामणी 01/10/2010 - 01:26
प्रभो (सोबत मेघवेडा, निवेदिता-ताई, यशवंतकुलकर्णी, बेसनलाडू ईत्यादी ईत्यादी) पाकृ छानच आहे. पण एक गोष्ट सुचवु इच्छीतो. बेसनपीठ पचायला जड असते (विषेशतः आताच्या म्हणजे पावसाळी हवेत). बेसनपीठा ऐवजी "भाजणी" भुरभुरा. त्याने चव तर नक्कीच बदलेल आणि पोषणमुल्ये वाढतील. करून बघा आणी मला सांगा कशी लागते भाजी. (हाच प्रयोग कांद्याची पात, कोबी इत्यादी भाज्यांसाठी करून बघा)

चिंतामणी 01/10/2010 - 01:58
धन्यु. ही कल्पना माझ्या डोक्यातुन निघाली (आमचे पोट हलके आहे हो. त्यामुळे डाळीच्या पिठाचा त्रास व्हायचा आणि पर्याय शोधला) आणि बायकोला आवडुन तीने करून बघीतली. मग हीच कृती ज्या भाज्या पिठ पेरुन करतात तिथे अमलात आणली. :)

चित्रा 01/10/2010 - 01:32
एक ओळखीची जैन मुलगी अशी भाजी स्पेशल मसाला घालून इतकी कोरडी आणि झकास करायची, त्याची आठवण झाली. पण मसाल्यात नक्की काय असायचे ते आठवत नाही :( बहुतेक जिरे, बडीशेप असे काही असावे.

पक्या 01/10/2010 - 02:41
बरोबर् ..पीठ पेरलेली ढबू मिरचीची भाजी कोरडीच असते. एकदम कोरडी जमायला जरा पाककौशल्य लागते. ही भाजी फोटोत तरी ओलसर दिसत आहे. पण बॅचलर , आय टी अशी बिरूदं असल्याने चालून जाईल.

सूड 01/10/2010 - 13:26
प्रभो, मस्तच रे !! मला आवडते अशी भाजी, म्हणून माझी आजी मी आजोळी गेल्यावर आवर्जून करते. पण ती डाळीचं पीठ थोडं तेलावर भाजून घेते, आणि नंतर ते बाजूला काढून भाजी शिजत आली की मग टाकते त्यात.

स्वैर परी 01/10/2010 - 14:21
मला पुर्वि ढोबळी मिरची ची भाजी कधीच आवडली नाही. पन आय. टी. हे क्शेत्र भल्या भल्याना नमवते, त्यात आम्हि काय चीज. असो, तुम्ही सान्गितलेली हि रेसिपी नक्कि करुन पाहिन. :)

धमाल मुलगा 01/10/2010 - 18:32
वा वा! प्रभ्या, छान रेशिपी हों! बरं, परवा त्या कुलकर्ण्यांचं स्थळ तुझी चौकशी करत होतं बुवा. त्यांना म्हणालो, मुलगा अगदी गृहकृत्यदक्ष आहे, स्वयंपाक तर असा करतो.... त्यांचा होकार आलाय रे! काय कळवायचं तिकडं?