Skip to main content

अथांग सागर

लेखक सुवर्णमयी यांनी गुरुवार, 20/03/2008 या दिवशी प्रकाशित केले.
अथांग सागर येती लाटा सागराच्या स्पंदनाची आगळीशी देहबोली फेनफुले खळाळत नभाकडे झेपावली गतीमान जसा जसा सागराचा श्वास होई ऊर त्याचा फेसाळत खाली वर झेप घेई भावनांच्या आवेगाने क्षणक्षण उचंबळे थरथरले वाळूचे कण कण इवलाले नभातल्या चंद्रामुळे खुळी चांदणी जाहली मिठीमध्ये किनाऱ्याच्या फेनफुले विसावली एकामागे एक येते खळाळत लाट लाट लपाछपीमध्ये होते दिनरात नि पहाट थांग लागेना अजुनी माणसाला मानसाचा मन अथांग सागर खळाळणाऱ्या लाटांचा!
वाचने 10874
प्रतिक्रिया 18

प्रतिक्रिया

विसोबा खेचर गुरुवार, 20/03/2008
वा! सुरेख कविता...! नभातल्या चंद्रामुळे खुळी चांदणी जाहली मिठीमध्ये किनाऱ्याच्या फेनफुले विसावली फेनफुले हा शब्द सुंदर आहे..! थांग लागेना अजुनी माणसाला मानसाचा मन अथांग सागर खळाळणाऱ्या लाटांचा! क्या बात है, मन अथांग सागर खळाळणाऱ्या लाटांचा! या ओळी बाकी क्लासच! आपला, (मनाच्या दर्याचा प्रेमी) तात्या.

स्वाती राजेश गुरुवार, 20/03/2008
सुंदर कविता लिहिली आहे. सागराच्या स्पंदनाची आगळीशी देहबोली फेनफुले खळाळत नभाकडे झेपावली या ओळी आवडल्या. फेनफुले हा शब्द सुंदर आहे..! तात्यांशी सहमत.

प्राजु गुरुवार, 20/03/2008
सागराच्या स्पंदनाची आगळीशी देहबोली फेनफुले खळाळत नभाकडे झेपावली अप्रतिम... अतिशय सुंदर आहेत याओळी.. - (सर्वव्यापी)प्राजु

सचिन गुरुवार, 20/03/2008
थांग लागेना अजुनी माणसाला मानसाचा मन अथांग सागर खळाळणाऱ्या लाटांचा! हे बाकी खरंय....! कविता सुरेख्....आवडली. फेनफुले शब्द छानच ! तात्यांशी सहमत !!

सर्किट (verified= न पडताळणी केलेला) गुरुवार, 20/03/2008
चित्रदर्शी कविता ! लगागागा लगागागा ही सुंदर लय.. (फक्त शेवटच्या ओळीतले "खळाळणार्‍या" बदलता येईल का ?) - सर्किट

चतुरंग गुरुवार, 20/03/2008
"खळाळत्या ह्या लाटांचा!" चालू शकेल? चतुरंग

सर्किट (verified= न पडताळणी केलेला) गुरुवार, 20/03/2008
छान रंगोबा !! - सर्किट (आता ही कविता "कशासाठी पोटासाठी.." ह्या चालीत छान बसते.)

धनंजय शुक्रवार, 21/03/2008
छान कविता. "खळाळणार्‍या" बदलावे, (अष्टाक्षरीत शक्यतो ५/३ अशी यती देऊ नये असा नियम लक्षात येत आहे...) पण "खळाळत्या ह्या" नाही पटले - उगीच आठ-अक्षर पूर्ती वाटते. "ह्या" म्हणजे कुठल्या?

सुवर्णमयी शुक्रवार, 21/03/2008
५/३ यतीचा नियम मला माहिती नव्हता. आता लिहितांना आणखी एक बंधनः) ह्या - मनातल्या लाटांचा म्हणून घेता येईल असे मला वाटले. अधिक विचार करून यमक साधणारी व अर्थपूर्ण दुसरी ओळही लिहून बघेन.

चतुरंग शुक्रवार, 21/03/2008
'ह्या' म्हणजे सततच्या - कुठल्या एका ठिकाणच्या/क्षणातल्या असे काही नाही, त्या असतातच, तुम्ही पहाल तेव्हा आणि तुम्ही पहाल तिथे! चतुरंग

सुवर्णमयी शुक्रवार, 21/03/2008
सर्वांचे प्रतिसाद आणि सूचनेकरता आभार. कवितेत केलेला बदल आवडला. आता कशासाठी पोटासाठीच्या चालीत म्हणून बघायला हरकत नाही:) फेनफुले हा शब्द माझा नाही. त्यामुळे त्याचे श्रेयही माझे नाही. हा शब्द खूप वर्षापूर्वी वाचनात आला होता, तेव्हापासून लक्षात होता.. पण कोणाच्या लेखनात वाचला ते आता नेमके आठवत नाही. सोनाली

बेसनलाडू शुक्रवार, 21/03/2008
मस्त कविता. फार आवडली. गतीमान जसा जसा सागराचा श्वास होई ऊर त्याचा फेसाळत खाली वर झेप घेई एकामागे एक येते खळाळत लाट लाट लपाछपीमध्ये होते दिनरात नि पहाट 'फेनफुले', 'माणसाला मानसाचा' हे फार आवडले. 'मराठी माणसं मराठी मानसं' हे कुठेशी वाचलेले आठवले :) ;) (मराठी माणूस)बेसनलाडू

ठणठणपाळ शुक्रवार, 21/03/2008
अभिनंदन >>ऊर त्याचा फेसाळत खाली वर झेप घेई ही कल्पना अगदी नवीन आणि मनोरम आहे. काही शब्दांची द्विरुक्ती खूप परिणामकारक वाटते. उदा., क्षणक्षण, कणकण, जसाजसा, लाटलाट. खळाळणार्‍या च्याऐवजी खळखळत्या चालेल का? ठणठणपाळ

आजानुकर्ण शुक्रवार, 21/03/2008
वरील प्रतिक्रियांशी सहमत आहे. सुंदर कविता. अत्यंत आवडली. (सहमत) आजानुकर्णही कल्पना अगदी नवीन आणि मनोरम आहे.

सुधीर कांदळकर शुक्रवार, 21/03/2008
खूळी चांदणी, फेनफुले तसेच माणसाला मानसाचा शब्दयोजना सुंदरच. शुभेच्छा अर्धवटराव आचरटाचार्य, सुधीर कांदळकर.

सागर रविवार, 23/03/2008
सुवर्णमयी, अतिशय सुंदर कविता आहे. खूपच छान.... अजून येऊ देत... माझे नाव त्यात आहे त्यामुळे तर अगदीच स्पर्शून गेली ही कविता :) शेवट खूपच सुंदर केलात. -------------------- थांग लागेना अजुनी माणसाला मानसाचा मन अथांग सागर खळाळणाऱ्या लाटांचा! -------------------- माझीही थोडी भर... सरिता येथे सागरमय होते सर्वस्व अर्पून प्रेमा करता... अथांग सागरात काहूर माजते एकेक दिशा सावरता सावरता.... (अथांग) सागर

उत्खनक मंगळवार, 13/12/2022
नभातल्या चंद्रामुळे खुळी चांदणी जाहली मिठीमध्ये किनाऱ्याच्या फेनफुले विसावली फार सुंदर काव्य!