काही न जुळलेले गुण!!! आमचे काही न जुळलेले गुण, काही म्हणजे केवळ म्हणायला, खरे तर सगळेच गुण-अवगुण न जुळणारेच. गेली काही वर्षे एकत्र घालवल्यावर, आता जर कुठे सगुण-निर्गुणच्या जवळ आहोत आम्ही. म्हणजे फार काही विशेष नाही, न जुळलेल्या गुणांना आम्ही उभयतांनी संमती दिली आहे आणि सोयीस्कररित्या 'काना-डोळा' केला आहे. ऐकून न ऐकल्यासारखे आणि बघून न पाहिल्यासारखे. असेच काही दाखले.. प्रवेश एक : वर्ष पहिले ती (मनात) : आज मस्त पुस्तक वाचणार, ही कादंबरी आज संपवायचीच आहे, तसेही उद्या सुट्टी आहे, आज रात्रीत वाचून होईल. तो (मनात) : आज जर लवकर झोपावे, पहाटे लवकर उठून, कॅमेरा घेऊन बाहेर पडता येईल. तळजाई, पाषाण लेक असे कुठे तरी. ती: हे काय, इतक्या लवकर आवरले आज तुझे, झोपायला रेडी एकदम :) तो : अगं, उद्या जायचं न पहाटे,!!!! जायचं न फिरायला उद्या? ती: अरे, पण पुस्तक वाचायचा प्लान होता माझा, नाही गेलो उद्या तर नाही का चालणार? परत जाऊ ना, अगदी पहाटेच बाहेर पडू मग. तो: ठीक, फिर कभी. :) प्रवेश तोच : वर्ष दुसरे, तिसरे, चौथे तो : तू किती वेळ वाचणार अजून? ती: हा काय प्रश्न आहे का? साहजिकच आहे, पुस्तक संपेपर्यंत. तो: उजेडात झोप नाही लागत मला. ती: ?, मी काय करू मग? मला वाचायचे आहे न? मी दुसर्‍या खोलीत जाऊन वाचते मग. अलीकडेच जर उजेडाचा त्रास व्हायला लागला आहे तो: हे बघ. विषय भलतीकडे नकोय. आणि सकाळी लवकर उठायचे आहे न आपल्याला? मग लवकर झोपायला नको का!!!! ती: हे कधी ठरलंय? तो: अग, असे काय, मागच्या रविवारी बोललो की आपण की असे एखाद्या वीकएंडला जाऊ या प्रभातफेरी मारायला. ती: बरोबर, मान्य, आपण बोललो, पण एखाद्या म्हणजे लगेच पुढच्या, हे कधी ठरले? मनानेच ठरवत नको जाऊस. तो: तू अशक्य आहेस. ती: हे बघ, जायचे की नाही हा इश्यू नाहीये, आमच्यात एकट्याने ठरवायची पद्धत नाहीये. तो: आमच्यात पण, दिलेला शब्द मोडण्याची पद्धत नाहीये. ती :तूपण अशक्य आहेस. मला वाचू दे आता, मूड लागलाय वाचायला मस्त तो: मलापण माझा मूड स्पॉइल नाही करायचा आहे, गुड नाईट. ती: आमच्यात गुड नाईट हसर्‍या चेहर्‍याने म्हणतात. तो: आमच्यात हसरा चेहरा असाच असतो. ती: आधी तर (लग्नाच्या) वेगळाच असायचा. तो: आमच्यात नंतर (लग्नाच्या) असा करायची पद्धत नाहीये, पण सोबतच्या लोकांवर अवलंबून आहे ते. ती: तुला खरे तर वाचायची आवड आहे, तरीपण तू असा का वागतोस न, "I dont know". जाऊ दे. तो: हो, मीपण वाचतो. पण, मी एका वेळी एकच पुस्तक जवळ ठेवतो, ४-५ पुस्तके उशाशी ठेवण्यातले लॉजिक, परमेश्वरालाच ठाऊक. पुस्तक वाचणे छान आहे, पण ती पुस्तके छानपण तर ठेवायला पाहिजे न? ती: मला लहानपणापासून अशीच सवय आहे, कधीपण मूड बदलू शकतो आणि मग पुस्तकही त्याप्रमाणे. मला पुस्तके नसली ४-५ जवळ, तर नाही चालत आणि हे माहीत असून, मग कशाला बोलायचे? काही लोकांना मोबाईल वाजला तरी न उचलण्याची सवय असते की रिप्लायसुद्धा करत नाही, जसे काही बाकीच कामाशिवायच रिंग करत असतात. तो: कोणता विषय कुठे जातोय? ती: जिकडे वळवला, तिकडेच वाहतोय.. तो आणि ती (मनात): इतका वेळ भांडण्यापेक्षा झोपलो असतो, तर निम्मेतरी वाचून झाले असते. तात्पर्य : सकाळी उठायला उशीर, पुस्तक पूर्ण वाचणे आणि फिरायला जाणे दोन्हीचा पोपट! प्रवेश तोच: जुने झाल्यावर ५ वर्षे व नंतर तो: नवीन पुस्तक आणले आहेस काही वाचायला? ती : नाही, जे हवय ते नाही मिळाले. तो: जर मिळाले तर ती ; बहार येईल ती ; वाह, गिफ्ट माझ्यासाठी? तो : म्हणजे काय आणि कुणासाठी? ती: काय सांगता येत नाही आजकाल, खात्री केलेली बरी ........................आणि ती गिफ्ट आहे : टेबल लॅम्प, बुक शेल्फ आणि जे हवे आहे ते बुक :) भांडण सुरू होण्यास स्कोपच नाही. ती: मस्त आहे, एक नंबर. मला आठवतंय, तू मला दिलेले पहिले गिफ्ट 'पुस्तक संच- बोक्या सातबंडे'. त्याच दिवशी वाटले अरे हाच तो, याच्याबरोबर आयुष्य काढता येईल. तो : आणि भांडतापण येईल ....मनसोक्त ती : अशक्य आहेस तू!!! तो : मग पुढचा रविवार पक्का न? ती : येस, पक्का, अगदी तुझ्या पहाटे नको, माझ्या पहाटे जाऊ या. तू मागच्या वेळी काढलेले तिथले फोटो इतके मस्त आलेत की मला आवडेल प्रत्यक्ष पाहायला. तात्पर्य: ही केवळ 'adjustment' नाही, हे मुरायला लागलेले प्रेम आहे बहुधा!!!! सवयींचीसुद्धा सवय होते, काही सवयी आवडतात, काही बदलतात, काही आवडत नाहीत आणि बदलतही नाहीत, कारण त्या केवळ सवयी नाही, तर व्यक्तिमत्वाचा एक भाग असतो अविभाज्य. आपल्याला तो काढून नाही टाकता येत, पण आपण एक तर तो दुर्लक्षित करू शकतो किंवा आपल्या पद्धतीने थोडा वळवू शकतो. खरे तर हेच संभाषण दोन भावंडातही होते, पण त्या निरागस वयात ते नात्यांच्या बांधत, मायेत विरघळून जाते. पण हेच तो आणि ती मध्ये मात्र नक्कीच भांडण होऊ शकते...:) पण नाते बळकट व्हायचे, तर थोडी भांडणे हवीतच, नाही का? आणि त्याला भांडणच म्हणावे, उगाच मतभेद वगैरे नको, म्हणजे मन कसे मोकळे होते, आरश्यासारखे स्वच्छ. म्हणजे मग कसे आपण निखळ प्रेम करायला आणि आनंद घ्यायला रिकामे :) भांडणं सारखी प्रेमामध्ये सजा नाही पण भांडणाशिवाय नात्यामध्ये काहीसुद्धा मजा नाही भांडणाशिवाय, नात्यांच्या दोन टाकामध्ये कुणीसुद्धा तिजा नाही आणि म्हणूनच भांडणाशिवाय प्रेमामध्ये काहीसुद्धा मजा नाही -- शीतल जोशी