शप्पत, जॅक डी ची थट्टा करण्यासाठी नाही लिहीलेलं, बरंच आधी लिहीलेलं आज आठवलं, ********** " तुमच्या ऑफीसला मघापासून फोन करतेय, कुणीच उचलत नाहीये " " त्या तुम्ही होतात होय ? मला वाटलं परत कुणीतरी मस्करी करतंय, हल्ली लोकांना काही सिरीयसनेसच राहीला नाही. म्हणे "मी मुंगूस बोलतोय मला सापाची भीती वाटतेय", काय पण.. " " बरोबर आहे मुंगूसच बोलत होता फोनवरून " " म्हणजे त्या तुम्ही होतात ? आणि वर तोंड करून परत ऑफीसला येऊन मस्करी करताय ? हे पहा, हे एका सेवाभावी संस्थेचं ऑफीस आहे, टाईमपास कसला करताय.." " ऐकून तर घ्या, आमचं आडनांव मुंगूस, मघाशी फोनवर बोलत होता तो माझा नवरा.." " मुंगूस असून सापाला घाबरता ? " " तुमचं आडनांव काय ? " " मानकापे.. " " किती मुंडकी छाटलीत आजवर ? " " भावना पोचल्या, सांगा साप कुठाय ते .." " ते सांगते हो पण तुमची हत्यारं कुठायत ?" " कसली हत्यारं ? मी सर्पमित्र आहे शत्रू नाही.. " " नाही म्हणजे पुंगी वगैरे.." " मी गारूडी वाटलो का तुम्हाला ? माझ्याकडे पुंगी नाही " " कमाल आहे, असूदे हे घ्या गाजर " " हे कशाला ? " " याची पुंगी करून वाजवा ना ! " " पण ही वाजेल का ? " " नाही वाजली तर मोडून खाऊन टाका, `गाजराची पुंगी वाजली तर वाजली नाहितर मोडून खाल्ली' " " आता म्हणी म्हणून संपल्या असतील तर आपण साप पकडू या ?" " पण मला एक सांगा हो तुम्ही साप कसा पकडता ?" " त्याचं काय आहे, आधी त्याच्या पायात पाय घालून पाडतो आणि पडला की पकडतो, तुम्हाला काय करायचंय ? ती एक कला आहे," " मलाही शिकायचेय," " आधी साप विषारी आहे की बिनविषारी ते समजून घ्यावं लागतं ! " " ते कसं कळणार ?? " " सोबतच्या माणसाला सांगायचं ना ! "पकड तो साप बिंधास्त मी आहे ना !" मग साप त्याला चावतो, मग आपण अर्धातास थांबायचं " " ते कशाला ? लगेच हॉस्पिटलला न्यायला नको का ? " " मग आपल्याला कसं कळणार साप विषारी की बीन विषारी ? समजा तो मेला, तर साप विषारी " " ओह असं आहे काय " " चला पकडताय ना साप ? बिंधास्त पकडा मी आहे ना ! " " माझ्यावरच प्रयोग कसला करताय ? माझ्या घरातला साप पकडा `तुम्हीच' " " आधी मला सांगा तो कसा दिसत होता ?" " लंबूळका.... " " बसं ? फक्त लंबूळका ? त्याचा काही रंग काही वर्णन ?" " म्हणजे बघा तो असा लांब होता, त्याच्या पाठीवर काळे पांढरे पट्टे होते, असं लांब शेपूट होतं " .. " झुपकेदार असेल ना ! " " हो, आणि जोरात धावत होता " " बाई घरात नक्की साप शिरलाय की झेब्रा ? असा साप नसतो नीट सांगा " " नाही म्हणजे , तो पिवळा होता, असा दणकट होता पांढर्‍या मिशा, आयाळ..." " हे सिंहाचं वर्णन सांगताय तुम्ही सापाचं सांगा " " मला नाही आठवत, मी घाबरलेले त्या सापड्याला पाहून " " सापाला सापड्या म्हणता तुम्ही ? " " उपरोधानं म्हणतेय हो, कळत नाही का ? " " आणि मग नाग असेल तर ? " " नाग.. काहीही काय विचारताय ? बरं मला सांगा तुम्हाला एखादा विषारी साप चावलाय का हो कधी ? " " हो, नाग चावलेला एकदा " " अरे बापरे मग ? मेलात का तुम्ही ?" " काय बाई आहे, मेलो असतो तर इथे आलो असतो का ? सिरीयल आहे का ही ? मेलं की पब्लिकडिमांड म्हणून परत यायला ?" " सॉरी पण मग नाग चावल्यावर पुढे काय झालं ? " " काय होणार ? एक आठवडा आय सी यू त " " अरे बापरे, पण तरी वाचलात हे काय कमी आहे का ? " " मी नाही तो नाग होता आय सी यु त " " तो कसा काय ? " " त्याचं काय झालं आधी नाग मला चावला मग मी त्याला चावलो, सत्तेचाळीस टाके पडले त्याला " " ओके, मी हे सगळं रेकॉर्ड केलेलं आहे " " काय लेख वगैरे लिहीणार आहात का ? वर्तमानपत्रात ? फोटो पण घ्या की, कुठल्या पेपरच्या वार्ताहर आहात तुम्ही ?" " वार्ताहर नाही मी, सर्पोद्यानातून आलेय, तो जखमी नाग आमच्याकडेच आहे, आणि हे पुरावे घेऊन मी तुमच्यावर केस टाकणार आहे " " ओ..ओ बाई मी सगळं फेकत होतो हो, मी सापच काय साधा गांडूळही पकडलेला नाही आजवर " " माहित होतं मला, मी न्युज रिपोर्टर आहे, आजची ब्रेकिंग न्युज मिळाली मला, नकली सर्पमित्राचा पर्दाफाश.."