ताज्या घडामोडी जून २०२३

आज १९ जून. मागच्या वर्षी आजच्याच दिवशी विधानपरिषद निवडणूक झाली होती आणि त्यात सेनेची मते फुटून मविआ उमेदवाराचा पराभव झाला होता. त्याच्याच दुसर्‍या दिवशी म्हणजे २० जून रोजी एकनाथ शिंदे आपल्या समर्थक आमदारांसह सुरवातीला सुरतला आणि तिथून गुवाहाटीला गेले होते. त्यामुळे उबाठासेना २० जून हा जागतिक गद्दारदिन म्हणून मानणार आहे. मी शाळेत असताना मित्रांबरोबर आमच्या बिल्डींगच्या गच्चीत अंडरआर्म क्रिकेट खेळायचो. बर्‍याचदा आमच्या टीमने वर्ल्ड कपही जिंकला होता. या दोन गोष्टींचा दुरान्वयानेही संबंध नाही बरं का. वाटल्यास तो योगायोग समजावा.

२०२४ च्या लोकसभा निवडणुकांसाठी विरोधकांची संयुक्त आघाडी बनविण्याच्या दृष्टीने २३ जूनला पाटण्यामध्ये विरोधी पक्षांची बैठक होणार आहे. त्या बैठकीच्या आधीच काँग्रेस विरूध्द आप आणि काँग्रेस विरूध्द तृणमूल अशी कुस्ती बघायला मिळत आहे. आपचे नेते सौरभ भारद्वाज यांनी काँग्रेसला ऑफर दिली आहे की काँग्रेसने दिल्ली आणि पंजाबमध्ये निवडणुक लढवू नये. त्याबदल्यात त्यांचा पक्ष मध्य प्रदेश, राजस्थान अशा राज्यांमध्ये निवडणुक लढविणार नाही आणि काँग्रेसला पाठिंबा देईल. हा मुद्दा मी मागे पण मांडला होता. या स्थानिक नेत्यांना आपापल्या राज्यात आपल्या पक्षाला मोकळे रान हवे आहे आणि ते काँग्रेसला आपल्या क्षेत्रात सामावून घ्यायला तयार नाहीत. मागे ममतांनी पण हेच म्हटले होते. काँग्रेसने बंगालमध्ये निवडणुक लढवू नये. त्या बदल्यात त्या इतर राज्यात काँग्रेसला पाठिंबा देतील. आपने मध्य प्रदेश वगैरे राज्यांमध्ये काँग्रेसला पाठिंबा देणे, तृणमूलने दुसर्‍या कोणत्या राज्यात (उदाहरणार्थ कर्नाटक) काँग्रेसला पाठिंबा देणे याचा नक्की कितपत उपयोग आहे?त्यांची राज्ये सोडली तर या नेत्यांची क्षमता इतर राज्यात किती मते फिरवायची आहे? मग या नेत्यांनी इतर कोणत्याही राज्यात कोणालाही पाठिंबा दिला काय आणि दिला नाही काय त्याचा कितपत फरक पडणार आहे? आपच्या या ऑफरवर काँग्रेस प्रवक्ते गौरव वल्लभ म्हणाले की सौरभ भारद्वाजांनी नैराश्यातून हे वक्तव्य केले आहे. https://www.abplive.com/news/india/congress-leader-gaurav-vallabh-attac… आज केजरीवालांची राजस्थानात श्रीगंगानगरला सभा होती. तिथे जायच्या रस्त्यावर काँग्रेसने मुख्यमंत्री अशोक गेहलोत यांची पोस्टर लावली होती. हा केजरीवालांची सभा अपयशी व्हावी यासाठी गेहलोतांनी केलेला प्रयत्न आहे आणि ही एक 'नीच हरकत' आहे असा हल्ला केजरीवालांनी गेहलोतांवर केला. केंद्र सरकारने दिल्ली सरकारच्या अधिकारांवर मर्यादा आणणारा अध्यादेश काहीही झाले तरी राज्यसभेत पाडायचा यासाठी केजरीवाल कंबर कसून उभे आहेत. अशावेळेस त्यांना काँग्रेसच्या पाठिंब्याची गरज लागणार आहे. तेव्हाच काँग्रेसबरोबर ही फ्रीस्टाईल कुस्ती होत आहे हे विशेष. बंगाल विधानसभेत काँग्रेसचा एकमेव आमदार होता. सागरदिही विधानसभा मतदारसंघात झालेल्या पोटनिवडणुकीत तो जिंकला होता. ही फार जुनी गोष्ट नाही. चारेक महिने त्या पोटनिवडणुकीला झाले असावेत. आपली जागा काँग्रेसने जिंकल्याने ममता खवळल्या होत्या. आता तोच आमदार तृणमूलमध्ये सामील झाला आहे. म्हणजेच काय तर भविष्यात दोन पक्षांमध्ये सहकार्य व्हावे यासाठी जागा मोकळी ठेवायची असेल तर त्याच पक्षाच्या आमदारांना फोडू नये हे पण भान ममतांकडे नव्हते. असे म्हणायचे की ममतांना काँग्रेसबरोबर सहकार्य नकोच आहे असे म्हणायचे? ममतांनी काँग्रेसबरोबर आघाडीची शक्यता नाकारली आहे पण राष्ट्रीय पातळीवर काँग्रेस सोडून इतर विरोधी पक्षांच्या आघाडीचा भाग व्हायला तृणमूल तयार आहे असेही म्हटले. https://www.livemint.com/news/india/congress-aligned-with-bjp-in-bengal… बघू २३ तारखेला काय होते ते.