हे निराकारी कला क्रांतिवीरांनो या वास्तवाला घाबरता का ? गेली चार दशके टाळताय त्याला अन् लपताय दीवाभीतासारखे नुसत्या रंगसंगतीवर किती झुलवणार आम्हाला तुमचे पिवळे हेवेदावे आणि काळे चौकोनी सूर्य किती दिवस बघायचे ? कशासाठी हा वेगळा प्रवास ? तुमचे बाप तिथे मास्तर होते तेंव्हा तुमचे काय चालले होते ? तुमची लफडी, तुमची व्यसने तुमचे स्वप्नभंग, रागलोभ, याचे भ्रष्ट आविष्कार त्या कॅनव्हासवर कशाला ? तुमचीही घराणी झाली आता अधिकारवाणी रुजली आता दिवाळी अंकात चमकताना ज्ञानाचे दिवे पाजळताना तुमच्या भाटांना शब्द अपुरे पडतात दगडातला अनावश्यक भाग कोरणार्‍याला शिल्पकार म्हणतात चित्रातला आवश्यक भाग काढणार्‍याला नवचित्रकार म्हणतात