मराठी साहित्य, संस्कृती आणि लेखनाचे व्यासपीठ
प्रवेश करा | सदस्य व्हा
मिसळपाव

चुकलो का मी?

अनन्त्_यात्री · · जे न देखे रवी...
लेखनविषय:
मुक्तक
दिवास्वप्न पाहत असताना अधांतराची भक्कम भूमी सोडुनी थोडा भटकत गेलो चुकलो का मी? वायफळाचा मळा उन्हाळी मृगजळ शिंपून वाढविला मी पीक पाखरे खाऊन गेली चुकलो का मी? वृत्त, छंद, गण बेड्या तोडून भ्रमरासम स्वच्छंदपणे मी फिरता, रेखीव वाट विसरलो चुकलो का मी? विस्मरणाची गडद सावली झाकोळत जरी होती तरी मी स्मरणरंजनी वाहत गेलो चुकलो का मी?
वाचने 2507 वाचनखूण प्रतिक्रिया 9

मारवा Sat, 05/24/2025 - 21:41
वायफळाचा मळा उन्हाळी मृगजळ शिंपून वाढविला मी काय सुंदर कल्पना आहे तुमच्या निवडक कवितांचा एक तरी संग्रह प्रकाशित व्हायला हवा असे मनापासून वाटते. इतक्या पावसाळी छत्र्या सारख्या कविता सर्वत्र उगवत असताना तुमच्या अनोख्या सुंदर कविता आनंद देऊन जातात.

मिसळपाव Sun, 05/25/2025 - 07:59
दोघाना +१. काहीतरी सुरेख कल्पना असते याच्या कवितांमधे. कधीमधी डोक्यावरून जातात. पण पुढच्या कवितेची उत्सुकता असते. हे असलं काही आमच्या डोचक्यात कधीच का येत नाही हो म्हणतो मी! असो. दुसर्‍या कोणाच्या येतंय आणि ते वाचायला मिळतंय हेही नसे थोडके. अ. यात्रीसायबा, तुझ्या या अशा सुरेख रचनांबद्दल थ्यांकू हां. ता. क. प्राची-अश्विनी कुठे गायबल्येय कोण जाणे. ती पण असं काही अनवट लिहून जाते. मुक्तछंदात असतं.

युयुत्सु Mon, 06/02/2025 - 10:47
नाही, नाही रे, चुकलास तू नाही! अधांतरातली पहाट शोधताना दिसले जे स्वप्न त्या पंखांना तो भटकण्याचा कैफ वेगळा — ठाऊक जगा नाही नाही रे, चुकलास तू नाही! छंदबेड्या तोडून जो मुक्त गुंजला भ्रमरासम स्वच्छंद रमला मळलेल्या वाटा टाकूनी जगणे ठाऊक जगा नाही नाही रे, चुकलास तू नाही!