Skip to main content

ड्रीमकॅचर

लेखक चित्रा यांनी बुधवार, 03/08/2011 09:10 या दिवशी प्रकाशित केले.
काळपट ओट्यावरून पाण्याचा हात फिरवून झाल्यानंतर रात्रीच्या अंधारात तिने पाहिले खिडकीबाहेर ते स्वप्न खुणावत अजून उभेच होते - ** पलंगावर टाकून आपले श्रांत क्लांत अंग भिंतींवरून सरकणार्‍या गाड्यांच्या सोबतीने झोपण्याआधी तिच्या लक्षात आले स्वप्न आत येऊ पाहत होते लगबगीने ** उठून तिने स्वप्नांची काढली गाळणी ठेवणीतली लटकावून दिली बेडरूममधील खिडकीवर. कुशीवर मग वळून तिला झोप कधी लागली कळलेच नाही.
काव्यरस
अद्भुतरस
लेखनविषय:
वाचने 4512
प्रतिक्रिया 31

प्रतिक्रिया

सहज बुधवार, 03/08/2011 09:22
स्वप्नात अडकताना (काही स्वप्न पूरी करता करता) झोप (मनस्वास्थ) खराब होते आणी शांत झोप हवी असेल तर काही स्वप्नांना आवर घालावा लागतो. अशी काहीशी संमीश्र भावना वाटली.

प्रा.डॉ.दिलीप बिरुटे रविवार, 07/08/2011 12:52
स्वप्नात अडकताना (काही स्वप्न पूरी करता करता) झोप (मनस्वास्थ) खराब होते आणी शांत झोप हवी असेल तर काही स्वप्नांना आवर घालावा लागतो. अशी काहीशी संमीश्र भावना वाटली. असेच बोल्तो. बाकी, स्वप्नांना गाळणीची कल्पना लैच भारी. -दिलीप बिरुटे

नगरीनिरंजन बुधवार, 03/08/2011 11:14
कविता आवडली. फक्त, गाळणी ठेवणीतली नसून रोजच वापरली जाणारी असेल असे वाटले.

राघव बुधवार, 03/08/2011 11:44
छान कल्पना अन् छान व्यक्तता!! स्वप्नांची गाळणी ही कल्पनाच खूप सुंदर आहे! राघव

ऋषिकेश बुधवार, 03/08/2011 13:21
क्या बात है! कल्पना एकुणात आवडली आणि पोचली

पल्लवी बुधवार, 03/08/2011 13:36
कविता वाचुन नक्की काय वाट्लं सांगणं अवघड आहे. पण मनात लुकलुकलं काहीतरी. "माझ्याकडे बघ..माझ्याकडे बघ.." म्हणणार्‍या ईच्छा-आकांक्षांना थोपवुन ठेवणंच कधी कधी योग्य ठरतं, ह्या न त्या कारणांसाठी. कविता अप्रतिम झालिये !! खूप आवडली :) शुभेच्छा !

आत्मशून्य बुधवार, 03/08/2011 15:03
स्टीफन किंगच्या ड्रीमकॅचर चित्रपट्/पूस्तकावर काही लीखाण केलय की काय म्हणून उत्सूकतेने धागा उगडला होता... पण कवीताही मस्तच आहे.

श्रावण मोडक बुधवार, 03/08/2011 17:02
स्वप्न ही कल्पना इथे अनेकांगांनी जातेय. रचनाही छान. तुम्ही हाही उपक्रम करता हे माहिती नव्हते.

चित्रा बुधवार, 03/08/2011 18:36
प्रतिसादांबद्दल आभारी आहे. @ सहज, @पल्लवी, प्रत्येकाला अर्थ (किंचित किंवा अगदी) वेगळा लागतो हे तर गृहित धरायला हवे. @ नगरीनिरंजन - खरे आहे. गाळणी ठेवणीतली असेल असे नाही. रोजच्याच वापरातली असू शकेल. ह्या ठिकाणी मी वेगळे शब्द योजले होते, ते एकेरी वाटल्याने बदलले. @श्रामो - धन्यवाद. मी हाही उपद्व्याप करते म्हणायचे असावे. @ राघव - गाळणीची कल्पना माझी नाही. ही कविता एका अमेरिकन इंडियन (नेटिव अमेरिकन) मिथकावरून सुचली. http://en.wikipedia.org/wiki/Dreamcatcher त्रासदायक स्वप्ने दूर ठेवण्यासाठी अशी गाळणी वापरण्याची जुनी रीत होती. ही स्वप्ने बहुदा गाळणीत अडकण्याइतकी लहान असावीत. :)

पैसा बुधवार, 03/08/2011 22:06
अशी स्वप्नं गाळणीतून पलीकडे आली की आणखी हवी हवीशी वाटत असतील!

धनंजय बुधवार, 03/08/2011 22:17
स्वप्नांची गाळणी हे स्वयंपाकघरातून आलेले कल्पनाचित्र आवडले. गाळणीत दु:स्वप्ने अडकावीत, आणि सुखस्वप्ने मात्र तिच्या साखरझोपेत झिरपावीत, अशी शुभेच्छा! (चित्र : विकिपेडियावरून, मुक्त वापरास अनुमती)

मुक्तसुनीत बुधवार, 03/08/2011 23:23
क्षणचित्रांची कविता आवडली.

नंदन बुधवार, 03/08/2011 23:51
कविता आवडली. गाळणीचे नेटिव्ह अमेरिकन रूपकही चपखल, अवांतर - अगदी वेगळ्या अर्थाने गाळणीचं रुपक रोमन संस्कृतीत वापरलं जात असे. पहिल्या एलिझाबेथ राणीचं 'हाती गाळणी असे धरिली' पोझमधलं पोर्ट्रेट प्रसिद्ध आहे.

आनंदयात्री गुरुवार, 04/08/2011 00:57
छान कविता आणि त्याबरोबर प्रतिसादांत आलेली इतर माहितीही छान.

चित्रा गुरुवार, 04/08/2011 04:32
सर्वांना धन्यवाद. नंदन यांच्या पोतडीतला खास प्रतिसाद नेहमीप्रमाणे वाचनीय आहे.

मदनबाण गुरुवार, 04/08/2011 09:32
छान कविता... :) कुंभकर्णा सारखे ६ महिने जमणार नसेल, तरी ६ दिवस "गाढ" झोपायची लयं इच्छा हाय बघा ! ;) जाता जाता :--- झोप आणि "गाढ" झोप यात फार मोठा फरक आहे... २ तास जरी "गाढ" झोप मिळाली तरी त्या झोपेतुन उठल्यावर प्रचंड ताजेपणा जाणवतो... जरा विचार करुन पहा तर शेवटची "गाढ" झोप तुम्हाला कधी लागली होती ते ?

क्रान्ति मंगळवार, 09/08/2011 11:48
मिपावर यावं आणि इतकं छानसं काही वाचून ताजंतवानं व्हावं! फार फार आवडली कविता. [आणि अर्थातच प्रतिसाद.]

चित्रा बुधवार, 10/08/2011 06:03
कविता उशीराने वाचूनही कशी वाटली ते आवर्जून कळवणार्‍या सर्वांचे मनापासून आभार.