(बघ त्याची आठवण येते का?)

चिरमुरे अन खोबरं ट्रॉलीत उभारून खा बघ त्याची आठवण येते का? हात लांबव , फळीखालून काढ उरलेली वर्गणी, इवलासा पेग पिऊन टाक. बघ त्याची आठवण येते का? वार्‍यावर झुलणारे धुराचे ढग नाकात घे, धूर पी , तल्लीन हो. नाहीच आवडलं काही तर खाली उतर , राऊंडात ये, ते चेकाळलेले असतीलच , पायात पाय तुडवत नाचत रहा. मोरया ओरडेल कोणीतरी , बघ त्याची आठवण येते का? मग चालू लाग , उरलेल्या नोटा मोजून घे, पीत रहा नोटा संपेपर्यंत , त्या संपणार नाहीतच , शेवटी परत ये , वाटेत घसरु नकोस, ट्रॉली विसरु नकोस , पुन्हा त्याच ट्रॉलीत ये. आता वरचा बोर्ड बघ , बघ त्याची आठवण येते का? कानाखाली वाजेल , तोल सावर , पोलीस असेल, ओशाळून कान धर , लाथ तो स्वतःच घालेल. तो विचारेल तुला तुझ्या पिण्याचं कारण , तू म्हण घशात खाजतंय. तो हात सोडेल , तू पाया पड. कोणितरी उठुन 'ए गणपत' लावेल , ते तू बंद कर, 'चिकमोत्याची' लाव , बघ त्याची आठवण येते का? मग रात्र होईल , सेक्रेटरी खुशीत येईल , म्हणेल मला बिर्याणी आवडते, तू ही तसंच म्हण, ट्रॉलीत घमघमाट होईल , ढेकरांचा गडगडाट होईल, तो त्या फळीखाली झोपेल , वरच्या पाठ्मोर्‍या मूर्तीकडे बघ , बघ त्याची आठवण येते का? यानंतर भकास डोळ्यांनी पावतीपुस्तक बघायला विसरू नको. यानंतर उरलेली वर्गणी फक्त मोजायचा प्रयत्न कर. यानंतर कानावर बिडी ठेव , झोपी जाण्याचा प्रयत्न कर. येत्या गणपतीत एकदा तरी ,बघ त्याची आठवण येते का?