इंग्रजी कादंबरी प्रकाशनासंदर्भात माहिती आणि मदत

नमस्कार मिपाकर्स,

बर्‍याच दिवसांनी भेट होतेय. तसे मी वाचन मोडमध्ये असतोच आणि काही धाग्यांवर प्रतिक्रियादेखील देत असतो पण आताशा जरा माझा मिपावरचा वावर कमी झालेला आहे. मागील वर्षी मार्चमध्ये आमच्याघरी बाळराजांचे सुखद आगमन झाले. ठरलेल्या तारखेच्या दोन महिने आधीच बाळराजांचे आगमन झाल्याने आम्हाला जवळपास दीड महिना अतिदक्षता विभागात बाळाची काळजी घ्यावी लागली. त्यामुळे गेल्या दीड-दोन वर्षांत मिपावरच काय इतरत्र कुठेच फारसे जाता आले नाही. असो.

आजच्या या धाग्याचे प्रयोजन मिपावर इंग्रजी कादंबरीच्या प्रकाशनासंदर्भात काही मदत मिळू शकते का हे आहे. मी गेल्या काही महिन्यांमध्ये साधारण एमएस वर्डची २३४ पाने भरतील एवढी इंग्रजी कादंबरी लिहिली आहे. विषय माहिती तंत्रज्ञान क्षेत्र, नायकाचे या क्षेत्रातील आयुष्य, अडचणी, लेऑफची भीती, प्रेम, एक रहस्यमय मुलगी, स्टार्ट-अप अशी वळणे घेत बर्‍याच महत्वाच्या प्रश्नांना स्पर्श करणारा आहे. आजचा तरुण आणि आजचे ४०-६० वयोगटातले प्रौढ ही कादंबरी निश्चितच वाचतील आणि त्यातील कथेचा, प्रसंगांचा आनंद लुटतील असा विश्वास वाटतो.

मी बर्‍याच प्रकाशकांना नमुना प्रकरणे पाठवली; परंतु नवोदित लेखकाला जसा अनुभव साधारणपणे येतो तसाच मलाही आला. कुणाचेच उत्तर आले नाही. ही कादंबरी प्रकाशित व्हावी अशी माझी मनापासून इच्छा आहे. स्वतः खर्च करून ही कादंबरी प्रकाशित हे बरेच महाग प्रकरण आहे. माझा प्रयत्न असा एखादा प्रकाशक शोधणे जो या कादंबरीचे व्यवस्थित मार्केटिंगदेखील करू शकेल आणि परंपरागत पद्धतीने ही कादंबरी प्रकाशित करू शकेल हा आहे. मराठीतले प्रकाशक ही मदत करू शकतील का याविषयी मला कल्पना नाही. मला पैसे मिळावेत किंवा अमुक इतकाच नफा मिळावा अशी माझी अट नाही. नवीन लेखकाने नफा वगैरेचा विचारही करणे मूर्खपणाचे आहे हे मला माहिती आहे. नवख्या लेखकाला अशा अटी ठेवत येत नाहीत याची मला जाणीव आहे. परंतु अशा पद्धतीने माझी कादंबरी कुणी प्रकाशित आणि वितरित करू शकेल का याबाबत मला माहिती आणि मदत हवी आहे.

या संदर्भात मदत करावी ही माझी कळकळीची विनंती आहे. धन्यवाद!

धन्यवाद,
समीर